#ദിനസരികള്‍ 576

           

ഞായര്‍ കാഴ്ചകളില്‍

അറവുശാലകളിലേക്ക് ആനയിക്കപ്പെടുന്ന

കന്നു കാലികള്‍.

കുളിപ്പിച്ചിട്ടുണ്ട് , പലതിനേയും

പൊട്ടുകുത്തിയിട്ടുണ്ട്, പൊതുവായി.

കൊമ്പുകളില്‍ നിറമടിച്ചിട്ടുണ്ട്.

ചെവികളില്‍ സുവര്‍ണ നിറത്തിലുള്ള

കുണ്ഡലങ്ങളുണ്ട് , ചിലതൊക്കെ തിളതിളങ്ങുന്നു.

കഴുത്തില്‍ മാലയുണ്ട്, പല നിറങ്ങളില്‍ , പല പൂക്കള്‍കൊണ്ട്.

മെഴുക്കു തേച്ച് ഉടലാകെ മിനുക്കിയെടുത്തിട്ടുണ്ട്.

കുളമ്പുവെട്ടി നിറമടിച്ചു യുക്തമാക്കിയിട്ടുണ്ട്.

വാലുചീകി പൊടിയകറ്റിയിട്ടുണ്ട്, കണ്ടില്ലേ

വിടരാന്‍ വെമ്പി നില്ക്കുന്ന താമരമൊട്ടുപോലെ ?

മാംസളമായ ശരീരത്താല്‍ എല്ലുകളുണ്ടോയെന്നുപോലും

സംശയം.

ഒരു കാര്യമുറപ്പ്.

നന്നായി പരിലാളിക്കപ്പെട്ട കൂട്ടമാണിത്,

പച്ചക്കണ്ണട വെച്ച് ഉണക്കപ്പുല്ലു തീറ്റിയും മറ്റും മറ്റും.

ഓരോരുത്തരും നടന്നുവരുന്ന ആ വരവൊന്നു നോക്കൂ

താടയിളക്കി, കുടമണി കുലുക്കി

തലയൊന്നു ചെരിച്ച് കൊമ്പൊന്നുരച്ച്

ആരോടും പോര്‍ക്കുന്ന ആരവത്തോടെ

ഞാനാദ്യം ഞാനാദ്യം ഞാനാദ്യമെന്ന്.

വായിക്കാനറിയാത്തതു ഭാഗ്യം , അല്ലെങ്കില്‍

മൈതാനത്തിലെ അറവുശാലയെന്നല്ല

തങ്ങള്‍ക്കു മേളിക്കാനുള്ള

വെളിമ്പറമ്പെന്ന് ഇളകി മറിയില്ലല്ലോ!

മിടുക്കര്‍ മിടുക്കര്‍ ആദ്യമാദ്യം

കാരണം അവരാണല്ലോ മിടുക്കര്‍ !

ഞായറാഴ്ചക്കാഴ്ചകളിലെ അറവുശാലകളിലേക്ക് !

സ്വസ്തി പ്രജാഭ്യാം പരിപാലയന്താം....