Saturday, June 24, 2017

#ദിനസരികള്‍ 73



പി കെ കാളന്‍ കാറു വാങ്ങാതിരുന്നത് എന്തുകൊണ്ടായിരുന്നു ? ബ്ലോക്ക് പഞ്ചായത്ത് മെമ്പറും ഫോക്‌ലോര്‍ അക്കാദമി ചെയര്‍മാനുമായിരുന്ന പി കെ കാളന് വേണമെങ്കില്‍ ഒരു കാറുവാങ്ങാമായിരുന്നില്ലേ? നല്ലൊരു വീടുണ്ടാക്കാമായിരുന്നില്ലേ സര്‍ക്കാര്‍ സഹായത്തോടെയെങ്കിലും ഒരു വീടുണ്ടാക്കുന്നതിനെക്കുറിച്ച് ചോദിച്ചപ്പോള്‍ കിടക്കാന്‍ സ്വന്തമായി ഒരു പായ പോലുമില്ലാത്ത നിരവധി ആളുകള്‍ എന്റെ സമുദായത്തിലുണ്ട്. അവര്‍‌ക്കെല്ലാം കിട്ടിയ ശേഷം മതി എനിക്ക് എന്നായിരുന്നു മറുപടി.വൈദ്യുതി ഇല്ലാത്തതിനെക്കുറിച്ചും ഇതേ ന്യായം തന്നെയാണ് കാളേട്ടന്‍ പറഞ്ഞിരുന്നത്.തനിക്കൊരു സാധ്യത ഉണ്ടെങ്കില്‍ ആ സാധ്യതയെ തന്റെ സുഖങ്ങള്‍ക്കു വേണ്ടി ചിലവഴിക്കുക എന്ന നാഗരികസ്വഭാവം അന്യമായിരുന്ന ഒരു ജനനേതാവിന് ഉതകുന്ന ജീവിതം തന്നെയാണ് മരണംവരെ കാളേട്ടന്‍ കൊണ്ടുനടന്നത്. അതുകൊണ്ടാണ് താന്‍ മാത്രം സുഖിച്ചാല്‍ അത് സ്വസമുദായത്തോടു ചെയ്യുന്ന നീതികേടാകുമെന്ന് കാളന്‍ വിശ്വസിച്ചത്.അതുകൊണ്ടാണ് പട്ടിണിയും പരിവട്ടവുമായി സ്വന്തമായി കിടപ്പാടമില്ലാത്ത , എന്തിന് മരിച്ചാല്‍ കുഴിച്ചിടാന്‍ ഒരു തുണ്ടു ഭൂമിപോലുമില്ലാത്ത ആദിവാസി വര്‍ഗ്ഗത്തോട് ഇണങ്ങി നിന്നുകൊണ്ട് , അവരുടെ ദുഖങ്ങളെ തന്റേതാക്കി സ്വാംശീകരിച്ചുകൊണ്ട് , അവര്‍ സുഖിക്കുന്നുണ്ടെങ്കില്‍ അത് തന്റെ സുഖമാണെന്നും അവര്‍ ദുഖിക്കുന്നുണ്ടെങ്കില്‍ അത് തന്റേയും കൂടി ദുഖമാണെന്നും കാളന്‍ എന്ന മനുഷ്യന്‍ ചിന്തിച്ചത്.അതുകൊണ്ടു തന്നെയാണ് കാളന്‍ കാറു വാങ്ങാതിരുന്നതും.
            അപ്പോള്‍ എന്തുകൊണ്ടായിരിക്കും സി കെ ജാനു കാറുവാങ്ങിയത് ? ആദിവാസികളെക്കുറിച്ച് സി കെ ജാനു പറയുന്നത് കേള്‍ക്കുക ആദിവാസികളും ഇപ്പോള്‍ മാര്‍ക്കറ്റിനെയാണ് ആശ്രയിക്കുന്നത്.സുഭിക്ഷമായി വാങ്ങാന്‍ അവരുടെ കൈയ്യില്‍ പൈസയില്ല.മൂന്നു നേരം കഴിക്കേണ്ട സമയത്ത് അരനേരമോ ഒരു നേരമോ കഴിക്കും. ആദിവാസികള്‍ ഇപ്പോഴും അരപ്പട്ടിണിക്കാരാണ്.(അഭിമുഖം, മാതൃഭൂമി ആഴ്ചപ്പതിപ്പ് ) താന്‍ ആ ആദിവാസികളില്‍‌പ്പെട്ടതല്ലെന്ന ഒരു ചിന്ത ജാനുവില്‍ വേരുറപ്പിച്ചിട്ടുണ്ടോ? അവര്‍ എന്ന ആദിവാസികള്‍ ഇപ്പോഴും അരപ്പട്ടിണിക്കാരാണെന്നും എന്നാല്‍ ഞാന്‍ അങ്ങനെയല്ല എന്നും ജാനു പറയുമ്പോള്‍ നാം വേറെ എന്താണ് മനസ്സിലാക്കേണ്ടത് ?  ഞങ്ങള്‍ എന്ന് പറയാതെ അവര്‍ എന്ന് സൂചിപ്പിച്ചത് ജാനുവിന് ആദിവാസികളോടുള്ള സമീപനത്തിന്റെ സൂചകമാണ്. ആ സൂചകം അവരുടെ പ്രതിബദ്ധതയെക്കൂടി സൂചിപ്പിക്കുന്നതായതുകൊണ്ട് , കാളന്‍ കാറുവാങ്ങാത്തതും ജാനു കാറു വാങ്ങിയതും എന്തുകൊണ്ട് എന്ന ചോദ്യത്തിന് ഉത്തരമാകുന്നു.
            ഇടതുപക്ഷത്തെ ജാനു അധിക്ഷേപിക്കുന്നതിലും അവരുടെ നിലപാടുകളെ തള്ളിപ്പറയുന്നതിലും എനിക്ക് ആക്ഷേപമേതുമില്ല. എന്നു മാത്രവുമല്ല ഇതിലും ശക്തമായ വിമര്‍ശനം ആദിവാസികളുടെ വിഷയത്തില്‍ ഇടതുപക്ഷത്തിനെതിരെ ഉയരുകയും വേണം എന്ന അഭിപ്രായം കൂടി എനിക്കുണ്ട്.പക്ഷേ ഇടതുപക്ഷവിമര്‍ശനം നടത്തേണ്ടത് വര്‍ഗ്ഗിയകക്ഷികളുടെ തോളില്‍ കയറി ഇരുന്നുകൊണ്ടല്ല.ആദിവാസികളുടെ പേരില്‍ സമരങ്ങള്‍ നടത്തുകയും ആ സമരങ്ങളിലൂടെ കൃഷിയിടങ്ങള്‍ ഉണ്ടാക്കിയെടുക്കുകയും കൃഷിയിടങ്ങളിലെ വരുമാനങ്ങള്‍ കൊണ്ട് സ്വന്തമായി കാറും വീടും വാങ്ങുകയും ചെയ്തുകൊണ്ടല്ല.

പി കെ കാളന്‍ ദരിദ്രനായി മരിച്ചത് പ്രതിബദ്ധതക്കുവേണ്ടിയായിരുന്നു. പി കെ കാളന്റെ മരുമകളായ സി കെ ജാനു ആദിവാസികളെന്തെന്ന് ഇനിയും പഠിക്കുകയും അവര്‍ക്കു വേണ്ടിയുള്ള സമരങ്ങള്‍ പുതിയതായി ആരംഭിക്കുകയും ചെയ്യേണ്ടിയിരിക്കുന്നു.

Friday, June 23, 2017

#ദിനസരികള്‍ 72


ഹൈക്കോടതി കീജേയ് ! ഡിവിഷന്‍ ബെഞ്ച് കീജേയ് ! ജസ്റ്റീസ് ആന്റണി ഡൊമനിക്ക് കീജേയ് ! ദമ ശേഷാദ്രി നായിഡു കീജേയ് ! കോടതി കോടതി എന്നു പറഞ്ഞാല്‍ ഇതാവണം കോടതി. പാടില്ല പാടില്ല എന്ന് പാടിപ്പാടി കോടതിയുടെയൊക്കെ വില ജനങ്ങളുടെ മനസ്സില്‍ കുത്തനെ ഇടിഞ്ഞുപൊളിഞ്ഞു വീണിരിക്കുന്ന ഈ വേളയില്‍ ആ വിലയെ വീണ്ടും എവറസ്റ്റിന്റെ നെറുകന്തലയിലേക്ക് വലിച്ചു കയറ്റുന്ന തരത്തിലും തലത്തിലും ഇന്നലെ നമ്മുടെ ബഹു കോടതി പുറപ്പെടുവിച്ച വിധി, ഉജ്ജ്വലമായി എന്നു പറഞ്ഞാല്‍‌പ്പോരാ അത്യുജ്ജ്വലമായി എന്നേ പറയേണ്ടു. അതുകൊണ്ട് ഹൈക്കോടതിക്ക് രണ്ടു കീജേയ് ഇപ്പോള്‍ വിളിച്ചില്ലെങ്കില്‍ ഇനി പിന്നെ എപ്പോള്‍ വിളിക്കാന്‍? ഇതില്‍പ്പരം സന്തോഷിക്കാന്‍ ഒരവസരമുണ്ടോ? അതുകൊണ്ട് പ്രിയരേ പാടുക ആടുക ആഹ്ലാദിക്കുക! ആനന്ദലബ്ദിക്കിനിയെന്തുവേണം?
            സംഭവം എന്താണെന്ന് മനസ്സിലായില്ലേ ? നമ്മുടെ ബഹു ബഹു ബഹു ഹൈക്കോടതി ഇന്നലെ വിശേഷ അവസരങ്ങളില്‍ വീട്ടില്‍ മദ്യം വിളമ്പാന്‍ അനുവദിച്ചുകൊണ്ടും അതിന് സര്‍ക്കാറിലേക്ക് നല്കേണ്ടുന്ന ഭീമമായ ലൈസന്‍സ് ഫീ വേണ്ടെന്ന് വെച്ചുകൊണ്ടും ഒരു സുപ്രധാന വിധി പുറപ്പെടുവിച്ചിരിക്കുന്ന വിവരം നിങ്ങള്‍ അറിഞ്ഞിരിക്കുമല്ലോ? നൂറു മില്ലി വൈന്‍ വിളമ്പണമായിരുന്നെങ്കില്‍ അയിമ്പതിനായിരം രൂവ അടക്കണമായിരുന്നു. അതില്ലാതെ വന്നാല്‍ ശിക്ഷയും കിട്ടുമായിരുന്നു. കിരാതമായ ആ നിയമം എടുത്തു കളഞ്ഞതോടെ  തിരണ്ടുകല്യാണം മുതല്‍ ഹര്‍ത്താല്‍ വരെ വിശേഷ ദിവസങ്ങളായി പ്രഖ്യാപിച്ചിരിക്കുന്ന മലയാളികള്‍ ഇനിയെന്തിന് സന്തോഷിക്കാതിരിക്കണം. വിശേഷാവസരങ്ങള്‍ ഏതൊക്കെയാണെന്നും ആ അവസരങ്ങളിലേക്ക് ആരെയൊക്കെ ക്ഷണിക്കണമെന്നും എപ്പോള്‍ ആഘോഷിക്കണമെന്നുമൊക്കെയുള്ള തീരുമാനം നമ്മുടെ സ്വന്തമാണ്. എന്നു വെച്ചാല്‍ നൂലുകെട്ട് , പതിനാറടിയന്തിരം , പാലുകാച്ചല്‍ , പിറന്നാള്‍ , നാലാംകുളി , അഞ്ചാംകുളി , തലവടി തുടങ്ങി മുന്നൂറ്റിയറുപത്തഞ്ചുദിവസവും നമുക്ക് വിശേഷാവസരങ്ങളാകക്കൊണ്ട് , ചില നാട്ടുകാരേയും , ചില കൂട്ടുകാരേയുമൊക്കെ വിളിച്ച് ഒരു ടേബിളൊക്കെ വലിച്ചിട്ട് ഒരു മൂന്നു കുത്ത് ചീട്ടൊക്കെ പൊട്ടിച്ചിട്ട് ഇച്ചിരെ ചിപ്സൊക്കെ കൂട്ടി അടിച്ചാഘോഷിക്കാനുള്ള ഈ ഔദ്യോഗികമായ അവകാശമുണ്ടല്ലോ , അതൊരു ഒന്നൊന്നര അവകാശം തന്നെ. അതിനു പിന്നാലെ ഈ വിധി തുറന്നുതരുന്ന സാഹചര്യങ്ങളുടെ അനന്തമായ വിഹായസ്സിനെക്കുറിച്ചോര്‍ക്കുമ്പോള്‍ത്തന്നെ കോള്‍മയിര്‍ കൊള്ളുന്നു.. ആഹഹഹ.. എന്നു മാത്രവുമല്ല , അയലത്തെ ഭാസ്കരേട്ടന്റെ വീട്ടില് കടത്തിക്കൊണ്ടു വരുന്ന ബ്രാണ്ടി പേടിച്ച് അണ്ണാക്കിലിറ്റിച്ച് ഓടി വരുന്ന പരിപാടിയൊന്നും ഇനി വേണ്ടല്ലോ. ഇനിയിപ്പോ അങ്ങേരുടെ ഭാര്യയുടെ ഷഷ്ഠിപൂര്‍ത്തിമുതല്‍ കൊച്ചുമകളുടെ സ്കൂളിപ്പോക്കുവരെ വിശേഷദിവസങ്ങളല്യോ?
            അതിഥി ദേവോ ഭവ എന്ന കാഴ്ചപ്പാടിന്റെ അടിസ്ഥാനത്തിലാണത്രേ സര്‍ക്കാറിന്റെ മുഴുവന്‍ മദ്യനയത്തേയും അട്ടിമറിച്ചുകൊണ്ട്  കോടതി ഈ വിധി പുറപ്പെടുവിച്ചത്. അതിഥികളെ ദേവന്മാരായിത്തന്നെ പരിഗണിക്കുന്ന പാരമ്പര്യത്തെ ഉണ്ടാക്കാന്‍ തോന്നിയ നമ്മുടെ മുതുമുത്തച്ഛന്മാരെ കെട്ടിപ്പിടിച്ചുമ്മ വെക്കേണ്ട സന്ദര്‍ഭമാണിത്.. എത്രകാലമായി മനുസ്മൃതിയും വേദങ്ങളുമൊക്കെ നിയമമാക്കണമെന്ന് ചിലര്‍ ആവശ്യപ്പെടുന്നു. ഒറ്റയടിക്കു വേണ്ട.. ഇങ്ങനെ ഇച്ചിരെയിച്ചിരെ ആയിട്ടുകൊണ്ടുവന്നാല് മതി. ഇനിയും നമ്മുടെ പുരാണങ്ങളിലും ഇതിഹാസങ്ങളിലുമുള്ള മൊഴിമുത്തുകള്‍ കോടതി മനസ്സിലാക്കി വ്യാഖ്യാനിച്ച് ഉപയോഗിക്കണം. അത്തരം മുത്തുകളെ കണ്ടെത്തി കോടതിക്കു സമര്‍പ്പിക്കുന്നതിന് വേണ്ടി ഞാന്‍ ഇന്നു മുതല്‍ ഗവേഷണത്തിലായിരിക്കുമെന്നുകൂടി അറിയിക്കട്ടെ. കൂടാതെ ഇത്തിരി കഴിച്ചേച്ചിരിക്കുമ്പോള്‍ ആട്ടവും പാട്ടും നടത്തി അതിഥിയെ രസിപ്പിക്കാന്‍ കഴിഞ്ഞാലോ ? എന്നാല്‍ ഭേഷായി. അതുകൊണ്ട്  ദേവദാസി സമ്പ്രദായത്തെ ശ്ലാഘിക്കുന്ന ഏതെങ്കിലും പഴയ ശ്ലോകങ്ങളോ സൂക്തങ്ങളോ നിങ്ങളുടെ ശ്രദ്ധയിലുണ്ടെങ്കില്‍ അറിയിക്കാന്‍ മറക്കരുത്.

            ജനാധിപത്യ ഗവണ്‍‍‌മെന്റ്...  ജനകീയ സര്‍ക്കാര്.. മദ്യനയം.. അഞ്ഞുറു മീറ്ററ് .. ദേശീയ പാത... ഒലക്കേടെ മൂട്.. നിങ്ങ അവിടെ മൂലക്കിരി പിണറായി സഖാവേ.. ഞങ്ങ കോടതിയും കുടിയന്മാരും പിന്നെ പുരാണങ്ങളും കൂടി ഈ നാടൊന്ന് ഭരിക്കട്ട്... ഭരുമോന്ന് അറിയാമല്ല്.... അതുകൊണ്ട് ഹൈക്കോടതി കീജേയ് ! ഡിവിഷന്‍ ബെഞ്ച് കീജേയ് ! ജസ്റ്റീസ് ആന്റണി ഡൊമനിക്ക് കീജേയ് ! ദമ ശേഷാദ്രി നായിഡു കീജേയ് !

Thursday, June 22, 2017

#ദിനസരികള്‍ 71


സര്‍ക്കാര്‍ ജീവനക്കാര്‍ മനുഷ്യരാകണം എന്ന ആവശ്യം പല തവണ ഉന്നയിക്കപ്പെട്ടതാണ്.രൂപത്തിലും ഭാവത്തിലും മനുഷ്യരാകുക എന്ന കാര്യത്തില്‍ ജനിച്ചു വീണതുമുതല്‍ നമുക്ക് പ്രത്യേകിച്ച് ഒന്നും ചെയ്യാനില്ല. എന്നാല്‍ മനുഷ്യന് മനുഷ്യത്വം നല്കുന്ന സ്നേഹം , കരുണ , സഹാനുഭൂതി മുതലായ മാനവികഗുണങ്ങള്‍ ഊട്ടിയുറപ്പിക്കുക എന്ന കാര്യത്തില്‍ നമുക്ക് ഒരുപാട് ചെയ്യാനുണ്ട്. ഉദ്യോഗസ്ഥരുടെ അത്തരം ഗുണങ്ങളുടെ അഭാവം സൃഷ്ടിച്ച രക്തസാക്ഷിയാണ് കോഴിക്കോട് ചെമ്പനോട് വില്ലേജ് ഓഫീസില്‍ ജീവനൊടുക്കിയ കാവില്‍പുരയിടം ജോയി എന്ന തോമസ്. തന്റെ ഭാര്യയുടെ പേരിലുള്ള എണ്‍പത് സെന്റ് സ്ഥലത്തിന് നികുതി സ്വീകരിക്കുന്നതിന് നിയമപരമായ തടസ്സങ്ങളൊന്നുമില്ലാതിരുന്നിട്ടും , നികുതി സ്വീകരിക്കാതിരുന്ന വില്ലേജ് ഓഫീസര്‍ക്ക് ഒരു മാസം മുമ്പുതന്നെ ആത്മഹത്യാക്കുറിപ്പ് തോമസ് നല്കിയിരുന്നു.എന്നിട്ടും കണ്ണുതുറക്കാത്തവര്‍ തോമസ് മരിച്ച അന്നുതന്നെ നികുതി മുറിക്കാന്‍ തയ്യാറായി എന്നുകൂടി അറിയുമ്പോഴേ അവര്‍ ചെയ്ത അനീതിയുടെ ആഴം വ്യക്തമാകുകയുള്ളു.
            തന്റെ ഓഫീസില്‍ വരുന്നവരോട് മാന്യമായി പെരുമാറാനും അവര്‍ ഉന്നയിക്കുന്ന ആവശ്യങ്ങളെക്കുറിച്ച് സഹാനുഭൂതിയോടെ പ്രതികരിക്കാനും നമ്മുടെ ഓഫീസര്‍മാര്‍ പഠിക്കണം. ചെയ്യാന്‍ കഴിയാത്ത കാര്യമാണെങ്കില്‍ എന്തുകൊണ്ട് കഴിയില്ല എന്ന് അപേക്ഷകരെ ബോധ്യപ്പെടുത്തണം.അത് പരിഹരിക്കാനാവശ്യമായ വഴികള്‍ പറഞ്ഞുകൊടുക്കുവാനും ഉദ്യോഗസ്ഥന് കഴിയണം.നിയമം പാലിക്കുകയും നടപ്പിലാക്കുകയും ചെയ്യുന്നതിന് ആരും എതിരല്ല. എന്നുമാത്രവുമല്ല നിയമം നടപ്പിലാക്കാന്‍ ഉദ്യോഗസ്ഥര്‍ ഏതുസമയത്തും കണ്ണും കാതും തുറന്നിരിക്കണം.പക്ഷേ അര്‍ഹതപ്പെട്ടവന് നീതി ലഭിക്കുന്നില്ലെങ്കില്‍ അത് ലഭ്യമാക്കുന്നതിന് വേണ്ടി ഏതു തലംവരെ പോകാനും നമ്മുടെ ഉദ്യോഗസ്ഥന്‍ മുന്‍‌കൈ എടുക്കണം.
            വെറുതെ പറയാം എന്നല്ലാതെ ഇതിലൊന്നും ഒരു മാറ്റവും ഞാന്‍ പ്രതീക്ഷിക്കുന്നില്ല. പണത്തിനോടുള്ള ആര്‍ത്തി നമ്മുടെ ഉദ്യോഗസ്ഥന്മാരില്‍ ഭൂരിപക്ഷത്തിനേയും അന്ധരാക്കിയിരിക്കുന്നു. ഹൃദയം പൊട്ടിയൊഴുകുന്ന കണ്ണുനീരു കാണാനുള്ള കണ്ണ് അവന് നഷ്ടപ്പെട്ടിരിക്കുന്നു. അതുകൊണ്ട് ജനങ്ങളുടെ പ്രതീക്ഷ നഷ്ടപ്പെടാതിരിക്കാന്‍ ഈ ജീവനക്കാരെ കൊലപാതകക്കുറ്റം ചുമത്തി ജയിലിലടക്കണം.ഈ കുടുംബത്തെ സര്‍ക്കാര്‍ ഏറ്റെടുക്കണം.തോമസിന്റെ ഭാര്യയുടെ ജീവിതകാലംവരെയെങ്കിലും ഒരു എല്‍ഡി ക്ലര്‍ക്കിന് കിട്ടുന്ന മാസശമ്പളം കുടുംബത്തിന് നല്കണം.ഉദ്യോഗസ്ഥന്‍ ചെയ്ത അപരാധത്തിന് അല്പമെങ്കിലും ആശ്വാസം ഇങ്ങനെയേ ഉണ്ടാക്കാനാകൂ.

            ഞാന്‍ ഈശ്വരവിശ്വാസിയല്ല. ഭയവും നിസ്സാഹായതയുമാണ് വിശ്വാസമുണ്ടാകാനുള്ള കാരണം. ഒന്നും ചെയ്യാനാവാത്ത ഈ  നിസ്സഹായതയില്‍ നിന്നുകൊണ്ട് ഇത്തരം ഉദ്യോഗസ്ഥപ്പരിഷകളുടെ തലയില്‍ ഇടിത്തീ വീഴാനെങ്കിലും ഞാന്‍ ആഗ്രഹിക്കട്ടെ !

Wednesday, June 21, 2017

#ദിനസരികള്‍ 70


ക്രിക്കറ്റ് കണ്‍ട്രോള്‍ ബോര്‍ഡില്‍ നിന്ന് രാമചന്ദ്ര ഗുഹയെപ്പോലൊരാള്‍ക്ക് രാജി വെച്ചൊഴിയേണ്ടി വന്നു എന്നുള്ളത് ആശാസ്യമായ ഒരു വാര്‍ത്തയായിരുന്നില്ല.അതും ഇന്ത്യയുടെ പരമോന്നകോടതി, വിനോദ് റായിയുടെ ആധ്യക്ഷതയില്‍ നിയോഗിച്ച ഇടക്കാല ഭരണസമിതിയില്‍ നിന്നാണ് അദ്ദേഹത്തിന്റെ രാജി എന്നത് തികച്ചും നിരാശാജനകമായിരുന്നു.ലോധ കമ്മറ്റി റിപ്പോര്‍ട്ട് നടപ്പിലാക്കാത്ത ബി സി സി ഐ യെ പിരിച്ചു വിട്ടുകൊണ്ടാണ് ക്രിക്കറ്റ് രംഗത്തിന്റെ ശുദ്ധീകരണത്തിന് വേണ്ടി സുപ്രിംകോടതി നാലംഗസമിതിയെ നിയോഗിച്ചത്. പരമോന്നത കോടതിയുടെ പിന്തുണ ഉണ്ടായിട്ടുപോലും അംഗങ്ങളിലൊരാള്‍ക്ക് രാജിവെക്കേണ്ടി വന്നുവെങ്കില്‍ ക്രിക്കറ്റ് രംഗത്ത് നിലനില്ക്കുന്ന അവിശുദ്ധ കൂട്ടുകെട്ടിന്റെ ശക്തി എന്തായിരിക്കും ? ഗുഹ , പിന്നീട് വിരാട് കൊഹ്ലിക്കെതിരെ വിരല്‍ ചൂണ്ടുകയുണ്ടായി
            അതേ വിരാട് കോലി തന്നെ പരിശീലകനായ അനില്‍ കുംബ്ലെയുടെ രാജിക്കും കാരണക്കാരനാകുന്നു എന്നത് ഗുഹ , തന്റെ രാജിയോട് അനുബന്ധിച്ച് പറഞ്ഞ കാര്യങ്ങള്‍ ശരിയാണെന്ന് സ്ഥാപിച്ചെടുക്കുന്നു.അനില്‍ കുംബ്ലെ , പക്ഷേ ഈ അഭിപ്രായവ്യത്യാസങ്ങളെക്കുറിച്ച് തുറന്നുതന്നെ തന്റെ ട്വിറ്ററില്‍ കുറിച്ചിട്ടുണ്ട് . ക്യാപ്റ്റനും കോച്ചും തമ്മിലുള്ള പ്രശ്നം പരിഹരിക്കാന്‍ ബി സി സി ഐ ഇടപെട്ടെങ്കിലും വിജയിക്കാന്‍ കഴിഞ്ഞില്ല എന്ന് കുംബ്ലെ എഴുതുന്നു. അത് കേവലമായ ഒരു മാധ്യസ്ഥശ്രമമായി കണക്കാക്കേണ്ടതല്ല , മറിച്ച് ആര്‍ക്കും വഴങ്ങാത്ത വ്യക്തികളുടെ പിടിവാശിയാണ് ഇന്നും ക്രിക്കറ്റില്‍ മേല്‍ക്കോയ്മ നേടുന്നതെന്ന് തുറന്നുസമ്മതിക്കലാണ്. ടീം എന്ന പൊതുവികാരത്തിനപ്പുറം വ്യക്തികളുടെ താല്പര്യത്തിലാണ് കാര്യങ്ങള്‍ തീരുമാനിക്കപ്പെടുന്നതെങ്കില്‍ , വിനോദ് റായിക്ക് ഇവിടെ ഒന്നും ചെയ്യാനില്ല, സുപ്രിംകോടതിക്കും.

            മറ്റൊരു മത്സരത്തിനായി ഇന്ത്യന്‍ ടീം തയ്യാറെടുക്കുന്ന ഈ വേളയില്‍ പുതിയൊരു കോച്ചിനെ കണ്ടെത്തുക എന്നത്  ബാലികേറാമലയൊന്നുമല്ല. പക്ഷേ ഇനിയും വ്യക്തിപരമായ അഭിപ്രായ വ്യത്യാസങ്ങളാല്‍ രാജികള്‍ തുടര്‍ക്കഥകളാകുന്ന സാഹചര്യങ്ങള്‍ ഇല്ലാതാകണം. ടീമാണ് , വ്യക്തികളല്ല ജയിക്കേണ്ടത് എന്ന ബോധമുണ്ടാകണം. തന്റെ പരിശീലകസമയം കുംബ്ലെ നന്നായി ഉപയോഗിച്ചു. എന്നിട്ടും നീട്ടിക്കിട്ടിയ കാലാവധി പോലും പൂര്‍ത്തിയാക്കാതെയുള്ള അദ്ദേഹത്തിന്റെ രാജി നല്കുന്ന സൂചനകളില്‍ നിന്ന് ഇന്ത്യന്‍ ക്രിക്കറ്റ് പലതും പഠിക്കാനുണ്ട്. അതില്‍ ഏറ്റവും പ്രധാനപ്പെട്ടത് , ടീമിനെ ഈ പ്രശ്നങ്ങള്‍ ഒരു തരത്തിലും ബാധിക്കരുത് എന്ന കരുതലാണ്.തുടരാമായിരുന്നിട്ടുപോലും ടീം എന്ന സ്പിരിറ്റിനോട് യോജിച്ചു നിന്ന കുംബ്ലേയോട് ബഹുമാനമുണ്ട്.അത്തരമൊരു ബഹുമാനത്തിന് കോലി അര്‍ഹനാണോ എന്ന് അദ്ദേഹം സ്വയം പരിശോധിക്കട്ടെ !

Tuesday, June 20, 2017

#ദിനസരികള്‍ 69


            നമുക്ക് വിമര്‍ശനങ്ങളുണ്ടാവുന്നുണ്ട്. കൃതികളുമുണ്ടാകുന്നുണ്ട്. പക്ഷേ മഹത്തായ വിമര്‍ശനങ്ങളോ മഹത്തായ കൃതികളോ ഉണ്ടാകുന്നില്ലെന്നുള്ളത് ന്യൂനതയാണ്. ആടുജീവിതം പോലെയുള്ള ജനപ്രിയസാഹിത്യങ്ങളെക്കാള്‍ എത്രയോപടി കടന്നു നില്ക്കുന്ന നൂറുജന്മങ്ങള്‍ പോലെയുള്ള നല്ല നോവലുകള്‍‍പോലും മഹത് എന്ന വിശേഷണത്തിന് അര്‍ഹമാകുന്നില്ല എന്നതൊരു വസ്തുതയാണ്. ഈ സാഹചര്യത്തില്‍ സാഹിത്യത്തിന് എന്തുപറ്റി എന്ന ചോദ്യത്തെക്കാള്‍ ഇങ്ങനെ കഥയില്ലാതെ വരണ്ടു പോകാന്‍ നമ്മുടെയൊക്കെ ജീവിതങ്ങള്‍ക്ക് എന്തുപറ്റി എന്ന് ചോദിക്കുന്നതായിരിക്കും കൂടുതല്‍ ഉചിതം എന്ന് കരുതുന്നു.
            Art is not a mirror held up to reality
but a hammer with which to shape it.” 
എന്ന് ബ്രെഹ്ത് പറയുന്നത് , നമുക്ക് പരുവപ്പെടുത്താന്‍ എന്തെങ്കിലുമൊക്കെ ഉണ്ടാകുന്ന കാലത്തെ കലയെക്കുറിച്ചാണ്.അങ്ങനെ അടിച്ചുപരത്തി പരുവപ്പെടുത്തി എടുക്കാന്‍ ഒന്നുമില്ലാത്ത ഒരു കാലത്തിലൂടെയാണ് നാം കടന്നു പോകുന്നതെങ്കില്‍ , ആ കാലം ഉണ്ടാക്കിയെടുക്കുന്ന കലയും , ജീവിതം പോലെതന്നെ , മഹത്തായ ഒന്നു പ്രക്ഷേപണം ചെയ്യാനില്ലാതെ കെട്ടുപോയേക്കാം.അതിനര്‍ത്ഥം കാലത്തില്‍ തലയുയര്‍ത്തിനില്ക്കാന്‍ കഴിയുന്ന ജീവിതങ്ങളെ ആവിഷ്കരിക്കാനുള്ള കലാകാരന്റെ വ്യഗ്രതക്കുറവ് ബ്രെഹ്ത് തന്നെ പറഞ്ഞ ഇരുണ്ടകാലത്തിന്റെ സവിശേഷതയായി വരുന്നു എന്നാണ്.അതായത് ഇരണ്ട കാലത്തിലെ അല്പന്മാരായ നമ്മുടെയൊക്കെ ജീവിതം , ഇരുണ്ട കാലത്തിന്റെ അല്പത്തങ്ങളായിത്തന്നെ ഒതുങ്ങിയൊടുങ്ങുമെന്നും , ഇരുണ്ട കാലത്തെ പ്രതിഫലിപ്പിക്കുന്ന ഒരു പാട്ടുകെട്ടാന്‍ പോലും സാധ്യതയില്ല എന്നുമാണ്.
            കഥയുള്ള ഒരു ജീവീതം പോലും നമുക്കില്ല എന്നാണോ , അപ്പോള്‍  നമ്മുടെ കഥാകാരന്മാര്‍ കണ്ടെത്തുന്നത് ?അതുകൊണ്ടാണോ കഥയില്ലാത്തവര്‍ക്ക് കഥയില്ലാത്ത കഥ മതി എന്ന് അവര്‍ നിശ്ചയിക്കുന്നത് ? ഇനി തിരിച്ചും ആശങ്കപ്പെടാമല്ലോ. നമ്മുടെ ജീവിതത്തില്‍ നിന്ന് മഹത്തായ കഥ കണ്ടെത്താനും അത് ആവിഷ്കരിച്ച്  മഹത്തായ സാഹിത്യം ഉണ്ടാക്കാനും നമ്മുടെ കാഥികന്മാര്‍ ക്ക് ശേഷിയും ശേമുഷിയും ഇല്ലെന്നുണ്ടോ ? നിതാന്തമായ നിരീക്ഷണങ്ങളുടെ അഭാവവും ജാഗ്രതക്കുറവും നമ്മുടെ കഥാകാരന്മാരെ ബാധിച്ചിരിക്കുന്നോ ? നമുക്കൊന്നും കഥയില്ല എന്നു പറയുന്നതിന് സത്യസന്ധത കുറയും എന്നത് ആദ്യം സൂചിപ്പിച്ച നൂറുസിംഹാസനങ്ങള്‍ എന്ന കൃതി സാക്ഷിയാണ്.

            

Monday, June 19, 2017

# ദിനസരികൾ 68


''ജനകോടികളുടെ  വിശ്വസ്തസ്ഥാപനം " എന്നു കേട്ടാൽ നമുക്ക് ആ സ്ഥാപനമേതെന്നും അതിന്റെ ഉടമ ആരെന്നും മനസ്സിലാകും. അത്രമാത്രം കേൾവി പ്പെട്ടതായിരുന്നു  ആ പരസ്യം. കഴിഞ്ഞ ഇരുപത്തിയൊന്ന്  മാസമായി ആ സ്ഥാപനങ്ങളുടെ ഉടമ അറ്റ്ലസ് രാമചന്ദ്രൻ ജയിലിലാണ്. ബിസിനസ്സ് വിപുലീകരണത്തിനായി എടുത്ത തുക തിരിച്ചടക്കാൻ കഴിയാതെ സാമ്പത്തികക്കേസുകളിൽ പെട്ടാണ്  അദ്ദേഹം ജയിലിലായത്. പണക്കൊഴുപ്പിന്റെ കണ്ണാടി മാളികകൾ ചീട്ടുകൊട്ടാരം പോലെ തകർന്നടിയുന്നത് നാം കണ്ടിട്ടുണ്ട്.തെറ്റായ അസ്ഥിവാരങ്ങളിൽ കെട്ടിപ്പൊക്കിയ അത്തരം ആലഭാരങ്ങൾ അഴിഞ്ഞുലഞ്ഞ് അടിഞ്ഞ് വീഴുമ്പോൾ നമുക്ക് മമതയൊന്നും തോന്നാറില്ല. പക്ഷേ അറ്റ്ലസ് രാമചന്ദ്രന്റെ പതനം ഒരസ്വസ്ഥത സമ്മാനിക്കുന്നുണ്ട്. സത്യം പറഞ്ഞതാൽ എന്തുകൊണ്ടാണ് അത്തരമൊരു മമത ഉണ്ടാകുന്നത് എന്ന് എനിക്ക് പറയാൻ കഴിയുന്നില്ല. അദ്ദേഹത്തെക്കുറിച്ച് മോശമായതൊന്നും ഇതുവരെ കേൾക്കാത്തതും നല്ലത് കേട്ടിട്ടുള്ളതുമാകാം ഒരു പക്ഷേ , ഈ സഹാനുഭൂതിക്ക് കാരണമാകുന്നത്. ഇന്നത്തെ മാതൃഭൂമിയിൽ ഇദ്ദേഹത്തെക്കുറിച്ച് വന്ന റിപ്പോർട്ട് ചുവടെ ചേർക്കുന്നു. ആ റിപ്പോർട്ടിലും എല്ലാവർക്കും നൻമ ചെയ്തയാൾ എന്നു തന്നെയാണ് സൂചന. അത് വാസ്തവമാണെങ്കിൻ , രാമചന്ദ്രൻ സഹായം അർഹിക്കുന്നയാൾ തന്നെ!

ദുബായ്: അഴിയുന്തോറും മുറുകുന്ന കുരുക്കുപോലെയാണിപ്പോള്‍ വ്യവസായ പ്രമുഖനായിരുന്ന അറ്റ്‌ലസ് രാമചന്ദ്രന്റെ ജീവിതം. സ്വത്തുക്കളെല്ലാം നല്‍കി ജയിലില്‍നിന്ന് അദ്ദേഹത്തെ പുറത്തെത്തിക്കാനുള്ള ഭാര്യ ഇന്ദു രാമചന്ദ്രന്റെ ശ്രമം ഇനിയും ലക്ഷ്യം കണ്ടില്ല. 21 മാസമായി ജയിലില്‍ കഴിയുന്ന രാമചന്ദ്രന്റെ ആരോഗ്യനില മോശമായതും അവരെ അലട്ടുന്നു.ബിസിനസ് വിപുലപ്പെടുത്തുന്നതിനായി വലിയൊരു തുകയാണ് വായ്പയായി അറ്റ്‌ലസ് രാമചന്ദ്രന്‍ വിവിധ ബാങ്കുകളില്‍നിന്നായി എടുത്തത്. അത് പലിശയും മറ്റുമായി വന്‍തുകയായി ഉയര്‍ന്നുകഴിഞ്ഞു.

ജുവലറികളിലുണ്ടായിരുന്ന സ്വര്‍ണാഭരണങ്ങളും മറ്റും ചെറിയ തുകയ്ക്ക് വിറ്റ് കുറെ കടങ്ങള്‍ വീട്ടി. ഇരുന്നൂറോളം ജീവനക്കാരുടെ ആനുകൂല്യങ്ങളും നല്‍കി. എങ്കിലും വലിയ കടബാധ്യത അതേപടി നില്‍ക്കുന്നു. സ്വത്തുക്കള്‍ ബാങ്കുകളെ ഏല്‍പ്പിച്ച് അവരുടെ കണ്‍സോര്‍ഷ്യം വഴി തുക തിരിച്ചടയ്ക്കാനുള്ള പദ്ധതിയും പാതിവഴിയിലാണ്. 19 ബാങ്കുകള്‍ ഇതിന് തയ്യാറായെങ്കിലും മൂന്നു ബാങ്കുകള്‍ നിസ്സഹരിക്കുന്നതാണ് ഇപ്പോഴത്തെ പ്രശ്‌നം. ഇതിനിടയില്‍ സമാനമായ സാമ്പത്തിക പ്രശ്‌നങ്ങളുടെ പേരില്‍ മകള്‍ മഞ്ജുവും മരുമകന്‍ അരുണും കൂടി ജയിലിലായതോടെ എല്ലാം ചെയ്തുതീര്‍ക്കേണ്ട ബാധ്യത ഇന്ദിര എന്ന ഇന്ദുവിന്റെ തലയിലായി. മകന്‍ നേരത്തെതന്നെ ഈ പ്രശ്‌നങ്ങളാല്‍ അമേരിക്കയിലേക്ക് പോയിരുന്നു.

2015 ഓഗസ്റ്റ് 23-നാണ് ചെക്കുകള്‍ മടങ്ങിയ കേസുകളുമായി ബന്ധപ്പെട്ട് രാമചന്ദ്രന്‍ ജയിലിലാകുന്നത്. 34 ദശലക്ഷം ദിര്‍ഹത്തിന്റെ ചെക്കുകള്‍ പണമില്ലാതെ മടങ്ങിയതിനെ ത്തുടര്‍ന്നായിരുന്നു ദുബായ് പോലീസ് രാമചന്ദ്രനെ അറസ്റ്റ് ചെയ്യുന്നത്. സെപ്റ്റംബര്‍ ഒന്നിന് രാമചന്ദ്രന്റെ ജാമ്യാപേക്ഷ തള്ളി. ജി.സി.സി. രാജ്യങ്ങളിലായി വ്യാപിച്ചുകിടക്കുന്ന സ്വത്തുക്കള്‍ വിറ്റഴിച്ച് 500 ദശലക്ഷം ദിര്‍ഹത്തിന്റെ (877 കോടി രൂപയിലേറെ) കടബാധ്യത തീര്‍ക്കാമെന്ന് ഗ്രൂപ്പ് കോടതിയെ അറിയിച്ചു. എന്നാല്‍ അക്കാര്യത്തില്‍ പുരോഗതി ഉണ്ടായില്ല. ചെക്കുകേസുകളില്‍ പെട്ട് ദുബായ് കോടതി ഒക്ടോബര്‍ 28-ന് രാമചന്ദ്രനെ മൂന്നുവര്‍ഷത്തേക്ക് ശിക്ഷിക്കുകയും ചെയ്തു. ഇപ്പോള്‍ വായ്പയും വാടകക്കുടിശ്ശികയുമെല്ലാമായി ബാധ്യത 600 ദശലക്ഷം ദിര്‍ഹത്തിലെത്തിയെന്നാണ് ഏകദേശ കണക്ക്.

അതുവരെ ഭര്‍ത്താവിന്റെ ബിസിനസ്സ് കാര്യങ്ങളുമായി കാര്യമായ ബന്ധമൊന്നുമില്ലാതിരുന്ന ഇന്ദു പിന്നീട് എല്ലാം നേരിടേണ്ട സ്ഥിതിയായി. ഭര്‍ത്താവും മകളും മരുമകനും ജയിലിലായതോടെ ഒറ്റയ്ക്ക് 68-ാം വയസ്സില്‍ കടബാധ്യതകളോട് യുദ്ധംചെയ്യുകയാണ് ഈ വീട്ടമ്മ. എല്ലാവര്‍ക്കും നല്ലതുമാത്രം ചെയ്തുപോന്നിരുന്ന രാമചന്ദ്രനെ മാനുഷികപരിഗണന വെച്ച് ആരെങ്കിലും സഹായിക്കുമെന്ന പ്രതീക്ഷയില്‍ ഇപ്പോഴും അവര്‍ ദിവസങ്ങള്‍ തള്ളിനീക്കുന്നു.

അതിനിടെ രാമചന്ദ്രന്റെ ആരോഗ്യനില വഷളാവുന്നതും അവരെ വേവലാതിപ്പെടുത്തുന്നു. കഴിഞ്ഞദിവസം വീല്‍ചെയറിലാണ് അദ്ദേഹത്തെ ജയിലില്‍നിന്ന് ആസ്​പത്രിയിലേക്ക് കൊണ്ടുപോയത്. വലിയ കടബാധ്യതകളുടെ കുരുക്കുകള്‍ അഴിച്ചെടുക്കാനും ഭര്‍ത്താവിനെ ജയിലില്‍നിന്ന് പുറത്തെത്തിക്കാനും തനിക്കുകഴിയും എന്ന പ്രതീക്ഷയിലാണ് അവര്‍ ഇപ്പോഴും.

Sunday, June 18, 2017

#ദിനസരികള്‍ 67


            സംസ്കാരപഠനം അഥവാ കള്‍ച്ചറല്‍ സ്റ്റഡീസ് എന്ന വിജ്ഞാനശാഖ ആധുനികാനന്തരസൈദ്ധാന്തികസമീപനങ്ങളില്‍ പ്രഥമഗണനീയത അവകാശ പ്പെടാന്‍ കഴിയുന്ന തലത്തിലേക്കും തരത്തിലേക്കും വ്യാപിച്ചുകഴിഞ്ഞ ഒരു ധൈഷണികശാഖയാണ്.എന്താണ് സംസ്കാരം എന്ന ചോദ്യത്തിന് ഒറ്റവാക്കിലുള്ള ഒരുത്തരം അസാധ്യമാക്കുന്നതരത്തില്‍ ജീവിതത്തിന്റെ സമസ്തമേഖലകളേയും തങ്ങളുടെ പഠന മനനങ്ങളിലേക്കാനയിക്കുകയും അവയുടെ മൂല്യങ്ങളെ രാഷ്ട്രീയാഭിമുഖ്യത്തിന്റെ വെളിച്ചത്തിലേക്ക് നീക്കിനിറുത്തകയും ചെയ്യുന്നു എന്നതാണ് സംസ്കാരപഠനത്തിന്റെ സവിശേഷത. കമ്പോളത്തിന്റെ കടന്നുകയറ്റങ്ങളില്‍‌പ്പെട്ട് നമുക്ക് അന്യമായിക്കൊണ്ടിരിക്കുന്ന ജീവിതമൂല്യങ്ങളെ ക്കുറിച്ചുള്ള ആവലാതികള്‍ എന്നത്തേയുംകാള്‍ രൂക്ഷമായിക്കൊണ്ടിരിക്കുന്ന സമകാലിക സാംസ്കാരിക അവസ്ഥ, നാം നേരിടുന്ന ഒരു വലിയ വെല്ലുവിളിയാണ്. വാങ്ങിപ്പിക്കുക എന്നത് വാങ്ങുക എന്ന സ്വാഭാവികതയെക്കാള്‍ പ്രാധാന്യത്തോടെ നടപ്പില്‍ വരുത്താന്‍ ശ്രമിക്കുന്ന സാമ്രാജ്യത്വ അജണ്ടകളെ , അതിലുമുപരി ആത്മാര്‍ത്ഥതയോടെ ജനങ്ങളിലേക്കെത്തിക്കുവാന്‍ ശ്രമിക്കുകയും അവരുടെ ആവശ്യം എന്താണെന്ന് നിര്‍ണയിച്ചുകൊടുക്കുകയും ചെയ്യുന്ന മാധ്യമങ്ങളേയും സംസ്കാരപഠനം പരിശോധിക്കുന്നുണ്ട്.കുത്തകകളുടേയും മാധ്യമങ്ങളുടേയും ഇടയില്‍പ്പെട്ടുപോകുന്ന വികസ്വര സ്വപ്നങ്ങള്‍ മാത്രമായി ചുരുങ്ങുന്ന ജീവിതങ്ങളെ കണ്ടെടുക്കുക എന്നതുതന്നെയാണ് സംസ്കാരപഠനം ചെയ്യുന്നത്.
            റെയ്മണ്ട് വില്യംസ് തന്റെ പ്രസിദ്ധമായ കീവേര്‍ഡ്സ് എന്ന പുസ്തകത്തില്‍ ആംഗലേയഭാഷയിലെ ഏറ്റവും സങ്കീര്‍ണമായ രണ്ടോ മൂന്നോ പദങ്ങളില്‍ ഒന്നാണ് കള്‍ച്ചര്‍ എന്നു പറയുന്നുണ്ട്. ഏതൊക്കെ തലങ്ങളില്‍ , ഏതൊക്കെ തത്വചിന്താപദ്ധതികളില്‍ ഏതൊക്കെ അര്‍ത്ഥങ്ങളില്‍ ഈ പദം ഉപയോഗിക്കപ്പെടുന്നു എന്ന് നമുക്ക് തീര്‍ച്ചപ്പെടുത്താന്‍ കഴിയാത്തത് ഈ സങ്കീര്‍ണതക്ക് കാരണമാകുന്നുണ്ടെന്ന് അദ്ദേഹം കൂട്ടിച്ചേര്‍ക്കുന്നു.ഇരുപതാം നൂറ്റാണ്ടിന്റെ അവസാനപാദത്തിലാണ് സിദ്ധാന്തം എന്ന നിലയില്‍ സംസ്കാരപഠനത്തിന്റെ ഉദയമെങ്കിലും അത് മനുഷ്യനോളം പഴക്കമുള്ള ഒരു പക്ഷേ അതിലുമധികം മൂല്യബോധങ്ങളെ പേറുന്ന അപാരമായ ഒരു തുടര്‍ച്ചയുടെ സൂചകമാണ് എന്നത് റെയ്മണ്ട് വില്യംസ് പറയുന്ന ഈ സങ്കീര്‍ണതക്ക് നിദാനമാകുന്നു.അതുകൊണ്ട് നിയതമായ ഒരര്‍ത്ഥത്തിലേ സംസ്കാരം എന്ന പദം പ്രയോഗിക്കാന്‍ കഴിയൂ എന്ന ധാരണ അസ്ഥാനത്താണെന്നും അത്തരത്തിലുള്ള ദുര്‍വാശി സംസ്കാരപഠനത്തിന്റെ വിപുലമായ മേഖലകളെ കള്ളികളിലേക്ക് നിജപ്പെടുത്തുവാനേ സഹായിക്കൂ എന്നും നാം മനസ്സിലാക്കേണ്ടതുണ്ട്.

            സംസ്കാരപഠനം എന്നു പറഞ്ഞാല്‍ സംസ്കാരത്തെക്കുറിച്ചുള്ള പഠനപദ്ധതിയാണെന്ന് തോന്നാമെങ്കിലും അത് നിഷ്കൃഷ്ടമായ അര്‍ത്ഥമല്ല.സാംസ്കാരിക ഘടകങ്ങളെ മുന്‍നിര്‍ത്തി സാഹിത്യപഠനവും കലാനിരൂപണവും നടത്തുന്ന പദ്ധതിയെ ആണ് അര്‍ത്ഥമാക്കുന്നത് (പി ഗോവിന്ദപ്പിള്ള , സാംസ്കാരിക ചരിത്രം പുതുമ പഴമ പ്രസക്തി എന്ന ലേഖനം ) എന്ന് മാത്രം തീര്‍ച്ചപ്പെടുത്തി പോകുന്നതിന്റെ സാംഗത്യം പരിശോധിക്കേണ്ടതുതന്നെയാണ്.

Saturday, June 17, 2017

#ദിനസരികള്‍ 66


            വിവാദങ്ങളല്ല , കേരളത്തിന് വികസനമാണ് വേണ്ടതെന്ന നിലപാടു പ്രഖ്യാപിച്ചു കൊണ്ട് മുഖ്യമന്ത്രി പിണറായി വിജയന്‍ , പ്രധാനമന്ത്രി നരേന്ദ്രമോഡിക്ക് സമര്‍പ്പിച്ച നിവേദനത്തിലെ ആവശ്യങ്ങള്‍ സത്വരശ്രദ്ധ ആവശ്യപ്പെടുന്നവയാണ്. നാളിതുവരെ കേന്ദ്രം പുലര്‍ത്തിപ്പോന്ന നിലപാടുകളെ ശ്ലാഘിച്ച മുഖ്യമന്ത്രി , ഇനിയും നമ്മുടെ ഫെഡറല്‍ സ്വഭാവത്തെ ശക്തിപ്പെടുത്തുന്ന തരത്തിലുള്ള ഭരണഘടനാപരമായ ഉത്തരവാദിത്തം കേന്ദ്രത്തിന്റെ ഭാഗത്തുനിന്നും ഉണ്ടാകേണ്ടതാണെന്നും ഓര്‍മപ്പെടുത്തുന്നു. കേരളത്തിന്റെ മുഖം മാറ്റിമറിക്കാന്‍ പോന്ന ആ നിര്‍‌ദ്ദേശങ്ങള്‍ ജനങ്ങളുടെ സ്വപ്നങ്ങള്‍ കൂടിയാണ്. കേന്ദ്രത്തിന് കേരളം നല്കിയ പതിനെട്ട് ആവശ്യങ്ങളുടെ പട്ടിക ചുവടെ ചേര്‍ക്കുന്നു.
1.  അന്താരാഷ്ട്ര ആയുര്വേദ ഇന്സ്റ്റിറ്റ്യൂട്ട്:  സാമ്പത്തിക സഹായത്തിന് വേണ്ടി പദ്ധതി സമര്പ്പിച്ചിട്ടുണ്ട്. വേഗത്തില്അംഗീകാരം ലഭിക്കാന്പ്രധാനമന്ത്രി ഇടപെടണം.
2. കേരളത്തിന് ആള്ഇന്ത്യാ ഇന്സ്റ്റിറ്റ്യൂട്ട് ഓഫ് മെഡിക്കല്സയന്സസ് (എയിംസ്) അനുവദിക്കണം.  കോഴിക്കോട് ജില്ലയില്200 ഏക്ര സ്ഥലം ഇതിനായി കണ്ടെത്തിയിട്ടുണ്ട്.
3. ചെന്നൈ-ബംഗ്ളൂരു വ്യവസായ ഇടനാഴി കോയമ്പത്തൂര്വഴി കൊച്ചിയിലേക്ക് നീട്ടണം.
4. ഫാക്ടില്പ്രകൃതിവാതകം അടിസ്ഥാനമാക്കിയുള്ള യൂറിയ പ്ളാന്റ്:  വളം മന്ത്രാലയം ഫാക്ടിന്റെ 600 ഏക്ര സ്ഥലം 1200 കോടി രൂപ വിലയ്ക്ക് കേരളത്തിന് നല്കാമെന്ന് സമ്മതിച്ചിട്ടുണ്ട്.  8 ലക്ഷം ടണ്ശേഷിയുള്ള പ്ളാന്റ് സ്ഥാപിക്കാനാണ് ഉദ്ദേശിക്കുന്നത്. ഈ പദ്ധതിക്ക് വളം മന്ത്രാലയത്തിന്റെ ഫണ്ട് ലഭിക്കണം.
5. കൊച്ചിയില്പെട്രോ കെമിക്കല്കോംപ്ളക്സ്:  കൊച്ചി റിഫൈനറിയുടെ വികസനം പൂര്ത്തിയാകുമ്പോള്ആവശ്യത്തിന് പ്രൊപ്പിലീന്ലഭ്യമാകും.  അതുപയോഗിച്ച് ഫാക്ടിന്റെ ഉപയോഗിക്കപ്പെടാതെ കിടക്കുന്ന ഭൂമിയില്കോംപ്ളക്സ് സ്ഥാപിക്കാനുള്ള പദ്ധതിക്ക് വേഗം അംഗീകാരം ലഭിക്കണം.
6. കേന്ദ്ര പൊതുമേഖലാ സ്ഥാപനങ്ങള്സ്വകാര്യവല്ക്കരിക്കരുത്. ഇന്സ്ട്രുമെന്റേഷന്ലിമിറ്റഡ്, ഹിന്ദുസ്ഥാന്ഓര്ഗാനിക്സ്, ഹിന്ദുസ്ഥാന്ന്യൂസ് പ്രിന്റ്, എച്ച്എല്എല്തുടങ്ങിയവ കേരളത്തിലെ പ്രധാന കേന്ദ്ര പൊതുമേഖലാ കമ്പനികളാണ്.  ഇന്സ്ട്രുമെന്റേഷന്ഏറ്റെടുക്കാന്കേരളം തയാറാണ്.  മറ്റുള്ളവ സ്വകാര്യവല്ക്കരിക്കരുത്.
7.  കൊച്ചി സ്പെഷ്യല്ഇക്കണോമിക് സോണ്വികസിപ്പിക്കണം: 100 ഏക്ര സ്ഥലം പൂര്ണ്ണമായും ഉപയോഗിച്ചുകഴിഞ്ഞു. 200 ഏക്ര സ്ഥലം കൂടി അനുവദിച്ച് സോണ്വികസിപ്പിക്കണം.
8.  കേരള റെയില്ഡവലപ്പ്മെന്റ് കോര്പ്പറേഷന്റയില്മന്ത്രാലയത്തിന് സമര്പ്പിച്ച പദ്ധതികള്അംഗീകരിക്കണം. 1) സബര്ബന്റെയില്പ്രൊജക്ട് 2) തലശ്ശേരി മൈസൂര്റെയില്വെ ലൈന്എന്നിവ.
9.  അങ്കമാലി  ശബരി റെയില്വെ ലൈന്‍. ശബരിമല സന്ദര്ശിക്കുന്ന തീര്ത്ഥാടകരുടെ സൌകര്യങ്ങള്ക്കു വേണ്ടിയുളള പദ്ധതി റെയില്വെയുടെ 100 ശതമാനം മുതല്മുടക്കില്നടപ്പാക്കണം.
10. കൊച്ചി മെട്രോ രണ്ടാം ഘട്ടം: 2577  കോടി രൂപ ചെലവ് വരുന്ന പദ്ധതി നഗരവികസന മന്ത്രാലയത്തിന്റെ പരിഗണനയിലാണ്.
11. തിരുവനന്തപുരം, കോഴിക്കോട് ലൈറ്റ് മെട്രോ: 2015ല്നഗരവികസന മന്ത്രാലയത്തിന് സമര്പ്പിച്ചതാണ്. എത്രയും വേഗം അംഗീകാരം ലഭിക്കണം.
12. നവകേരളം കര്മ്മ പദ്ധതിയും നാലു മിഷനുകളും: ഈ പദ്ധതികള്ക്ക് കേന്ദ്ര സഹായം ലഭ്യമാക്കണം.
13. എല്ലാ വീടുകളിലും ഇന്റര്നെറ്റ് കണക്റ്റിവിറ്റി ലഭ്യമാക്കുന്ന കെ.ഫോണ്പദ്ധതി: ഈ പദ്ധതിക്ക് കേന്ദ്രം പണം അനുവദിക്കണം.
14. കോവളം-കാസര്കോട് ജലപാതക്ക് അമ്പതുശതമാനം കേന്ദ്രസഹായം ലഭ്യമാക്കണം.
15. തൊഴിലുറപ്പു പദ്ധതിയില്ഗ്രാമവികസന മന്ത്രാലയത്തില്നിന്ന് കേരളത്തിന് 636 കോടി രൂപ കുടിശ്ശികയുണ്ട് . ഈ തുക പെട്ടെന്ന് ലഭ്യമാക്കണം.
16. കണ്ണൂര്അന്താരാഷ്ട്ര വിമാനത്താവളത്തിന്റെ നിര്മാണം പൂര്ത്തിയാവുകയാണ്. അവിടേക്ക് വിദേശ വിമാന കമ്പനികളെ അനുവദിക്കണം.
17.  ദേശീയ ഗ്രാമീണവികസന കുടിവെളള പരിപാടി പൂര്ത്തിയാക്കുന്നതിന് 500 കോടി രൂപ ഒറ്റത്തവണ സഹായമായി അനുവദിക്കണം.
18.അലങ്കാര മത്സ്യ കൃഷിയേയും വില്പനയെയും പ്രദര്ശനത്തെയും ബാധിക്കുന്ന കേന്ദ്ര പരിസ്ഥിതി മന്ത്രാലയത്തിന്റെ വിജ്ഞാപനം മരവിപ്പിക്കണം. ലക്ഷക്കണക്കിനാളുകളുടെ തൊഴില്നഷ്ടപ്പെടുത്തുന്നതാണ് വിജ്ഞാപനം. ഇതു സംബന്ധിച്ച് സംസ്ഥാന ഫിഷറീസ് മന്ത്രിമാരുമായും കേന്ദ്രം ചര്ച്ച നടത്തണം.