Saturday, April 22, 2017

#ദിനസരികള്‍ 10
കേരളത്തിലെ പോലീസ് നീതിനിര്‍വ്വഹണത്തില്‍ നിതാന്ത ജാഗ്രത പുലര്‍ത്തണം എന്ന് നിരന്തരം ഓര്‍മ‌പ്പെടുത്തുന്ന ഒരു സര്‍ക്കാരാണ് ഇപ്പോള്‍ കേരളം ഭരിക്കുന്നത്. ജനപക്ഷത്ത് നില്ക്കുക എന്നതാണ് പോലീസിന്റെ ധര്‍മ്മമെന്നും , കക്ഷിരാഷ്ട്രീയസ്വാധീനങ്ങള്‍ക്ക് വഴങ്ങിക്കൊടുത്തുകൊണ്ട് അര്‍ഹതപ്പെട്ടവര്‍ക്ക് അവകാശ നിഷേധം ഉണ്ടാകരുത് എന്നും മുഖ്യമന്ത്രി ദിവസേനയെന്നവണ്ണം പോലീസ് സേനയെ ഓര്‍മപ്പെടുത്തുന്നുണ്ട്. യാതൊരുവിധത്തിലുമുള്ള ബാഹ്യഇടപെടലുകള്‍ക്കും വഴങ്ങാതിരിക്കുവാനുള്ള പിന്തുണ സര്‍ക്കാര്‍തന്നെ നേരിട്ട് നമ്മുടെ സേനക്ക് നല്കുന്നത് , ഒരു തരത്തിലുമുള്ള നീതിനിഷേധവും പൊതുജനങ്ങള്‍ക്ക് ഉണ്ടാകരുത് എന്ന ജനാധിപത്യബോധം ഉള്‍‌ക്കൊള്ളുന്നതു കൊണ്ടാണ്.പോലീസ് വാഴ്ചയുടെ കിരാതസ്വഭാവം നേരിട്ട് ധാരാളം അറിഞ്ഞിട്ടുള്ള ഒരാളാണ് മുഖ്യമന്ത്രി. ഒറ്റ രാത്രി കൊണ്ട് പോലീസ് സേനയെ ആകെ നവീകരിച്ചു കളയാം എന്ന മിഥ്യാധാരണ മുഖ്യമന്ത്രിയ്ക്കില്ല. അതുകൊണ്ടാണ് സേനയുടെ ചിന്തയും പെരുമാറ്റവും പരിഷ്കരിക്കപ്പെടണം എന്നതിന്റെ അടിസ്ഥാനത്തില്‍ നവീകരണത്തിനുള്ള നിര്‍‌ദ്ദേശങ്ങള്‍ ഉണ്ടാകുന്നത്. അതുകൊണ്ടാണ് മുന്‍മുഖ്യമന്ത്രി ശ്രീ ഉമ്മന്‍ ചാണ്ടി നിയോഗിച്ച ഉദ്യോഗസ്ഥന്മാര്‍ ഇപ്പോഴും അതേ കസേരയില്‍ത്തന്നെ ഇരുന്ന് ഭരിക്കുന്നത്. എന്നാല്‍ ഇപ്പോഴും “കുട്ടന്‍പിള്ള”യുടെ മാനസികാവസ്ഥയില്‍ നിന്നും മോചിതരാകാത്ത ചിലര്‍ പോലീസിലുണ്ട്. അത്തരക്കാരുടെ ഇടപെടലുകള്‍ പൊതുജനങ്ങളുടെ ഇടയില്‍ സേനയുടെ സത്‌പേരിന് കളങ്കമുണ്ടാക്കുന്നു.
ഇത്രയൊക്കെ ജനാധിപത്യബോധത്തോടെ ഇടതുപക്ഷസര്‍ക്കാര്‍ ഇടപെട്ടിട്ടും മാറാത്തവരായി ഐ പി എസ് ഉദ്യോഗസ്ഥന്‍ മുതല്‍ സിവില്‍ പോലീസ് ഓഫീസര്‍ വരെയുണ്ട് എന്നതാണ് വേദനിപ്പിക്കുന്ന സത്യം.എനിക്കു നേരിട്ട് അറിയാവുന്ന രണ്ട് അനുഭവങ്ങള്‍ പറയാം. ഒന്ന് ഒരു സംഘര്‍ഷത്തെത്തുടര്‍ന്ന് സ്വമേധയാ സ്റ്റേഷനില്‍ ഹാജരായ ഞാനടക്കമുള്ളവരോട് പോലീസിലെ ചിലര്‍ പെരുമാറിയ രീതി ഉദാഹരണമാണ്. ഞങ്ങളെ ലോക്കപ്പില്‍ കയറ്റിയിട്ട് മര്‍ദ്ദിക്കാന്‍ ഒരുങ്ങിയവരോട് “ ജനാധിപത്യപരമായി നിങ്ങളുടെ മുമ്പില്‍ കീഴടങ്ങിയ ഞങ്ങളോട് ഇങ്ങനെ പെരുമാറുന്നത് ശരിയല്ല സര്‍ “ എന്നു പറഞ്ഞപ്പോള്‍ “എന്തോന്ന് ജനാധിപത്യമെഡാ “ എന്ന് ആക്രോശിച്ചുകൊണ്ട് പാഞ്ഞുവന്ന പോലീസ് ഓഫീസര്‍ സേനയുടെ ഞെട്ടിപ്പിക്കുന്ന ഒരു മുഖമാണ്. മെഡിക്കലടക്കമുള്ള പരിശോധനകള്‍ കഴിഞ്ഞുവന്നവരോടാണ് ഇങ്ങനെ പെരുമാറിയത് എന്നോര്‍ക്കണം. രണ്ട്. ലോറിത്തൊഴിലാളികള്‍ നടത്തിയ ഒരു സമരത്തെത്തുടര്‍ന്ന് , ഒരു ലോറി തടഞ്ഞ സമരാനുകൂലികളെ പോലീസിന്റെ റിപ്പോര്‍ട്ടിന്റെ അടിസ്ഥാനത്തില്‍ 15 ദിവസമാണ് കോടതി ജയിലിലിട്ടത്. കൊലക്കുറ്റമടക്കമുള്ള വകുപ്പുകളാണ് ഇവര്‍‌ക്കെതിരെ ചേര്‍ക്കപ്പെട്ടത്. ഇന്നലെയാണ് അവര്‍ മോചിതരായത്. കൂടിവന്നാല്‍ ഒരു പെറ്റിക്കേസ്സില്‍ അവസാനിക്കേണ്ട കാര്യം നാലുപേരുടെ 15 ദിവസത്തെ ജയില്‍വാസത്തിന് കാരണമായിട്ടുണ്ടെങ്കില്‍ 307 , 308 പോലുള്ള വകുപ്പുകള്‍ ചേര്‍ക്കുമ്പോള്‍ പോലീസ് കൂടുതല്‍ ജാഗ്രത കാണിക്കണം എന്നുതന്നെയാണ് സൂചിപ്പിക്കുന്നത്. ബോധപൂര്‍വ്വം കെട്ടിച്ചമക്കുന്ന നുണമൊഴികള്‍ക്ക് കൂട്ടുനില്ക്കാതിരിക്കുക എന്ന പ്രാഥമിക കടമ അന്വേഷണം നടത്തിയ പോലീസ് ഉദ്യോഗസ്ഥന്‍ നിര്‍വഹിച്ചിരുന്നുവെങ്കില്‍ ഈ യുവാക്കള്‍ ഇങ്ങനെ പീഢിപ്പിക്കപ്പെടില്ലായിരുന്നു.
അതുകൊണ്ട് സര്‍ക്കാര്‍ നടത്തുന്ന ഇടപെടലുകളുടെ ഗുണവശങ്ങള്‍ അതാതു വകുപ്പുകള്‍ മനസ്സിലാക്കുകയും ഉള്‍‌ക്കൊള്ളുകയും ചെയ്തിട്ടില്ലായെങ്കില്‍ അത് അധിക്ഷേപാര്‍ഹമാണ്, ജനങ്ങളുമായി നിരന്തരം ഇപെടുന്ന പോലീസാകുമ്പോള്‍ പ്രത്യേകിച്ചും. സ്വയം നവീകരിക്കാനുള്ള ഒരവസരമായി മുഖ്യമന്ത്രിയുടെ നിര്‍‌ദ്ദേശങ്ങളെ ഇത്തരക്കാര്‍ കാണണം. കമ്പികേറ്റുന്നവരും ഉരുട്ടിരസിക്കുന്നവരും ഇപ്പോഴും സേനയിലുണ്ട് എന്ന് അറിയാത്തവരല്ലല്ലോ ഭരിക്കുന്നവര്‍ എന്ന തിരിച്ചറിവുണ്ടാകട്ടെ.

Friday, April 21, 2017

#ദിനസരികള്‍ 9
            വീണ്ടും മൂന്നാര്‍ തന്നെ ! പാപ്പാത്തിച്ചോലയില്‍ കൈയ്യേറി സ്പിരിറ്റ് ഇന്‍ ജീസസ് എന്ന വിശ്വാസ സംഘടന സ്ഥാപിച്ച കുരിശ് നീക്കം ചെയ്ത രീതി വ്യാപകമായ വിമര്‍ശനത്തിന് ഇടവരുത്തിയിരിക്കുകയാണ്. പ്രബലമായ ഒരു മതവിഭാഗത്തിന്റെ ആശാകേന്ദ്രമായ ഒരു പ്രതീകത്തോട് തെല്ലു പോലും അനാദരവ് കാണിക്കപ്പെടരുത് എന്ന് ചിന്തിക്കുന്ന ജനാധിപത്യമനസ്സുകളാണ് ആ കുരിശുനീക്കത്തെ അപലപിക്കുന്നത്. എന്നാല്‍ സുമനസ്സുകളായ അത്തരം വിശ്വാസികളേയും നമ്മുടെ ജനാധിപത്യബോധത്തേയും വെല്ലുവിളിച്ചുകൊണ്ട് , അനധികൃതമായി , സര്‍ക്കാര്‍ സ്ഥലത്ത് കുരിശ് വീണ്ടും നാട്ടിയിരിക്കുകയാണ്.ഇത് തെറ്റായ പ്രവണതയും അധിക്ഷേപാര്‍ഹവുമാണ്. ജനകോടികളുടെ ആരാധനക്ക് പാത്രമാവുന്ന ഒരു പ്രതീകം എങ്ങനെയാണ് അനധികൃതമായി അധിനിവേശസ്വഭാവത്തോടെ സ്ഥാപിക്കപ്പെടുക? സത്യത്തിനും നീതിക്കും വേണ്ടി നിലകൊണ്ട് ഒരു മഹദ് ജീവിതത്തെ വ്യക്തമായി ആക്ഷേപിക്കുകയല്ലേ ഇത്തരം പ്രവര്‍ത്തികള്‍ കൊണ്ട് ചെയ്യുന്നത് ? കുരിശിനെ ആക്ഷേപിക്കുവാനും കൈയ്യേറ്റത്തെ സഹായിക്കുവാനുമേ ഇത്തരം നടപടികള്‍‌കൊണ്ട് കഴിയുകയുള്ളു എന്ന് തിരിച്ചറിയാത്തവരാണോ ഈ വിശ്വാസികള്‍ ? എന്തായാലും കുരിശിന്റേയും ബൈബിളിന്റേയും യേശുവിന്റേയും മഹത്വം തിരിച്ചറിയാത്ത കുത്സിതബുദ്ധിക്കാരാണ് അവിടെ വീണ്ടും കുരിശു സ്ഥാപിച്ചത് എന്ന കാര്യത്തില്‍ തര്‍ക്കമില്ല.
            യാക്കോബായ സഭയുടെ നിരണം ഭദ്രാസനാധിപന്‍ ഗീവര്‍ഗീസ് മാര്‍ കൂറിലോസ് എഴുതിയത് ഇത്തരുണത്തില്‍ സ്മരണീയമാണ്. ബൈബിളും കുരിശും എല്ലാം പല കാലത്തും കോളനിവൽക്കരണത്തിനും അധിനിവേശത്തിനുമായി ഉപയോഗിക്കപ്പെട്ടിട്ടുണ്ട്. മറ്റൊരിടത്ത് ഞാൻ എഴുതിയതു പോലെ കുറ വർഷങ്ങൾക്ക് മുൻപ് കേരളത്തിൽ ഒരു സ്ഥലത്ത് തോമാഗ്ലീഹയുടെ കാലത്തെ ഒരു കുരിശ് കണ്ടെത്തി എന്ന് പറഞ്ഞ് കുറെ നേതാക്കൾ പാവപ്പെട്ട വിശ്വാസികളെ സംഘടിപ്പിച്ച് പ്രദേശം വെട്ടിപ്പിടിച്ചു. കൈയ്യേറ്റ തിരക്കിൽ തോമഗ്ലീഹയുടെ കാലത്ത് സിമന്റ് കുരിശ് ഇല്ലായിരുന്നു എന്ന് ചിന്തിക്കാനുള്ള ബുദ്ധി പോലും ഉദിച്ചില്ല. ഈ അധിനിവേശ പാരമ്പര്യത്തിന്റെ ഏറ്റവും സമീപകാല ഉദാഹരണമാണ് മൂന്നാറിലെ കുരിശ് . ആ കുരിശ് ഇന്ന് നീക്കപ്പെട്ടപ്പോൾ ഏറ്റവും സന്തോഷിച്ചത് യേശുക്രിസ്തു തന്നെയായിരിക്കും എന്നാ അദ്ദേഹം എഴുതിയത്. കുരിശിനും കൃസ്തുവിനും വേണ്ടി തന്റെ ജീവിതം തന്നെ ഉഴിഞ്ഞു വെച്ച ഒരാള്‍ ഇങ്ങനെ എഴുതുമ്പോള്‍ അദ്ദേഹം ഉദ്ദേശിക്കുന്നത് എന്താണെന്ന് ശരിക്കും മനസ്സിലാക്കേണ്ടത് കുരിശിനെ പിന്തുടരുന്നവര്‍ തന്നെയല്ലേ ? അതായത് അധിനിവേശത്തിനും കൈയ്യേറ്റത്തിനും പിടിച്ചടക്കിലിനുമൊക്കെയുള്ള സഹായിയും ഉപാധിയുമായി കുരിശിനേയോ അഥവാ മറ്റേതൊരു മതചിഹ്നത്തേയോ ഉപയോഗിക്കരുത് എന്നുതന്നെയല്ലേ ? അങ്ങനെ ഉപയോഗിക്കുമ്പോഴാണ് വിശ്വാസികള്‍ക്ക് അസഹനീയമായ രീതിയില്‍ അത്തരം ബിംബങ്ങളോട് ഇടപെടേണ്ടി വരുന്നത്.

            മതങ്ങള്‍ പറയുന്നതും പഠിപ്പിക്കുന്നതും മനസ്സിലാക്കുന്നില്ലെങ്കില്‍‌പ്പോലും വിശ്വസിക്കുന്ന മതചിഹ്നങ്ങള്‍ അപമാനിക്കപ്പെടാതിരിക്കാനുള്ള സാഹചര്യമുണ്ടാക്കുക എന്ന കാരുണ്യമെങ്കിലും വിശ്വാസികളെന്ന് പറയുന്നവര്‍ കാണിക്കണം. അതുകൊണ്ട് കുരിശു് അധിനിവേശസ്ഥലത്തല്ല , അവനവന് അധികാരമുള്ള സ്ഥലത്തായിരിക്കണം സ്ഥാപിക്കപ്പെടേണ്ടത്.

Thursday, April 20, 2017

#ദിനസരികള്‍ 8
            കേരളമാകെ ആകാംക്ഷയോടെ കാത്തിരുന്ന മൂന്നാര്‍ കൈയ്യേറ്റമൊഴിപ്പിക്കല്‍ വീണ്ടും വിവാദത്തിലേക്ക് കൂപ്പുകുത്തിയിരിക്കുന്നു. കഴിഞ്ഞ തവണ റവന്യു വകുപ്പ് ഭരിക്കുന്ന സിപിഐയുടെ തന്നെ കൈവശമുള്ള പാര്‍ട്ടി ഓഫീസിലേക്ക്  നീണ്ടതോടെയാണ് പൊളിക്കല്‍ നിറുത്തിവെക്കേണ്ടിവന്നതെങ്കില്‍ ഇത്തവണ തുടക്കത്തിലേ തന്നെ ഒരു മതവിഭാഗം സ്ഥാപിച്ച കുരിശു നീക്കിയതോടെയാണ് വിവാദം പൊട്ടിപ്പുറപ്പെടുന്നത്.കുരിശു നീക്കിയ രീതിയോട് മുഖ്യമന്ത്രിയും അമര്‍ഷം രേഖപ്പെടുത്തിയിരിക്കുന്നു.നീക്കേണ്ടതായിരുന്നുവെങ്കില്‍ അതൊരു ചര്‍ച്ചയിലൂടെ ആകാമായിരുന്നു എന്നും അങ്ങനെ അനധികൃതമായി സ്ഥാപിച്ച കുരിശടികള്‍ മാറ്റിയ ചരിത്രം കേരളത്തിനുണ്ട് എന്നും അദ്ദേഹം പറയുമ്പോള്‍ അത് മുഖവിലക്കെടുക്കേണ്ടതുതന്നെയാണ്. എന്നാല്‍ കൈയ്യേറ്റം ഒഴിപ്പിക്കലിനെതിരെ ബോധപൂര്‍വ്വം ഒരു അട്ടിമറി സംഘടിപ്പിക്കപ്പെടുമ്പോള്‍ ഈ സമവായത്തിന്റെ പാത സ്വീകരിക്കുന്നതിന് പകരം സംഘര്‍ഷം ഉണ്ടാക്കുകയല്ലേ കൈയ്യേറ്റക്കാര്‍ക്കും അവരെ സഹായിക്കുന്നവര്‍ക്കും അഭികാമ്യമായിട്ടുള്ളത് ? അതുതന്നെയാണ് അവിടെ സംഭവിച്ചിട്ടുള്ളതും. പ്രത്യേകിച്ച് മതവിഭാഗത്തിനെ തിരെയുള്ള നീക്കമാവുമ്പോള്‍ വൈകാരികത കൂടും എന്ന് തിരിച്ചറിയാത്തവരല്ലല്ലോ ഒഴിപ്പിക്കലിന് നേതൃത്വം കൊടുക്കുന്നവര്‍ .  മറ്റൊരുപാടു കൈയ്യേറ്റങ്ങളുണ്ടെങ്കിലും നേരെ കുരിശിലേക്ക് ചെന്നു കയറിയതിന്റെ പിന്നിലെ ചേതോവികാരം എന്താണെന്ന് ബോധമുള്ളവര്‍ ചിന്തിക്കുക. അപ്പോള്‍ ഒഴിപ്പിക്കല്‍ നാടകത്തിന് നേതൃത്വം കൊടുക്കുന്നവര്‍ക്ക് ഒരൊറ്റ ലക്ഷ്യമേയുള്ളു .അത് ഏതുവിധത്തിലെങ്കിലും ഒഴിപ്പിക്കല്‍ അട്ടിമറിച്ച് നിറുത്തിവെപ്പിക്കുക എന്നതാണ്. കുരിശു പൊളിക്കാന്‍ പോയതിലൂടെ കൈയ്യേറ്റ മാഫിയയും റവന്യു വകുപ്പും ഒത്തുകളിച്ച ഈ ഒഴിപ്പിക്കല്‍ നാടകത്തിന് അവസാനമായി എന്നുതന്നെയാണ് മനസ്സിലാകുന്നത്.
            കേരളത്തിലെ ജനങ്ങളെ ഒഴിപ്പിക്കലിന്റെ പേരില്‍ ചിലര്‍ വിഡ്ഢികളാക്കാന്‍ ശ്രമിക്കുന്നത് ആശാസ്യമല്ല. ഒഴിപ്പിക്കലിന് നേതൃത്വം നല്കുമ്പോള്‍ ചിലര്‍ അതിനെ പരാജയപ്പെടുത്താന്‍ ശ്രമിക്കുന്നു എന്നൊക്കെയായിരുന്നല്ലോ ആക്ഷേപം. മൂന്നാറിനെ രക്ഷിക്കാന്‍ വന്ന അവതാരമായിട്ടാണ് ഒഴിപ്പിക്കല്‍ ദൈവങ്ങളെ നമ്മുടെ മാധ്യമങ്ങള്‍ പാടിപ്പുകഴ്ത്തിയിരുന്നത്. കുടിയേറ്റത്തെ കൈയ്യേറ്റമായിക്കാണുന്ന പ്രവണതയെ മാത്രമാണ് എതിര്‍ത്തിട്ടുണ്ടെങ്കില്‍ത്തന്നെ എതിര്‍ത്തത് എന്ന് കാണാന്‍ നമുക്ക് സാധിക്കും. കുടിയേറ്റക്കാരുടെ ജീവിക്കാനുള്ള അവകാശത്തിന് വേണ്ടി ശബ്ദിച്ചവരെ കൈയ്യേറ്റക്കാര്‍ക്ക് ചൂട്ടുപിടിക്കുന്നവരാ യിട്ടാണ് മാധ്യമക്കാര്‍ ചിത്രീകരിച്ചത്. അന്ന് മാധ്യമക്കാരുടെ തണലില്‍ നിന്ന് ഇളവേറ്റവര്‍ ഇന്ന് തന്ത്രപൂര്‍വ്വം കൈയ്യേറ്റങ്ങളെ നീക്കാനുള്ള നടപടികളെ അട്ടിമറിച്ച് ഊറിച്ചിരിക്കുന്നു.
            ഏപ്രില്‍ മുപ്പതിനകം പ്രദേശത്ത് അര്‍ഹതപ്പെട്ടവര്‍ക്ക് പട്ടയം നല്കാനാണ് സര്‍ക്കാര്‍ തീരുമാനിച്ചിരിക്കുന്നത്.അതിനുശേഷം കൈയ്യേറ്റക്കാര്‍ ആരൊക്കെയാണ് എന്ന് സുവ്യക്തമാകും. അനധികൃതമായി ഭൂമി കൈവശം വെച്ചിരിക്കുന്നവര്‍‌ക്കെതിരെ നടപടി എടുക്കുക തന്നെ ചെയ്യുമെന്ന് മുഖ്യമന്ത്രി കേരളത്തിന് ഉറപ്പു നല്കുന്നു.
            ഇങ്ങനെ , നിയമപരവും മനുഷ്യത്വപരവുമായല്ലാതെ മുഖം രക്ഷിക്കാനും പുതിയ ഇമേജ് സൃഷ്ടിച്ചെടുക്കാനുമുളള വ്യഗ്രതയില്‍ ചാടിപ്പുറപ്പെട്ടാല്‍ മൂന്നാറിലെ കൈയ്യേറ്റങ്ങള്‍ കൈയ്യേറ്റമായിത്തന്നെ അവശേഷിക്കും എന്നാണ് റവന്യുവകുപ്പും ബന്ധപ്പെട്ട നേതൃത്വവും മനസ്സിലാക്കേണ്ടത്.


            

Wednesday, April 19, 2017

#ദിനസരികള്‍ 7

ബീവറേജസ് കോര്‍പ്പറേഷന്റെ മാനന്തവാടിയിലെ വിദേശമദ്യവില്പനശാല അടച്ചു പൂട്ടണമെന്നാവശ്യപ്പെട്ട ചില ആളുകള്‍ നടത്തുന്ന സമരം തുടങ്ങിയിട്ട് ഏകദേശം ഒന്നര വര്‍ഷത്തോളമായിരിക്കുന്നു. ഇപ്പോള്‍ ഔട്ട്‌ലറ്റിന്റെ മുന്നില്‍ നടത്തിയിരുന്ന സമരം, ഇതുവരെ തീരുമാനമൊന്നുമാകാത്ത സ്ഥിതിക്ക് മാനന്തവാടി സബ്കളക്ടറുടെ ഓഫീസിന് മുന്നിലേക്ക് മാറ്റിയിരിക്കുന്നു. എന്തുകൊണ്ടാണ് ഈ സമരത്തിന് പൊതുസമൂഹത്തിന്റെ പിന്തുണ നേടിയെടുക്കാന്‍ കഴിയാതെ പോയതെന്ന് ഈ ഘട്ടത്തിലെങ്കിലും നാം ചിന്തിക്കേണ്ടതുണ്ട്
യു ഡി എഫിന്റെ നേതൃത്വത്തില്‍ ശ്രീ ഉമ്മന്‍ ചാണ്ടി മുഖ്യമന്ത്രിയായിരുന്ന കാലത്ത് തുടങ്ങിയ സമരം ഒന്നോ രണ്ടോ വ്യക്തികളുടെ മാത്രം താല്പര്യങ്ങള്‍ മുന്‍ നിര്‍ത്തിയാണെന്ന ധാരണ പൊതുസമൂഹത്തില്‍ രൂഢമൂലമായിട്ടുണ്ട്. പില്ക്കാലത്ത് അവര്‍ തന്ത്രപരമായി മുന്‍നിരയില്‍ നിന്ന് മാറുകയും പാവപ്പെട്ട ആദിവാസി അമ്മമാരെ - അതും രണ്ടോ മൂന്നോ ആളുകളെ മാത്രം – സമരം ഏല്പിച്ചുകൊടുക്കുകയും ചെയ്തു. ഈ ആദിവാസി അമ്മാരുടെ പേരില്‍ പോലും ആക്ഷേപമുയര്‍ന്നിട്ടുണ്ട്. ഇവരില്‍പെട്ട ആളുകള്‍ മദ്യപിച്ച് മാനന്തവാടി അങ്ങാടിയില്‍ പരസ്യമായി നടന്നതും സമരത്തിന് കൂലി കൊടുക്കുന്നതെന്ന് പറയപ്പെടുന്ന ഒരു ഫോട്ടോയുടെ പ്രചാരണവുമൊക്കെ അവരുടെ വിശ്വാസ്യതയെ ഇടിച്ചു താഴ്ത്തിയിട്ടുണ്ട്.അതോടൊപ്പം തന്നെ കര്‍ണാടകയിലും കേരളത്തിലുമുള്ള സ്വകാര്യബാറുകളുടെ “സഹായവും “ സമരത്തിന് ലഭിക്കുന്നു എന്നൊരാക്ഷേപം നിലനില്ക്കുന്നുണ്ട്.
ചില ആളുകള്‍ക്ക് നേതാവാകാനും പത്രസമ്മേളനങ്ങള്‍ക്ക് മുന്‍നിരയില്‍ നില്ക്കാനുമായി ആദിവാസി സമൂഹത്തെ ഉപയോഗിക്കുന്നു എന്ന ആക്ഷേപത്തിന് സമരത്തോളം തന്നെ പഴക്കമുണ്ട്. മുഖ്യധാരാ രാഷ്ടീയപാര്‍ട്ടികളടക്കമുളള പൊതു സമൂഹത്തിന്റെ സവിശേഷപരിഗണന എന്തുകൊണ്ടാണ് തങ്ങള്‍ക്ക് ലഭിക്കാത്തതെന്ന് സമരക്കാര്‍ സത്യസന്ധമായി വിലയിരുത്തണം. പൊതു സമൂഹത്തിന്റെ വിശ്വാസ്യതയും അനുഭാവവും നേടിയെടുക്കാന്‍ കഴിയുന്നില്ലെങ്കില്‍ കേവലമായ പിടിവാശി കാരണം സമരം വലിച്ചു നീട്ടി കൊണ്ടുപോകുന്നത് ജനാധിപത്യപരമല്ല എന്ന തിരിച്ചറിവ് സമരക്കാര്‍ക്ക് ഉണ്ടാകണം. എന്നാല്‍ സമരത്തിന്റെ ഗുണവശങ്ങള്‍ ബോധ്യപ്പെടുത്തി ജനങ്ങളെ തങ്ങളുടെ കൂട്ടത്തില്‍ നിറുത്താന്‍ കഴിയുമെന്ന ഉറച്ച ധാരണയുണ്ടെങ്കില്‍ ജനങ്ങളിലേക്ക് ഇറങ്ങിച്ചെന്ന് സമരത്തിന്റെ ജനകീയാടിത്തറ വര്‍ദ്ധിപ്പിക്കാനാവശ്യമായ നടപടികള്‍ സ്വീകരിക്കണം.
തെറ്റായ ആവശ്യങ്ങള്‍ക്കുവേണ്ടി ഒരു ജനവിഭാഗത്തെ ഉപയോഗപ്പെടുത്തി പരാജയപ്പെട്ട സമരം നടത്തിയതിന് ഉദാഹരണമായി നാളത്തെ ചരിത്രകാരന്മാര്‍ ഈ സമരത്തെ രേഖപ്പെടുത്താന്‍ ഇടവരരുത് എന്ന ഒരൊറ്റ അഭ്യര്‍ത്ഥന മാത്രമേ ഈ എഴുതുന്നവന് മുന്നോട്ടു വെക്കുവാനുള്ളു. 
ഈ കേന്ദ്രം പൂട്ടിക്കഴിഞ്ഞാല്‍ കര്‍ണാടകയിലെ ബാവലിയിലേക്കും കുട്ടത്തേക്കുമുള്ള ജനങ്ങളുടെ ഒഴുക്ക് തടയാന്‍ നമുക്കു മുന്നില്‍ ഒരു വഴിയുമില്ല. ഇപ്പോള്‍ മദ്യപിക്കുന്നുവെങ്കിലും ആളുകള്‍ വീട്ടില്‍ എത്തുന്നുണ്ട്. കര്‍ണാടകയിലേക്കാണ് പോകുന്നതെങ്കില്‍ വീട്ടിലെത്തുക എന്നുള്ളത് കുറയും എന്നു മാത്രമല്ല കുടിച്ച് വഴിവക്കില്‍ കിടന്ന് വന്യമൃഗങ്ങളാല്‍ കൊല്ലപ്പെടലുള്‍‌പ്പെടെ സാമൂഹികമായുണ്ടാകുന്ന അനുബന്ധവിഷയങ്ങള്‍ എത്രയെങ്കിലുമുണ്ടെങ്കിലും ഓരോന്നായി ഊന്നിപ്പറയാനുദ്ദേശിക്കുന്നില്ല. ആയതിനാല്‍ മദ്യനിരോധനം എന്നുള്ളത് ഒരു ഫാഷനായി ഉന്നയിക്കാനുള്ള വിഷയമല്ല. നിരോധനത്തിന് മുമ്പ് മദ്യോപയോഗമുണ്ടാക്കുന്ന കെടുതികളെക്കുറിച്ചും സാമ്പത്തിക നഷ്ടത്തെക്കുറിച്ചു മൊക്കെ ജനങ്ങളെ നന്നായി ബോധവത്കരിക്കേണ്ടിയിരിക്കുന്നു. അത്തരം ബോധവല്‍ക്കരണത്തിലൂടെ ഉണ്ടാക്കിവരുന്ന ഒരു അന്തരീക്ഷത്തിന്റെ സഹായത്തോടെ വേണം നിരോധനം നടപ്പാക്കാന്‍ . സി ആര്‍ നീലകണ്ഠന്‍ ഒരു ദിവസം പിച്ച തെണ്ടിയാല്‍ ഉണ്ടാക്കിയെടുക്കാവുന്നതാണ് ആ ബോധം എന്ന് ധരിച്ചുവശായിരിക്കുന്നവര്‍ക്ക് നല്ല നമസ്കാരം !

Tuesday, April 18, 2017

#ദിനസരികള്‍ 6
ആകാശത്തേക്ക് ഒരു കല്ലെടുത്തെറിഞ്ഞാല്‍ അത് വന്നു വീഴുന്നത് ഏതെങ്കിലും ഒരു കവിയുടെ തലയിലായിരിക്കും. അത്രമാത്രം കവികളുടെ ബാഹുല്യമുണ്ട് ഇന്ന് നമ്മുടെ പൊതുസമൂഹത്തില്‍.അത് നല്ലതുതുന്നെ. വാക്കുകള്‍ കൂട്ടിച്ചൊല്ലാന്‍ വയ്യാത്ത കിടാങ്ങള്‍‍പോലും കവിയശ:പ്രാര്‍ത്ഥികളായി അരങ്ങത്ത് വന്നു കേറുമ്പോള്‍ നാം ജീവിച്ചു പോരുന്ന ഇന്നത്തെ സമൂഹം നേടിയെടുത്തിരിക്കുന്ന സാംസ്കാരികമായ ഉന്നതിയെ മനസ്സാ വാഴ്ത്തിപ്പാടേണ്ടതല്ലേ? ഹൃദയം ചീന്തിയെടുത്ത ചോരയിലാണ് കവിത എഴുതുന്നത് എന്നൊക്കെ പണ്ടത്തെ എഴുത്തുകാര്‍ പറയുന്നത് വെറുതെയാണ്. എവിടുന്നെങ്കിലും കീറിയെടുത്ത ഒരു കഷണം പേപ്പറോ മറ്റോ മതി കവിത എഴുതാന്‍ എന്നു വന്നാല്‍ അതില്‍ അഭിമാനിക്കുന്നതല്ലേ ഉചിതം?
ആവട്ടെ ആവട്ടെ ! കവിതയുടെ കൈവഴികളെക്കുറിച്ചും അതിന്റെ ഒഴുക്കുകളെക്കുറിച്ചുമൊക്കെ വിധി പറയാന്‍ നാമാര് ? ആസ്വദിക്കുക എന്നതു മാത്രമാണ് നമ്മുടെ കടമ എന്നിരിക്കേ പ്രത്യേകിച്ചും ? എന്തായാലും കാലികരായ പല കവികളുടേയും കൃതികളെ വായിക്കുമ്പോള്‍ നാവിന്‍തുമ്പില്‍ വെണ്‍മണി മഹന്റെ “ എന്നേ വിസ്മയ !മേതുമില്ല കവിതാ സാമര്‍ത്ഥ്യ ; മെന്നാല്‍ ഭവാ
നിന്നേറെക്കഷണിച്ചിവണ്ണമുളവാക്കീട്ടെന്തു സാദ്ധ്യം സഖേ
മുന്നേ ഗര്‍ഭിണിയായ നാള്‍ മുദിതയായ് മാതാവു നേര്‍ന്നിട്ടുമു –
ണ്ടെന്നോ താന്‍ കവിയായ് ജനങ്ങളെ വലച്ചീടേണമെന്നിങ്ങനെ “ എന്ന ശ്ലോകം തത്തിക്കളിക്കുന്നു എന്ന കാര്യം വസ്തുതതയാണ്. കൂട്ടത്തില്‍ എന്തെഴുതണം എങ്ങനെയെഴുതണം എപ്പോള്‍ എഴുതണം എന്നൊക്കെയുള്ള സ്വാതന്ത്ര്യം കവിക്കുതന്നെയാണ് അതില്‍ ഇടപെടുകയോ കൈ കടത്തുകയോ ചെയ്യരുത് എന്ന കാര്യത്തില്‍ എനിക്കൊട്ടും സംശയമില്ലെന്ന് അസന്നിഗ്ദമായിത്തന്നെ രേഖപ്പെടുത്തട്ടെ.
പക്ഷേ ഒരഭിപ്രായത്തിന് ഇടം തരണം. മുന്‍ഗാമികള്‍ ഇവിടെ ചെയ്തു വെച്ചിരിക്കുന്നത് എന്താണെന്ന് ഒന്നു വായിച്ചു നോക്കുകയെങ്കിലും വേണമെന്ന് ഈ കവിയശപ്രാര്‍ത്ഥികളോട് അര്‍ത്ഥിക്കാനുള്ള അവസരമാണത്.പഴയ ഖണ്ഡകാവ്യ പാരമ്പര്യത്തിലേക്കോ , ശാര്‍ദ്ദൂലവിക്രീഡിതത്തിന്റെ മലയിടുക്കുകളിലേക്കോ നാം ചെന്നു കയറണം എന്നല്ല , മറിച്ച് മുന്‍കാലപ്രഭൃതികള്‍ ഇവിടെ നിര്‍മിച്ചു വെച്ചിരിക്കുന്ന സൌധങ്ങളെക്കുറിച്ച് ഒരു വിഹഗവീക്ഷണമെങ്കിലും ഉണ്ടാകുന്നത് നല്ലതാണ് എന്നാണ്. എങ്കില്‍ മാത്രമേ ,
“ നിരത്തില്‍ കാക്ക കൊത്തുന്നു ചത്തപെണ്ണിന്റെ കണ്ണുകള്‍
മുല ചപ്പി വലിക്കുന്നു നരവര്‍ഗ്ഗ നവാതിഥി “ എന്ന സര്‍വ്വ കാലത്തേയും കാഴ്ച ഇവിടെ നേരത്തെ അവതരിപ്പിക്കപ്പെട്ടിരിക്കുന്നു എന്ന ബോധം നമുക്ക് വന്നുകൂടുകയുള്ളു. എങ്കില്‍ മാത്രമേ “നാലണക്കൊരു നല്ല കുഞ്ഞിനെ നാണി വിറ്റതാണിന്നലെ
ആറണക്കിനി നിന്റെ കുഞ്ഞിനെ ആരു വാങ്ങുമീച്ചന്തയില്‍ “ എന്ന് ഇവിടെ പാടിപ്പോയതാണെന്ന് മനസ്സിലാകൂ എങ്കില്‍ മാത്രമേ “സ്വത്വം പോയോര്‍ ചിരിക്കുമ്പോള്‍ ഭയംതാനല്ലി തോന്നുക “ എന്ന് എന്ന പ്രഖ്യാപനം ഇനിയും ആവര്‍ത്തിക്കേണ്ടതില്ല എന്ന് തിരിച്ചറിവുണ്ടാകൂ.
എഴുത്തച്ഛന്‍ മുതലിങ്ങോട്ടുള്ള പൂര്‍വ്വസൂരികളായ കവികളെ വായിക്കണോ വേണ്ടയോ എന്നതൊക്കെ ഞങ്ങളുടെ ഇഷ്ടം എന്ന വാദം കൃത്യം വ്യക്തവുമാണ്. പക്ഷേ എഴുതി , മാധ്യമങ്ങളില്‍ പ്രസിദ്ധീകരിക്കുന്നത് വായിക്കപ്പെടണമെന്ന ആഗ്രഹത്തോടെയായിരിക്കുമല്ലോ എന്ന ഒരു മറുചോദ്യത്തിനും സാധ്യതയുണ്ട്. അത്രമാത്രം.

Monday, April 17, 2017

#ദിനസരികള്‍ 5
        
         മാധ്യമം ആഴ്ചപ്പതിപ്പില്‍ ആനന്ദ് പട്‌വര്‍ധന്‍ , കൌണ്ടര്‍കറന്‍റ്സില്‍ വിദ്യാഭൂഷന്‍ റാവത്തുമായി നടത്തിയ അഭിമുഖത്തിന്റെ മലയാള പരിഭാഷ പ്രസിദ്ധീകരിച്ചിരിക്കുന്നു. സൂക്ഷ്മവും ബഹുതലസ്പര്‍ശിയായ വിമര്‍ശനങ്ങളും കൊണ്ട് സമ്പന്നമാണ് ഈ അഭിമുഖം. ഉദാഹരണത്തിന് സുഭാഷ് ചന്ദ്ര ബോസിനെക്കുറിച്ച് ഹിറ്റ്ലറും ഹീരോഹിതോയുമായുള്ള അദ്ദേഹത്തിന്റെ ബന്ധത്തെ എനിക്ക് ദഹിക്കില്ല.അത്രയും വിലകൊടുത്ത് സ്വാതന്ത്ര്യം നേടിയെടുക്കാനാവില്ലഎന്നും വിവേകാനന്ദനെക്കുറിച്ച് വളരെയധികം വിമര്‍ശിക്കപ്പെടേണ്ടതരം പൌരുഷസങ്കല്പമാണ് അദ്ദേഹം മുന്നോട്ട് വെച്ചത്. അകമേ ജാതിചിന്ത രൂഢമൂലമായിരുന്ന ഒരു വ്യക്തിയായിരുന്നു അദ്ദേഹമെന്നുമുള്ള പട്‍വര്‍ധന്റെ നിരീക്ഷണങ്ങള്‍ ശ്രദ്ധിക്കുക. രേഖീയമായ നമ്മുടെ ധാരണകളെ കീഴ്മേല്‍ മറിച്ച് നവമായ ഒരു ചരിത്രബോധം ഉണ്ടാക്കിയെടുക്കുവാനുള്ള ശ്രമം ഈ അഭിമുഖത്തില്‍ നമുക്ക് കണ്ടെത്താനാകും.ആറെസ്സെസ്സിന്റേയും മറ്റു സംഘപരിവാരസംഘടനയുടേയും അണികളെത്തന്നെ അമ്പരപ്പിച്ചുകൊണ്ട് നരേന്ദ്രമോഡിയും അമിത് ഷായും നടത്തിയ നോട്ടുനിരോധനം പ്രത്യക്ഷത്തില്‍ അവതരിപ്പിക്കപ്പെട്ടത് കള്ളപ്പണക്കാര്‍‌ക്കെതിരെയുള്ള നടപടി എന്ന തരത്തിലാണ്. കള്ളപ്പണം ബാങ്കില്‍ തിരിച്ചെത്തുകയും എല്ലാം വെള്ളപ്പണമായി മാറുകയും ആയിരക്കണക്കിന് മനുഷ്യര്‍ക്ക് തൊഴില്‍ നഷ്ടപ്പെടുകയും ചെയ്തിട്ടും മോഡിയും അനുയായികളും കള്ളപ്പണത്തിനെതിരെയുള്ള നടപടി എന്ന വാദത്തില്‍ത്തന്നെ ഉറച്ചുനിന്നു. നോട്ടു നിരോധനം മോദി ചെയ്ത ഒരു വങ്കത്തമായി വിലയിരുത്തപ്പെടും എന്ന് പട്‍‌വര്‍ധന്‍ നിരീക്ഷിക്കുന്നു.
            മതജാതി വര്‍ഗീയ തല്പര്യങ്ങളെ താലോലിക്കുന്ന സമകാലിക ഇന്ത്യന്‍ ഭരണാധികാരികളേയും അവരുടെ സ്തുതിപാഠകരേയും ഈ അഭിമുഖം തുറന്നു കാട്ടുന്നു.അഭിനന്ദനീയമായ ഈ നിലപാടുകള്‍ക്ക് നാം നന്ദിയുള്ളവരാകുകയും സ്വന്തം കാഴ്ചപ്പാടുകളെ നവീകരിക്കുവാന്‍ ശ്രമിക്കുകയും ചെയ്യേണ്ടതാണെന്ന് പട്‌വര്‍ധന്‍ ഉദ്‌ബോധിപ്പിക്കുന്നു. അതേ സമയംതന്നെ ഇടതുപക്ഷത്തെക്കുറിച്ചും ദളിതു സംഘടനകളെക്കുറിച്ചും അദ്ദേഹത്തിന് ആക്ഷേപങ്ങളുണ്ട്. സ്വന്തം പരിസരത്തുനിന്ന് ജാതീയതയെ എങ്ങനെ തകര്‍ക്കാമെന്നതില്‍ ഇപ്പോഴും വ്യക്തത വന്നിട്ടില്ലാത്ത ഇടതുപക്ഷവും ഏകമുഖമായ സ്വത്വവാദത്തിന്റെ ഇരകളാകുന്ന ദലിതു സംഘങ്ങളെക്കുറിച്ചും അദ്ദേഹം ഊന്നിപ്പറയുന്നുണ്ട്. ഇടതുപക്ഷവും ദലിതുകളും സ്വഭാവികസഖ്യമാണെന്നും ഈ സഖ്യത്തിലേക്ക് പുരോഗമനോന്മുഖരായ ഗാന്ധിയന്മാര്‍കൂടി ചേരണം എന്നുമാണ് തന്റെ ആഗ്രഹമെന്നും അദ്ദേഹം കൂട്ടിച്ചേര്‍ക്കുന്നു
            എന്തായാലും വര്‍ദ്ധിച്ചു വരുന്ന സംഘപരിവാരശക്തികളുടെ കുടില നീക്കങ്ങളെ എതിരിട്ട് പരാജയപ്പെടുത്തണമെങ്കില്‍ ഇന്ത്യയിലെ ഇടതുപക്ഷം കൂടുതല്‍ സജീവമായും സത്യസന്ധമായും ജാതീയതയെ നിര്‍വചിക്കുകയും ഇടപെടലുകളുടെ പുതിയ സാധ്യതകളെക്കുറിച്ച് ആരായുകയും വേണമെന്ന് ഈ അഭിമുഖം വ്യക്തമാക്കുന്നു.


#ദിനസരികള് 4
ഹിരണ്യായ നമ എന്ന് മാത്രം ജപിക്കുവാനും മറ്റെല്ലാ ഈശ്വരസങ്കല്പങ്ങളേയും മറന്നു കളയാനും കല്പിച്ച ഹിരണ്യകശിപുവിനെ വധിക്കാന്‍ സാക്ഷാല്‍ മഹാവിഷ്ണുവിന് നരസിംഹമായി അവതരിക്കേണ്ടി വന്നു. അഹങ്കാരത്തിന്റേയും അല്പത്തത്തിന്റേയും ആള്‍രൂപമായിരുന്ന തനിക്കുവേണ്ടി ആരാധനാലയങ്ങളുണ്ടാക്കുകയും അവിടെ പ്രാര്‍ത്ഥിക്കാന്‍ ഭക്തന്മാരെ സൃഷ്ടിക്കുകയും ചെയ്ത ഹിരണ്യകശിപു, കൃതയുഗത്തിലെ നാലാമാത്തെ അവതാരത്തിന് നിമിത്തമായി. വിഷ്ണുഭക്തനായ തന്റെ സ്വന്തം പുത്രന്‍ പ്രഹ്ലാദന്റെ പ്രാര്‍ത്ഥനയാണ് വരസിദ്ധിയാല്‍ അജയ്യനെന്ന് അഹങ്കരിച്ച ഹിരണ്യ കശിപുവിന്റെ ആയുസ്സെടുക്കാന്‍ കാരണമായത്.ഹിരണ്യായ നമ എന്ന പ്രാര്‍ത്ഥനയൊഴിച്ച് മറ്റെല്ലാ പ്രാര്‍ത്ഥനകളേയും നിരോധിച്ച് തനിക്ക് വരസിദ്ധി അനുവദിച്ച ദേവതകളെപ്പോലും വെല്ലുവിളിച്ച ഹിരണ്യന് പക്ഷേ മഹാവിഷ്ണുവിന്റെ മുമ്പില്‍ പിടിച്ചു നില്ക്കാനായില്ല. എത്ര വലിയ വരബലം അനുവദിച്ചു കിട്ടിയായാലും അത് അനുവദിച്ചവര്‍ക്ക് അതിനുമപ്പറുത്ത് ബലമുണ്ടെന്ന് ഹിരണ്യകശിപു മറന്നു. ആ മറവിക്ക് സ്വന്തം ജീവിതം തന്നെയാണ് പകരം കൊടുക്കേണ്ടി വന്നത്.
ഇതാ ഇപ്പോള്‍ ഈ കലിയുഗത്തില്‍ മറ്റൊരു ഹിരണ്യ കശിപു പിറന്നിരിക്കുന്നു. യുപിയുടെ മുഖ്യമന്ത്രി യോഗി ആദിത്യനാഥ്. അദ്ദേഹം രൂപീകരിച്ച യുവവാഹിനി എന്ന സംഘടനയാണ് യോഗി യോഗി എന്ന് എന്ന് ജപിക്കുന്നവര്‍ മാത്രം യു പിയില്‍ ജീവിച്ചാല്‍ മതിയെന്ന് പ്രഖ്യാപിച്ചിരിക്കുന്നത്. യുപിയുടെ വിവിധ പ്രദേശങ്ങളല്‍ ഇക്കാര്യമുന്നയിച്ചുകൊണ്ട് പ്രചരണബോര്‍ഡുകള്‍ സ്ഥാപിച്ചു കഴിഞ്ഞിരിക്കുന്നു. ഇതര വിശ്വാസികളോടും പ്രവര്‍ത്തകരോടും കാണിക്കുന്ന ഈ അസഹിഷ്ണുതയും അധികാരത്തിന്റെ ബലമുപയോഗിച്ചു കൊണ്ടുള്ള അടിച്ചമര്‍ത്തല്‍ ഭരണവും തന്നെയാണ് കൃതയുഗത്തിലെ വിഷ്ണുവിരോധിയായ ഹിരണ്യ കശിപുവിന്റേയും മുഖമുദ്രയായിരുന്നത്.
ശിഷ്ടജനപാലനത്തിനും ദുഷ്ടനിഗ്രഹത്തിനുമായി ഭഗവാന്‍ വിഷ്ണു കൃതയുഗത്തില്‍ അവതരിച്ചു എന്നത് പുരാണപ്രസിദ്ധമായ കഥയാണ്. എന്നാല്‍ ഇത് കലിയുഗമാണ് . ഈ ജനാധിപത്യകാലത്ത് ഇത്തരം ഹിരണ്യകശിപുമാരില്‍ നിന്ന് ജനങ്ങളെ രക്ഷിക്കുവാന്‍ നാം അവതാരങ്ങളെയല്ല പ്രതീക്ഷിക്കേണ്ടത്. പ്രതികരണശേഷിയും ജനാധിപത്യബോധവുമുള്ള ജനതയാണ് പ്രതികരിക്കേണ്ടത്. നാനാജാതി മതസ്ഥര്‍ ഇടപഴകി സഹവര്‍ത്തിത്വത്തോടെ പുലര്‍ന്നു പോന്നിരുന്ന ഇന്ത്യുയുടെ വര്‍ഗ്ഗീയേതര മുഖങ്ങളെ വീണ്ടെടുക്കാനുള്ള പരിശ്രമങ്ങള്‍ നാം അവസാനിപ്പിച്ചുകൂട.
സഹനാവവതു സഹനൌ ഭുനക്തു
സഹവീര്യം കരവാവഹൈ
തേജസ്വീ നാവതീതമസ്തു
മാ വിദ്വിഷാവഹൈ എന്ന ശാന്തി മന്ത്രം ഒഴുകിവന്ന അതീതകാലങ്ങളുടെ സര്‍വ്വാശ്ലേഷിയായ സമത്വസ്വപ്നങ്ങളെ തെറ്റായി വ്യാഖ്യാനിച്ചും വര്‍ഗീയവല്‍ക്കരിച്ചും സിംഹാസനങ്ങളിലേക്ക് ചുവടുവെച്ചു കയറിയ ഹിരണ്യകശിപുമാരെ , അതേ ആശയസംഹിതകളുടെ ജനാധിപത്യബോധമുപ യോഗിച്ചു കൊണ്ട് നേരിടുകയും അവര്‍ അരുളിമരുവുന്ന സിംഹാസനങ്ങളെ ഇളക്കിയെറിയുകയും ചെയ്യുന്ന ഒരു നവയുഗകൂട്ടായ്മക്ക് ഇനിയും അമാന്തമരുത്.
#ദിനസരികള്‍ 3
ക്യൂബന്‍ പ്രതിസന്ധിയുടെ കാലത്ത് ഒരു വയോവൃദ്ധന്‍ ലോകശക്തികളുടെയിടയില്‍ നനുത്തതെങ്കിലും ഉറച്ച ശബ്ദത്തില്‍ ഇനിയുമൊരു യുദ്ധം അരുത് അരുത് എന്ന് ആവര്‍ത്തിച്ചു കൊണ്ടിരുന്നത് നാം കേട്ടു. മനുഷ്യവര്‍ഗ്ഗത്തിനെ മുച്ചൂടും മുടിക്കുമായിരുന്ന ഒരു യുദ്ധത്തില്‍ നിന്ന് സോവിയറ്റ് യൂണിയനേയും അമേരിക്കയേയും പിന്തിരിപ്പിക്കാന്‍ ബര്‍ട്രന്‍ഡ് റസ്സല്‍ എന്ന , അപ്പോഴേക്കും തൊണ്ണൂറു കഴിഞ്ഞിരുന്ന ആ വൃദ്ധന്റെ ഇടപെടലുകള്‍ നിര്‍ണായകമായിരുന്നു.ക്രുഷ്‌ചേവിനോടും കെന്നഡിയോടും നിരന്തരം ബന്ധപ്പെട്ട റസ്സല്‍ അധികാരപ്രമത്തതയോട് സന്ധിയില്ലാത്ത സമരം ചെയ്തു. അമേരിക്കന്‍ പ്രസിഡന്റിന് അയച്ച ടെലിഗ്രാമില്‍ ഈ യുദ്ധനീക്കം ഭ്രാന്താണെന്ന് വിളിച്ചു പറയാന്‍ - അതും അമേരിക്കയുടെ പ്രസിഡന്റിനോട് - ആരാണ് ധൈര്യം കാണിക്കുക? എന്നു മാത്രവുമല്ല , ഈ യുദ്ധത്തെ ശക്തമായി അപലപിക്കാനും അധികാരികളുടെ ഭ്രാന്തന്‍ നീക്കങ്ങള്‍‍ക്കെതിരെ ലോകത്തിന് വേണ്ടി തെരുവിറങ്ങാനും റസ്സല്‍ ഉദ്‌ബോധിപ്പിച്ചു. ഐക്യരാഷ്ടസഭയുടെ സെക്രട്ടറി ജനറല്‍ ഊതാണ്ടിന് അയച്ച കത്തില്‍ ഈ യുദ്ധനീക്കത്തെ ഒടുക്കത്തെ വിഡ്ഢിത്തം എന്നാണ് റസ്സല്‍ വിശേഷിപ്പിച്ചത്.
ഇപ്പോള്‍ ലോകം വീണ്ടുമൊരു യുദ്ധത്തെക്കുറിച്ചുള്ള ആശങ്കയിലാണ്. ഒരു വശത്ത് അമേരിക്കയും മറുവശത്ത് ഉത്തര കൊറിയയും. വിവരക്കേടും പിടിവാശിയും ഒത്തിണങ്ങിയെ ട്രംമ്പാണ് അമേരിക്കയുടെ പ്രസിഡന്റ്. ആലോചനാശീലത്തിനപ്പുറം ആധിപത്യവാസന കൈമുതലാക്കി നാളിതുവരെ അമേരിക്ക പുലര്‍ത്തിപ്പോന്ന നയങ്ങള്‍ക്ക് ചേര്‍ന്നയാള്‍ തന്നെ. ലോകപോലീസായ തങ്ങളുടെ മേധാവിത്തത്തിനെ അംഗീകരിക്കാത്തവരെ എന്തുവിലകൊടുത്തും നശിപ്പിക്കുക എന്നതു മാത്രമാണ് അമേരിക്കയുടെ നയം എന്ന് നമുക്കറിയാം. വിവിധ ലോകരാജ്യങ്ങളില്‍ ഇതുവരെ അമേരിക്ക നടത്തിയ ഇടപെടലുകള്‍ അതാണ് സൂചിപ്പിക്കുന്നത്. എതിരാളികളായ രാജ്യങ്ങള്‍‌ക്കെതിരെ വ്യാജപ്രചാരണം നടത്തി ഒറ്റപ്പെടുത്തിയും തീവ്രവാദികളെ ഉപയോഗപ്പെടുത്തിയു മൊക്കെ അമേരിക്ക നീക്കങ്ങള്‍ നടത്താറുണ്ട്. ഇറാക്കിനെതിരെയുള്ള രാസായുധ ആരോപണവും അനുബന്ധ സൈനികനടപടികളും നോക്കുക. തങ്ങളുടെ ചൊല്പടിക്കല്ലാതെ വളര്‍ന്നു വരുന്ന ഏതൊരു രാജ്യവും ആണവശക്തി നേടുന്നതും തങ്ങളുടെ നേരെ നില്ക്കുന്നതും അമേരിക്ക സഹിക്കില്ല. ആ അസഹിഷ്ണുതയാണ് കൊറിയക്കെതിരെയുള്ള നീക്കത്തിന് ആധാരം.
എന്നാല്‍ ഉത്തര കൊറിയ ആണവശക്തിയാണ്. തങ്ങളെ ആക്രമിച്ചാല്‍ തങ്ങള്‍ക്ക് കഴിയുന്നതുപോലെ തിരിച്ചടിക്കുമെന്ന് അവര്‍ പ്രഖ്യാപിച്ചു കഴിഞ്ഞിട്ടുണ്ട്. ഒരു യുദ്ധത്തിനുള്ള സാധ്യത നിലനില്ക്കുന്നു എന്ന് ചൈനയും അറിയിച്ചിട്ടുണ്ട്. യുദ്ധസാധ്യത വർദ്ധിപ്പിച്ചുകൊണ്ട് അമേരിക്കയുടെ വിമാനവാഹിനികള്‍ സര്‍വ്വ സജ്ജരായി ശാന്തസമുദ്രത്തില്‍ നിലകൊള്ളുന്നു. അമേരിക്കയുടെ വൈസ് പ്രസിഡന്റ് മൈക് പെന്‍സ് സ്ഥിതിഗതികള്‍ നേരിട്ട് നിയന്ത്രിക്കാന്‍ ദക്ഷിണകൊറിയയിലേക്ക് എത്തുന്നു. ആശങ്കാജനകമായ അവസ്ഥാവിശേഷമാണ് മേഖലയില്‍ ഉടലെടുത്തിരിക്കുന്നത്. ലോകം വീണ്ടുമൊരു യുദ്ധത്തിലേക്ക് കൂപ്പുകുത്തിയാല്‍ സര്‍വ്വനാശമായിരിക്കും ഫലം.
“YOUR ACTION DESPERATE. THREAT TO HUMAN SURVIVAL. NO CONCEIVABLE JUSTIFICATION. CIVILIZED MAN CONDEMNS IT. WE WILL NOT HAVE MASS MURDER. ULTIMATUM MEANS WAR... END THIS MADNESS “ എന്ന് അന്ന് അമേരിക്കന്‍ പ്രസിഡന്റിനോട് റസ്സല്‍ പറഞ്ഞതുപോലെ പറയാനുള്ള ആര്‍ജ്ജവം കാണിക്കുന്ന ഒരു രക്ഷാപുരുഷനെ ഇന്ന് ലോകം പ്രതീക്ഷിക്കുന്നു.
#ദിനസരികള്‍ 2
“The ultimate goal of farming is not the growing of crops, but the cultivation and perfection of human beings.” 
― Masanobu Fukuoka, The One-Straw Revolution
മസനോബു ഫുക്കുവോക്ക.ഭക്ഷണം മരുന്നാണെന്ന് വിശ്വസിക്കുകയും ആ മരുന്ന് പരുവപ്പെടുത്തി എടുക്കേണ്ടത് വിഷരഹിതമായ മണ്ണില്‍ നിന്നായിരിക്കണം എന്ന് നിര്‍ബന്ധം പിടിക്കുകയും ചെയ്ത ജപ്പാനിലെ കര്‍ഷകന്‍.മറ്റു ജീവവര്‍ഗ്ഗങ്ങളില്‍ വെച്ച് ഒന്നാമന്‍ ഇരുകാലിയായ മനുഷ്യനാണ് എന്ന ഊറ്റത്തില്‍ നിന്ന് അവനും ഒരു ആവാസവ്യവസ്ഥയുടെ ഭാഗം മാത്രമാണെന്നും ഇതര ജീവജാലങ്ങളെ തന്നോളംതന്നെ പരിഗണിക്കേണ്ടതാണെന്നുമുള്ള ധാരണയാണ് പ്രകൃതിയോട് ഇടപെടുമ്പോള്‍ മനുഷ്യരില്‍ മുന്നിട്ടു നില്ക്കേണ്ടത് എന്നും അദ്ദേഹം ശഠിച്ചു. ഉഴുതുമറിച്ച് കൃത്രിമമായി ഒരുക്കിയെടുക്കുന്ന ഒരു കൃഷിയിടത്തേക്കാള്‍ സ്വഭാവികമായിത്തന്നെ പരുവപ്പെട്ടു കിടക്കുന്ന ഇടത്തിന് ഗുണം കൂടും എന്ന് അദ്ദേഹം തെളിയിച്ചു. ആപേക്ഷികമായി ഇത്തിരിവട്ടം മാത്രമായിരുന്ന തന്റെ കൃഷിയിടത്തെ സര്‍വ്വലോകത്തിലേയും കൃഷിസ്ഥലങ്ങള്‍ക്ക് ഉദാഹരണമാക്കുവാനുള്ള ഒരിടമായി പരിണമിപ്പിച്ചെടുക്കുന്ന അത്ഭുതവിദ്യയുടെ പരീക്ഷണത്തിലായിരുന്നു അദ്ദേഹം. പ്രകൃതിയിലേക്ക് മടങ്ങുക എന്നതായിരുന്നു അദ്ദേഹത്തിന്റെ മുദ്രാവാക്യം.അഭിപ്രായ വ്യത്യാസങ്ങളും സ്വാഭാവികമായി ഉണ്ടായിരുന്നു. ഫുക്കുവോക്കയുടെ വാദങ്ങള്‍ക്ക് ശക്തവും ശാസ്ത്രീയവുമായ എതിര്‍വാദങ്ങള്‍ ഉന്നയിക്കപ്പെട്ടു.പക്ഷേ അസാധാരണമാം വിധത്തില്‍ താന്‍ ഉയര്‍ത്തിപ്പിടിച്ച ഒറ്റ വൈക്കോലിന്റെ ഇത്തിരിത്തണലില്‍ അക്ഷോഭ്യനായി ആ വൃദ്ധകര്‍ഷകന്‍ നിലകൊണ്ടു.പതുക്കെയെങ്കിലും നിരന്തരം പ്രകൃതിയിലേക്ക് മടങ്ങുക എന്ന് പിറുപിറുത്തു
ഫുക്കുവോക്ക ഒരു തെറ്റായിരിക്കാം.പക്ഷേ കഴിക്കുന്ന ഭക്ഷണത്തിലും കുടിക്കുന്ന ജലത്തിലും ശ്വസിക്കുന്ന വായുവിലും അമിതമായി വിഷം കലര്‍ന്നിരിക്കുന്ന ഈ സാഹചര്യത്തില്‍ നാം എന്താണ് ചെയ്യുക? ലാഭം മാത്രം ലക്ഷ്യമാക്കി കൃഷിയിടങ്ങളെ കീടനാശിനികളിലും മറ്റ് മാരകമായ വിഷങ്ങളിലും മുക്കി നമ്മുടെ തീന്‍‌മേശയിലേക്കെത്തിക്കുന്ന വന്‍കിട കമ്പനികളെ നാം എങ്ങനെയാണ് പ്രതിരോധിക്കുക? ഭക്ഷണവും വെള്ളവും വായുവും പോലും മലിനപ്പെടുകയും കാന്‍സര്‍‌പോലെയുള്ള രോഗങ്ങള്‍ക്ക് കാരണമാകുകയും ചെയ്യുമ്പോള്‍ രക്ഷതേടി നാം ഏതു കരങ്ങളിലാണ് അഭയം പ്രാര്‍ത്ഥിക്കുക? ദൈനന്ദിനജീവിതത്തിന് തന്നെ മുട്ടിലിഴയുന്ന കര്‍ഷകനോട് ലാഭകരമായി കൃഷിചെയ്യാനുള്ള വഴികള്‍ പ്രഘോഷണം ചെയ്യുന്ന വന്‍കിട വിത്ത് – വളക്കമ്പനികളുടെ പ്രലോഭനങ്ങളില്‍ നിന്ന് അവനെ ആരാണ് കാത്തു പോരുക?
ചോദ്യങ്ങള്‍ മാത്രമേയുള്ളു . ഉത്തരങ്ങളില്ല.വിപണിമൂല്യങ്ങള്‍ക്കപ്പുറം മറ്റു ചിലതൊക്കെ ഇവിടെ ഉണ്ട് എന്ന് തിരിച്ചറിയുന്ന കാലത്തിനായി നാം കാത്തിരിക്കുക
ആരു കണ്ട സ്വപ്നമായിരുന്നു മസനോബു ഫുക്കുവോക്ക??
#ദിനസരികള്‍ 1
വീണ്ടും മൂന്നാര്‍. വിവാദംകൊണ്ടും വിപണിസാധ്യതകൊണ്ടും കേരളത്തിലെ പ്രദേശങ്ങളില്‍ പ്രഥമസ്ഥാനത്താണ് മൂന്നാര്‍.പശ്ചിമഘട്ട മലനിരകളില്‍ 187 ചതതുരശ്ര കിലോമീറ്റര്‍ വിസ്തൃതിയുള്ള തണുത്ത അന്തരീക്ഷ ഘടനയുള്ള ഈ പ്രദേശത്ത് 38471 ആളുകള്‍ ജീവിക്കുന്നതായി 2001 ലെ കണക്കുകള്‍ പറയുന്നു. അവിടെ കഴിഞ്ഞ അരനൂറ്റാണ്ടു കാലമായി കുടിയേറ്റക്കാരായി ജീവിച്ചു പോരുന്നവരെ കൈയ്യേറ്റക്കാരായി ചിത്രീകരിച്ചുകൊണ്ട് വീണ്ടും ഒരു ഒഴിപ്പിക്കല്‍ മാമാങ്കത്തിന് കേരളം സാക്ഷ്യംവഹിക്കുകയാണ്. ഏക്കറു കണക്കിന് ഭൂമി കൈവശം വെച്ച് അനുഭവിച്ചു പോരുന്ന കേരളത്തിലൊട്ടാകെയുള്ള വന്‍കിട കൈയ്യേറ്റക്കാര്‍‌ക്കെതിരെ ഒരു നടപടിയും സ്വീകരിക്കാതെയാണ് രണ്ടും മൂന്നും നാലുമൊക്കെ സെന്റു സ്ഥലങ്ങളില്‍ കിടപ്പാടം കെട്ടി ജീവിച്ചു ‍പോരുന്നവരെ ഒഴിപ്പിക്കാനുള്ള വ്യഗ്രത റവന്യു അധികാരികളെ ഇപ്പോള്‍ പിടികൂടിയിരിക്കുന്നത്. വകുപ്പ് ഭരിക്കുന്നത് “എന്നും ശരിയുടെ ഭാഗത്തു മാത്രം” നിലകൊള്ളുന്ന സി പി ഐക്കാരാകുമ്പോള്‍ അങ്ങനെയാകാതെ തരമില്ലല്ലോ.
സഖാവ് വി എസിന്റെ കാലത്തെ മൂന്നാര്‍ ദൌത്യം നാം മറന്നിട്ടില്ലല്ലോ? അന്ന് കൈയ്യേറ്റ ഭൂമിയില്‍ പണിതുയര്‍ത്തിയ സി പി ഐയുടെ ഓഫീസിനെതിരെ ഒഴിപ്പിക്കല്‍ സേനയുടെ നടപടി നീണ്ടെത്തിയപ്പോള്‍ “കോട്ടിട്ട ആളേയും അതിനു മുകളിലുള്ള ആളേയും പേടിയി”ല്ലെന്ന് ആക്രോശിച്ചു കൊണ്ട് അന്ന് രംഗത്തു വന്നത് സി പി ഐയുടെ മുടി ചൂടാമന്നനായ സാക്ഷാല്‍ പന്ന്യന്‍ രവീന്ദ്രനായിരുന്നില്ലേ ? അതോടുകൂടി അക്കാലത്തെ മൂന്നാര്‍ ദൌത്യം അട്ടിമറിക്കപ്പെടുകയല്ലേ ഉണ്ടായത് ? ആന്ധ്യം ബാധിക്കാത്തവര്‍ സത്യസന്ധമായി മുന്‍കാലങ്ങളെ വിലയിരുത്തി അഭിപ്രായം പറയണം. അന്നും എം എം മണിയുടെ നിലപാട് സുവ്യക്തമായിരുന്നു. കുടിയേറ്റക്കാരെ നിരാലംബരാക്കി ഇറക്കിവിടുന്നത് എന്തിന്റെ പേരിലായാലും ന്യായീകരിക്കില്ല എന്നു തന്നെയാണ് ഇന്നും അദ്ദേഹത്തിന്റെ നിലപാട്.
ഇതില്‍ മറ്റൊരു തമാശ യു ഡി എഫിന്റെ ഭാഗത്തു നിന്നുണ്ടാകുന്ന “കൈയ്യേറ്റത്തിനെതിരെയുള്ള” പ്രതികരണങ്ങളാണ്. ഉമ്മന്‍ ചാണ്ടിയുടെ അഞ്ചുവര്‍ഷക്കാലം ഇക്കാര്യത്തില്‍ എന്തു ചെയ്യുകയായിരുന്നു എന്ന് ഓരോ യു ഡി എഫുകാരനും സ്വയമൊന്ന് ആലോചിച്ച് നോക്കേണ്ടതാണ്. അപ്പോള്‍ സി പി ഐ ഇപ്പോള്‍ ഈ കൈയ്യേറ്റമൊഴിപ്പിക്കലുമായി ഇറങ്ങിയതിന്റെ പിന്നിലെ രഹസ്യം എന്താണ് ? രണ്ടു കാര്യങ്ങളാണ് മനസ്സിലാക്കുവാന്‍ കഴിഞ്ഞിട്ടുള്ളത്
1.മൂന്നാര്‍ വിഷയം പത്രമാധ്യമങ്ങള്‍ക്ക് അമിത താല്പര്യമുള്ള ഒന്നാണ്. അതിലിടപെടുക വഴി , സി പി ഐയുടെ മന്ത്രിമാര്‍ പ്രവര്‍ത്തനരഹിതരാണ് എന്ന വിമര്‍ശനത്തിന് തടയിടുക.
2.മൂന്നാര്‍ വിഷയത്തില്‍ എം എം മണി അടക്കമുള്ളവരുടെ നിലപാട് സുവ്യക്തമാണെന്നിരിക്കേ സി പി ഐ എമ്മിനെ മാധ്യമങ്ങളുടെ സഹായത്തോടെ പ്രതിക്കൂട്ടില്‍ നിര്‍ത്തിക്കൊണ്ട് തങ്ങള്‍ മാത്രമാണ് കറകളഞ്ഞവര്‍ എന്ന് വരുത്തിത്തീര്‍ത്ത് മുഖം മിനുക്കിയെടുക്കുക.
തോളിലിരുന്ന് ചെവി തിന്നുന്ന ഈ സ്വാഭാവത്തിനെ എന്തു പേരിട്ടാണ് വിളിക്കേണ്ടത് എന്ന് നിഷ്പക്ഷമതികള്‍ തീരുമാനിക്കട്ടെ.