Saturday, August 12, 2017

#ദിനസരികള്‍ 122

അറുപത്തിനാലു കുഞ്ഞുങ്ങള്‍ ! അറുപത്തിനാലു ജീവനുകള്‍ ! അധികാരികളുടെ അനാസ്ഥ മൂലം യുപിയിലെ ഗോരഖ്പൂര്‍ ബാബാ രാഘവദാസ് മെഡിക്കല്‍ കോളേജില്‍ കൊല്ലപ്പെട്ടത് അറുപത്തിനാലു പിഞ്ചുകുഞ്ഞുങ്ങളാണ്.ആശുപത്രിയില്‍ ഓക്സിജന്‍ വിതരണം നിലച്ചതോടെയാണ്  സമാനതകളില്ലാത്ത ദുരന്തം നടന്നത്. ഓക്സിജന്‍ വിതരണം ചെയ്യുന്ന കമ്പനിക്ക് കൊടുക്കാനുള്ള കുടിശ്ശിക നല്കാത്തതോടെ അവര്‍ വിതരണം അവസാനിപ്പിക്കുകയായിരുന്നു. കുടിശിക നല്കിയില്ലെങ്കില്‍ ഓക്സിജന്‍ വിതരണം നിലക്കുമെന്ന മുന്നറിയിപ്പ് ആരോഗ്യവകുപ്പിന് ആശുപത്രി അധികൃതര്‍ നല്കിയിരുന്നുവെങ്കിലും സര്‍ക്കാര്‍ തുക അനുവദിക്കാതിരുന്നത് ഗുരുതരമായ വീഴ്ചയും അപകടത്തിന്റെ കാരണവുമായി. അതോടൊപ്പം സംഭവത്തെക്കുറിച്ച് സര്‍ക്കാര്‍ പൊതുജനങ്ങളെ തെറ്റിദ്ധരിപ്പിക്കുന്ന തരത്തിലുള്ള വസ്തുതാവിരുദ്ധമായ വിശദീകരണങ്ങളാണ് നടത്തുന്നത്.
            യു പി മുഖ്യമന്ത്രി യോഗി ആദിത്യനാഥ് ദീര്‍ഘകാലം എംപിയായി പ്രവര്‍ത്തിച്ച മണ്ഡലത്തിലാണ് പ്രസ്തുതമെഡിക്കല്‍ കോളേജ് സ്ഥിതി ചെയ്യുന്നത്. മൂന്നു ദിവസം മുമ്പ് ആശുപത്രിയുടെ വികസനകാര്യങ്ങള്‍ മുഖ്യമന്ത്രി നേരിട്ടെത്തി വിലയിരുത്തിയതാണ് എന്നാണ് സര്‍ക്കാര്‍ അവകാശപ്പെടുന്നത്. എന്നാല്‍ ഈ ആശുപത്രിയെക്കുറിച്ച് ജനങ്ങള്‍ക്ക് വിരുദ്ധ അഭിപ്രായമാണ് നിലവിലുള്ളത്.ആശുപത്രി സംവിധാനങ്ങള്‍ നവീകരിക്കുവാന്‍ മുപ്പത്തിയേഴുകോടി രൂപ വകയിരുത്തണമെന്ന് ആശുപത്രി അധികൃതര്‍ സന്ദര്‍ശന സമയത്ത് മുഖ്യമന്ത്രിയോട് ആവശ്യപ്പെട്ടെങ്കിലും അനുവദിച്ചില്ല.ജീവനക്കാര്‍ക്ക് അഞ്ചുമാസമായി ശമ്പളംപോലും മുടങ്ങിയ അവസ്ഥയിലായിരുന്നു.ഓക്സിജന്‍ വിതരണക്കാര്‍ക്കുതന്നെ അറുപത്തിയെട്ടു ലക്ഷം രൂപ കുടിശ്ശികയാണ്. അതു നല്കണമെന്നും അല്ലെങ്കില്‍ ഓക്സിജന്‍ വിതരണം നിറുത്തിവെക്കുമെന്നും കമ്പനി ആവശ്യപ്പെട്ടതും സര്‍ക്കാര്‍ അവഗണിച്ചു.അപകടം ഉണ്ടായ ശേഷമാണ് പത്തുലക്ഷത്തോളം രൂപ പ്രസ്തുത കമ്പനിക്ക് കൊടുക്കാനും വിതരണം പുനസ്ഥാപിക്കാനുമുള്ള നടപടി സര്‍ക്കാര്‍ കൈക്കൊണ്ടത്.ഓക്സിജന്‍ വിതരണത്തിലെ അപകതയല്ല അപകടകാരണം എന്നാണ് സര്‍ക്കാര്‍ വാദിക്കുന്നത്. എങ്കില്‍ തിരക്കിട്ട് പത്തുലക്ഷം രൂപ അനുവദിച്ചതെന്തിന് എന്ന ചോദ്യത്തിന് ഉത്തരമില്ല.

ഫലത്തില്‍ യോഗി ആദിത്യനാഥ് സര്‍ക്കാറിന്റെ കെടുകാര്യസ്ഥതയും കഴിവില്ലായ്മയുമാണ് ഈ അപകടത്തിന് വഴി തുറന്നത്. കോളേജ് പ്രിന്‍സിപ്പാളിനെ സസ്പെന്റ് ചെയ്ത് അപകടത്തിന്റെ ഉത്തരവാദിത്തം അടിച്ചേല്പിക്കാന്‍ ശ്രമിച്ചുവെങ്കിലും അതിനുമുമ്പേ അദ്ദേഹം രാജി വെച്ചിരുന്നു. രാജ്യത്തെ നടുക്കിയ ശിശുമരണങ്ങളുടെ ധാര്‍മിക ഉത്തരവാദിത്തം മുഖ്യമന്ത്രി ഏറ്റെടുക്കണം. മരണം തുടരുന്നത് അവസാനിപ്പിക്കാന്‍ ആവശ്യമായ നടപടികള്‍ സ്വീകരിക്കണം.

കവിതാവാരം - ആഴ്ചപ്പതിപ്പുകളിലെ കവിതകളിലൂടെ – 1.


എനിക്ക് കവിത വായിക്കാനറിയില്ല. എഴുതാനറിയില്ല. ചൊല്ലാനറിയില്ല. ഇതുമൂന്നും ലളിതബുദ്ധികളുടെ വ്യായാമകേന്ദ്രങ്ങളോ ആശ്രയസ്ഥാനങ്ങളോ അല്ല എന്ന ബോധ്യമെനിക്കുണ്ട്. കവിതാവായന വെറും വായനയല്ല. ഉള്ളിലുള്ളത് തോണ്ടിപ്പുറത്തിടുകയും പുറത്തുള്ളത് അകംമറിക്കുകയും ചെയ്യുന്ന മായാജാലമാണ്. പറഞ്ഞതും പറഞ്ഞതിനപ്പുറവും കണ്ടെത്തേണ്ടുന്ന , അധികമധികം ഉത്തരവാദിത്തം പ്രകടിപ്പിക്കേണ്ട ചിത്തവൃത്തിയാണ് കവിതവായിക്കുക എന്നത്.അടുക്കാന്‍ ശ്രമിക്കവേ , ആയുധികളുടെ വിദഗ്ദമായ വിളയാട്ടത്താല്‍ മുറിപ്പെടുത്തിയ മഹാകവികളുണ്ട് .കവിയുടെ ആയുധമെന്ന് പറയുന്നത് ലോഹക്കൂട്ടിന്റെ നിശിതമായ തലപ്പുകളല്ല , കല്പനാശക്തിയുടെ വൈഭവമാണ്. നിമ്നോന്നതങ്ങളിലൂടെ തേരുരുള്‍ പായിക്കലാണ്. ഹാ വിജിഗീഷു മൃത്യവിന്നാമോ ജീവിതത്തിന്‍ കൊടിപ്പടം താഴ്ത്തുവാന്‍ ? എന്ന കൊള്ളിയാന്‍ മിന്നിക്കലാണ്.ഭക്തിമയസ്വരത്തില്‍ ആനന്ദലബ്ദി തേടുന്നതു മാത്രമല്ല , നിരത്തില്‍ മുലചപ്പി വലിക്കുന്ന നവാതിഥിയെ കണ്ടെത്തലും കവിതയാണ്.അതുകൊണ്ട് കവിത വായിച്ചാല്‍ മാത്രം പോര , ആ ഗര്‍ഭഗൃഹത്തിലേക്ക് നൂണ്ടുകയറി  പ്രതിഷ്ഠ ഉറപ്പിച്ചിരിക്കുന്ന രസക്കൂട്ടിനെ കണ്ടെത്തുകതന്നെ വേണം. അത്രയും ആണ്ടിറങ്ങുക എന്നത് എന്റെ മേധാശക്തിയുടെ പരിധിക്കപ്പുറമായതിനാല്‍ ഞാന്‍ എന്നെ കവിത വായിക്കാന്‍ കഴിയുന്നത്ര പ്രോത്സാഹിപ്പിക്കാറില്ല.എഴുത്തിന്റെ കഥ പറയേണ്ടതില്ലല്ലോ. ചൊല്ലലാകട്ടെ , കേള്‍വിക്കാരനെ കവിതയുടെ കേന്ദ്രത്തിലേക്ക് ആവാഹിച്ചെത്തിക്കുന്ന ആഭിചാരമാണ്.ഇണങ്ങി നില്ക്കും ശ്രുതിയുടേയും രാഗത്തിന്റേയും ഭാവത്തിന്റേയും മുക്കൂട്ടാണ് ചൊല്ലല്‍. അതിലും ഞാന്‍ അസമര്‍ഥന്‍ തന്നെ !
            കവിത മനസ്സിലാക്കാന്‍ ഞാന്‍ അസമര്‍ത്ഥന്‍ എന്ന് പറഞ്ഞുവല്ലോ. അതെനിക്ക് കൂടുതലായി മനസ്സിലാക്കിത്തന്നത് ഈ ആഴ്ച മലയാളം വാരികയില്‍ സുനില്‍ ജോസിന്റേതായി വന്ന വിത വായിച്ചപ്പോഴാണ്. വീട്ടുയാത്രകള്‍ എന്ന പേരു പേറുന്ന പ്രസ്തുത കവിത എന്താണ് പറയാന്‍ ശ്രമിക്കുന്നതെന്ന് മനസ്സിലാക്കിയെടുക്കാന്‍ എത്ര തവണ വായിച്ചു എന്ന് എനിക്ക് തന്നെ അറിയില്ല.എന്നാലും മെനഞ്ഞിലു പോലെ പിടിതരാതെ വഴുതിവഴുതിപ്പോകുകയാണ് ഈ വാങ്മയം. എന്റെ വിധി കഷ്ടം തന്നെ. ആ കവിത മുഴുവനായും ഞാനുദ്ധരിക്കാം. മനസ്സിലാകുന്നവര്‍ പറഞ്ഞുതന്നാല്‍ നന്ന്.
ആളുകളെല്ലാമുറങ്ങുമ്പോള്‍
ചില രാത്രികളില്‍
വീടുകള്‍ യാത്ര പോകാറുണ്ട്.
ഉറക്കത്തിന്
ഉലച്ചില്‍ തട്ടാതിരിക്കാന്‍
ശ്വാസമടക്കിപ്പിടിച്ച്
പൂച്ചനടത്തത്തോടെയുള്ള
അതിന്റെ
യാത്ര കണ്ടിരിക്കാന്‍
രസമാണ്.
കോഴികൂവും മുമ്പേ
ചെറിയൊരു ചിരിയോടെ
ഒന്നുമറിയാത്ത
ഭാവത്തില്‍
അതു തിരികെയെത്തി
മുരടനക്കി
കിളിയൊച്ചകള്‍കൊണ്ട്
ഓരോരുത്തരെയായി
വിളിച്ചുണര്‍ത്തും.
വീട്ടുകിണറിനീ യാത്രയെക്കുറിച്ചറിയാം
അതുകൊണ്ടാണ്
അതു വീടിന്റെ
മുഖത്തുനോക്കാതെ
ആകാശത്തേക്കു നോക്കി
ഒന്നുമറിയാത്ത
ഭാവത്തില്‍
തനിച്ചു കിടക്കുന്നത്
യാത്രപോയി
തിരിച്ചു വരാത്ത
വീടിനുള്ളില്‍
പെട്ടുപോകുന്നവരുടെ
കാര്യമാണ്
മഹാകഷ്ടം.
            ഈ കവിത എന്താണ് പറയാന്‍ ശ്രമിക്കുന്നത്? എനിക്കൊന്നും മനസ്സിലായിട്ടില്ല. എനിക്കു മനസ്സിലായിട്ടില്ല എന്നുള്ളതുകൊണ്ട് പത്രാധിപര്‍ക്കു മനസ്സിലായിട്ടില്ല എന്നര്‍ത്ഥമില്ലല്ലോ. അദ്ദേഹത്തിന് മനസ്സിലായതുകൊണ്ടായിരി ക്കുമല്ലോ ഇത് കഷണം കഷണം മുറിച്ച് ഒരു പേജാകെ നിരത്തിവെച്ചിരിക്കുന്നത്? അപ്പോള്‍ ഇത് മനസ്സിലാക്കുക എന്നത് വാരിക കാശുകൊടുത്തു വാങ്ങുന്ന എന്റെ ഉത്തരവാദിത്തമായി.അതു നിറവേറ്റണമല്ലോ. പല തവണ വായിച്ചു. വീടിന്റെ യാത്രയേയും പുച്ചയുടെ നടത്തത്തേയും കിണറിന്റെ സാക്ഷ്യത്തേയും വീടിനുള്ളില്‍ പെട്ടുപോകുന്നവരുടെ മഹാകഷ്ടത്തേയും പല തവണ കീഴ്മേല്‍ മറിച്ചു പരിശോധിച്ചു. കവിത കണ്ടെത്തിയില്ലെന്നു മാത്രമല്ല , കവിത എവിടെ എന്നായി ഇപ്പോള്‍  ഞാന്‍ എന്നോടു ചോദിക്കുന്നത്. അവസാനം അവസാനം വാരികയുടെ പ്രസ്തുത പേജ് കീറിയെടുത്ത് ഒരു തോണിയാക്കി മഴവെള്ളത്തിലൊഴുക്കി വീട്ടുയാത്രകളെ യാത്രയാക്കി. ഇപ്പോള്‍ എനിക്കൊരു സുഖം തോന്നുന്നുണ്ട്.വാരിക വീണ്ടും മറിച്ചു നോക്കി. ആ കവിത അവിടെ ഇല്ലാത്തതിന്റേതായ ഒരു വിഷമവും എനിക്ക് കണ്ടെത്താന്‍ കഴിഞ്ഞില്ല. വാരികയുടെ ആകെത്തുകയില്‍ നിന്ന് ഒറു പേജിന്റെ ചില്വാനം വെറുതെ പോയി. എന്നാലും മനസ്സിലാകാത്ത ഒരു വമ്പന്‍ മലയെ ഉദരത്തിലേറ്റുന്ന അസ്വസ്ഥതക്ക് അവസാനമായല്ലോ. സമാധാനമായി .
            തൊട്ടുപിന്നിലത്തെ പേജില്‍ ജിനേഷ് മടപ്പിള്ളി കറക്കം എന്ന പേരില്‍ ഒരു കവിത കുറിച്ചിരിക്കുന്നു.അദ്ദേഹം എന്തോ പറയാന്‍ ശ്രമിക്കുന്നുണ്ടെന്ന് എനിക്കു മനസ്സിലായി.എഡിറ്റര്‍ എഡിറ്ററാകാഞ്ഞതിന്റെ ഒരസ്കിത കണ്ടെത്താമെങ്കിലും എവിടെയൊക്കെയോ കവിതയുടെ ചെറിയ ചെറിയ സൂചിനീട്ടലുകള്‍ സ്പര്‍ശിക്കുന്നത് എനിക്കറിയാന്‍ കഴിയുന്നുണ്ട്.ആ കവിതയില്‍ നിന്ന് ഒരു നാലുവരി
            കണ്ണില്‍ പെടുമ്പോഴേക്കും
            ആഴങ്ങളിലേക്ക് ഊര്‍ന്നിറങ്ങുന്ന
            പുതിയ ചില കളിരീതികള്‍
            വെള്ളം ശീലമാക്കിയിരിക്കുന്നു.
            ദേശാഭിമാനിയില്‍ ബാലചന്ദ്രന്‍ ചുള്ളിക്കാടിന്റെ സുന്ദരമായ ചിത്രത്തോടെ വ്രണിതഗീതം (പ്രിയ ചുള്ളിക്കാടിന് ) എന്ന പേരില്‍ എം എന്‍ ശശിധരന്‍ എഴുതിയ ഒരു കവിത മഞ്ഞപ്രതലത്തില്‍ അച്ചടിച്ചിരിക്കുന്നു. കവിത വായിച്ചതിനുശേഷം ഞാന്‍ ചുള്ളിക്കാടിന് ഫോണ്‍ ചെയ്തു ചോദിച്ചു അങ്ങ് മരിച്ചുവല്ലേ ? ആദരാഞ്ജലികള്‍ കവേ ചുള്ളിക്കാട് പറഞ്ഞു ഞാനോ ? ഞാന്‍ മരിച്ചിട്ടില്ല സുഹൃത്തേ, ജീവിച്ചിരിക്കുന്നു, ജീവിച്ചിരിക്കുന്നു. അങ്ങനെയോ ?” ഞാന്‍ തുടര്‍ന്നു. എങ്കില്‍ അങ്ങ് ദയവായി ദേശാഭിമാനി വാരികയിലെ വ്രണിതഗീതം എന്ന കവിത വായിക്കരുത്.അതുവായിച്ചാല്‍ അങ്ങേക്ക് ആത്മഹത്യ ചെയ്യേണ്ടിവരും. പ്ലീസ് ഫോണ്‍ മുറിച്ചു. ഞാന്‍ ചാരുകസേരയിലേക്ക് ചാരി.
            കേരള കൌമുദി . ലക്കം 2187.പേജ് ഒമ്പത്. സ്നേഹത്തിനപ്പുറം. ജോയ് വാഴയില്‍. കവിത എന്ന് പേജിന്റെ തുടക്കത്തില്‍ കൌമുദി ടീം അടിച്ചിരിക്കുന്നതിനാല്‍ കവിത. തന്റെ രാജ്യത്ത് കവികളെ പ്രവേശിപ്പിക്കരുതെന്ന് പ്ലേറ്റോ പറഞ്ഞത് ഇത്തരം കവികളേയും കവിതകളേയും കണ്ടിട്ടാകണം. കഷ്ടമേ കഷ്ടം.ഗ്രഹണി പിടിച്ച പിള്ളാരുടെ മത്സരിച്ചുള്ള ഓണത്തീറ്റ പോലെ എന്തൊക്കെയോ വലിച്ചു വാരി വരിവരിയായി എഴുതിവെച്ചിരിക്കുന്നു.എത്ര മനുഷ്യരെ വെള്ളിടി വെട്ടുന്നു എന്ന് പാടിയതാരാണെന്ന് ഞാന്‍ മറന്നുപോയല്ലോ എന്റെ തേവരേ ! ഇതാ അടുത്തൊരു കവിത. അതേ വാരികയില്‍ത്തന്നെ. കവി റൂബി ഇരവിപുരം.കവിതയുടെ പേര് കണ്ണടച്ചിരുട്ടാക്കാതെ മനുഷ്യാ എന്നാണ്.കുറേ വരികള്‍ മുറിച്ച് കുഞ്ഞുകുഞ്ഞാക്കി എഴുതിയിരിക്കുന്നു. സാമൂഹിതപ്രതിബദ്ധതയാല്‍ വിജൃംഭിക്കുക എന്റെ സ്വഭാവമായതിനാല്‍ പ്രാരാബ്ദം കുഞ്ഞിനെ ഉദ്ധരിക്കാം.
            തഴപ്പായിലൊന്നുമില്ലാതല്ലോ ഞാന്‍
            ജനിച്ചൂ വീണു.....
വിഴുപ്പാര്‍ന്ന ജതിമതപേരുകളെല്ലാമേ
യതിനു ശേഷമെന്നിലെടുത്തു വെച്ചുതന്നു
പ്രാരാബ്ദ, മന്നുമുതല്‍ ജീവിതാന്ത്യം വരെ ചുമപ്പൂ... ഇതു സഹിക്കാം. സഹിക്കണം. കാരണം അതിലൊരല്പം കാര്യമുണ്ട്. വായനക്കാരനോട് അല്പമെങ്കിലും സ്നേഹമുണ്ടെങ്കില്‍ ബാക്കിയുള്ളവ എഡിറ്റര്‍ തന്നെ കത്തിക്കേണ്ടതായിരുന്നു.
            കൌമുദിയുടെ 49 പേജില്‍ ഒരു കവിതയുണ്ട് ബിന്ദു പി വക.അവര്‍  എന്തെങ്കിലുമൊക്കെ പറയും എന്ന പ്രതീക്ഷിക്കാം.ആശംസിക്കാം. ഇനിയും ഈ വാരികയില്‍ കുമാരി എം , നിഷ നാരായണന്‍ , സനല്‍ പോറ്റി , ആദിത്യ ശങ്കര്‍ എന്നിവരുടെയൊക്കെ വിതകളുണ്ട്. അത് മുളച്ച് പടുമുളകളായി നില്ക്കുന്നുമുണ്ട്. എനിക്കു വയ്യ അതിനിനിയും ഇടയിളക്കാന്‍ . പിന്നെ ഒരു നല്ല കാര്യം പത്രാധിപര്‍ ചെയ്തിട്ടുണ്ട്. എല്ലാ കവികളുടേയും ഫോണ്‍ നമ്പറും മെയില്‍ ഐഡിയും അദ്ദേഹം കൊടുത്തിട്ടുണ്ട്. കൈകാര്യം ചെയ്യുന്നവര്‍ നേരിട്ടായിക്കോട്ടെ എന്നായിരിക്കാം വ്യംഗ്യം.അതേതായാലും നന്നായി.
           


Friday, August 11, 2017

#ദിനസരികള്‍ 121


എറിക് ഹോബ്സ്‌ബോം തന്റെ വിഖ്യാതമായ How to Change the World എന്ന പുസ്തകത്തിലെ പന്ത്രണ്ടാം അധ്യായത്തില്‍ ഗ്രാംഷിയെക്കുറിച്ച് ചര്‍ച്ച ചെയ്യുന്നുണ്ട്. വളരെ കരുതലോടെയും ഉള്‍ക്കാഴ്ചയോടെയും എഴുതപ്പെട്ട ഈ അധ്യായത്തിനെത്തുടര്‍ന്ന് Reception of Gramsci എന്നൊരു അധ്യായം കൂടി ഈ ഗ്രന്ഥത്തിലുള്‍‌പ്പെടുത്തിയിട്ടുണ്ട്. രണ്ടു അധ്യായങ്ങളും ചേര്‍ന്നാല്‍ ഏകദേശം മുപ്പതോളം പേജുകള്‍ മാത്രമേ ഉണ്ടാവുകയുള്ളു എങ്കിലും ഗ്രാംഷിയുടെ ചിന്താലോകത്തിന്റെ ഒരു സമഗ്രവീക്ഷണം ലഭ്യമാക്കാന്‍ ഹോബ്സ്‌ബോമിന് കഴിഞ്ഞിട്ടുണ്ട്. ഇറ്റാലിയന്‍ കമ്യൂണിസ്റ്റ് പാര്‍ട്ടിയുടെ ജനറല്‍ സെക്രട്ടറിയായിരുന്ന  ഗ്രാംഷിയുടെ തലയെ ഇരുപതു വര്‍ഷത്തേക്ക് പ്രവര്‍ത്തന രഹിതമാക്കണമെന്നാണ് മുസോളിനിയുടെ ഫാസിസ്റ്റ് സര്‍ക്കാര്‍ ഒരു വിചാരണക്കിടെ കോടതിയോട് ആവശ്യപ്പെട്ടത്.അതൊന്നുമാത്രം മതി ഫാസിസം അദ്ദേഹത്തെ എത്രമാത്രം ഭയപ്പെട്ടിരുന്നു എന്ന് മനസ്സിലാക്കാന്‍.മരണം ഉറപ്പായ ഘട്ടത്തിലാണ് പിന്നീട് അദ്ദേഹത്തെ ജയിലില്‍ നിന്ന് സര്‍ക്കാര്‍ പുറത്തുവിട്ടത്. മോചിതനായ ശേഷം ഏതാനും മാസങ്ങള്‍ കൂടി ജീവിച്ചിരുന്ന ഗ്രാംഷി 1937 ഏപ്രില്‍ 27 ന് തന്റെ 46 ാമത്തെ വയസ്സില്‍  അന്തരിച്ചു.
ഇരുപതാം നൂറ്റാണ്ടിലെ മാര്‍ക്സിസ്റ്റ് ചിന്തകന്മാരില്‍ ഗ്രാംഷി പ്രഥമസ്ഥാനത്താണ്. ജയിലില്‍ നിന്ന് എഴുതിയ മുപ്പതു നോട്ടുബുക്കുകളിലായി മൂവ്വായിരത്തോളം പേജുകളില്‍ അദ്ദേഹത്തിന്റെ ചിന്തകള്‍ വ്യാപിച്ചു കിടക്കുന്നു.സാഹസികമായി ജയിലിനു പുറത്തെത്തിച്ച ആ കുറിപ്പുകളിലേക്ക് ലോകത്തിന്റെ ശ്രദ്ധ പതിഞ്ഞത് അദ്ദേഹത്തിന്റെ മരണത്തിന് ശേഷം ഏകദേശം പത്തുകൊല്ലം കഴിഞ്ഞിട്ടായിരുന്നു. രണ്ടാംലോകമഹായുദ്ധത്തിന് ശേഷം പ്രസിദ്ധീകരിക്കപ്പെട്ട ആ കുറിപ്പുകളിലൂടെ ഗ്രാംഷി മാര്‍ക്സിസത്തിന്റെ വക്താവും പ്രയോക്താവുമായി മാറുന്ന കാഴ്ച ലോകം അത്ഭൂതാദരങ്ങളോടെയാണ് വീക്ഷിച്ചത്.മാര്‍ക്സിസത്തില്‍ അതുവരെ കാണാതിരുന്ന നവ്യമായ ഒരു പരിവേഷം ചാര്‍ത്തിക്കൊടുക്കുവാന്‍ ഗ്രാംഷിയുടെ ചിന്തകള്‍ക്ക് കഴിഞ്ഞു.
ഹോബ്സ്‌ബോം എഴുതുന്നു.( ആശയാനുവാദം ) 1937 ല്‍ ഗ്രാംഷി മരിച്ചതിനുശേഷം 1920 കളിലെ അദ്ദേഹത്തിന്റെ സഖാക്കള്‍ക്കല്ലാതെ മറ്റാര്‍ക്കും അദ്ദേഹത്തെ കുറച്ചുകാലത്തേക്ക് പരിചയമുണ്ടായിരുന്നില്ല. മരണം കഴിഞ്ഞ് പത്തുവര്‍ഷക്കാലത്തിന് ശേഷം അദ്ദേഹം ഇറ്റലിയിലാകെ സുപരിചിതനായി മാറുന്ന സാഹചര്യം സംജാതമായി. എന്നു മാത്രവുമല്ല , കമ്യൂണിസത്തിന് പുറത്തും അദ്ദേഹം വ്യാപകമായി അറിയപ്പെട്ടതിന് പാര്‍ട്ടിയും എയ്നൌദി എന്ന പ്രസാധകരും ഗ്രാംഷിയുടെ രചനകള്‍ പുറത്തുകൊണ്ടുവന്നത് കാരണമായിട്ടുണ്ട് .ഗ്രാംഷിയെ മാര്‍ക്സിസ്റ്റ് ചിന്തകന്‍ എന്ന രീതിയിലും , ഇരുപതാം നൂറ്റാണ്ടിലെ ഇറ്റാലിയന്‍ സാംസ്കാരിക രംഗത്തെ പ്രമുഖന്‍ എന്ന നിലയിലും  അറിയപ്പെടാന്‍ ഈ പ്രസാധനങ്ങള്‍ സഹായിച്ചു.


Thursday, August 10, 2017

#ദിനസരികള്‍ 120


സുന്ദരമായ ആചാരങ്ങള്‍ നടപ്പില്‍ വരുത്തുവാന്‍ സംഘപരിവാരങ്ങള്‍ക്ക് പ്രത്യേകമായ ഒരു ചാതുര്യമുണ്ട്. ആ ചാതുര്യത്തിന്റെ പ്രത്യക്ഷ ഉദാഹരണമാണ് വി വി രാജേഷിനെതിരെ ബി ജെ പിയില്‍ നടന്ന നടപടി. അഴിമതിയുമായി ബന്ധപ്പെട്ട് ബി ജെ പിയിലെ എല്ലാ സ്ഥാനമാനങ്ങളും വി വി രാജേഷില്‍ നിന്നും എടുത്തുമാറ്റി എന്നാണ് മാധ്യമങ്ങളില്‍ നിന്നും അറിഞ്ഞത്. അഴിമതി ജനങ്ങള്‍ അറിഞ്ഞത് ബി ജെ പി നടത്തിയ അന്വേഷണത്തിന്റെ റിപ്പോര്‍ട്ട് ചോര്‍ന്നതുകൊണ്ടാണെന്നും ആ റിപ്പോര്‍ട്ട് ചോര്‍ത്തിയത് രാജേഷാണ് എന്നുമാണ് ബി ജെ പിയുടെ നേതൃത്വം ആരോപിക്കുന്നത്. അതായത് ബി ജെ പിയുടെ അഴിമതിക്കഥകള്‍ മൂടിവെക്കാതെ ജനങ്ങളെ അറിയിച്ചു എന്നതാണത്രേ നടപടിയുടെ കാരണം.അഴിമതി നടത്തിയവര്‍‍‌ക്കെതിരെ നടപടിയില്ല.അതിന് കൂട്ടുനിന്നവര്‍‌ക്കെതിരെ നടപടിയില്ല.ബി ജി പിക്ക് മാത്രം നടപ്പിലാക്കുവാന്‍ കഴിയുന്ന ഇത്തരം സുന്ദരമായ ആചാരങ്ങളെ നാം ആസ്വദിക്കാതിരിക്കുന്നതെങ്ങനെ ?
            പാര്‍ട്ടിക്ക് അവമതിപ്പുണ്ടാകാന്‍ രാജേഷും കൂടെ നടപടിക്ക് വിധേയനായാ പ്രഫുല്‍ കൃഷ്ണയും കാരണമായി എന്നാണ് കുമ്മനം മാധ്യമങ്ങളോട് പറഞ്ഞത്.കൂട്ടത്തില്‍ സംശുദ്ധവും മൂല്യാധിഷ്ഠിതവുമായ പ്രവര്‍ത്തനങ്ങളാണ് ബി ജെ പി ഉയര്‍ത്തിപ്പിടിക്കുന്നതെന്നും കുമ്മനം കൂട്ടിച്ചേര്‍ക്കുന്നു. ഇതില്‍പ്പരം തമാശ വേറെന്താണ് ? മൂല്യാധിഷ്ഠിതം എന്ന വാക്കിന്റെ അര്‍ത്ഥം അറിയാതെയായിരിക്കണം കുമ്മനം പ്രയോഗിച്ചിട്ടുണ്ടാവുക എന്നു തോന്നുന്നു. അതല്ലെങ്കില്‍ ലക്ഷങ്ങളുടെ തട്ടിപ്പ് നടത്തിയവര്‍‌ക്കെതിരെ ഒരു നടപടിയുമെടുക്കാതെ കള്ളത്തരം കാണിച്ചത് ജനങ്ങളെ അറിയിച്ചവര്‍‌ക്കെതിരെ തിരിയണമെങ്കില്‍ അതെന്തുതരം മൂല്യബോധമാണ് ? അല്ലെങ്കില്‍ ബി ജെ പി മൂല്യാധിഷ്ഠിതമെന്നു പറയുന്നത് ഇതൊക്കെത്തന്നെയായിരിക്കാം. കക്കൂക എന്നത് കുറ്റമല്ലാതാകുകയും അത് വിളിച്ചു പറയുക എന്നു പറയുന്നത് കുറ്റമാകുകയും ചെയ്യുമ്പോള്‍ ഇനിയാരും ബി ജെ പിയിലെ നാറുന്ന അഴിമതിക്കഥകള്‍ പുറത്തുകൊണ്ടുവരികയില്ലല്ലോ.

            ഇരിക്കുന്ന കൊമ്പ് മുറിക്കരുതെന്നാണ് കുമ്മനം അണികള്‍ക്ക് കൊടുക്കുന്ന സന്ദേശം.കൊമ്പിലിരുന്നുകൊണ്ട് എന്തു തോന്ന്യവാസങ്ങളും ചെയ്യാം.അഴിമതികള്‍ നടത്താം. വാണിഭങ്ങള്‍ നടത്താം. നിരപരാധികളെ തല്ലിക്കൊല്ലാം.എന്തും ചെയ്യാം. പക്ഷേ ആരും ഒന്നും പുറത്തു പറയാന്‍ പാടില്ല.ഇത് കേരളത്തിലെ ബി ജെ പിയില്‍ മാത്രമുള്ളതാണെന്ന് തെറ്റിദ്ധാരണ വേണ്ട. ഇന്ത്യയില്‍ എല്ലായിടത്തും ഇവര്‍ ഇങ്ങനെത്തന്നെയാണ്. അടിമുടി അഴിമതിയില്‍ കുളിച്ചിരിക്കുന്നു. അതല്ലെങ്കില്‍ നാലു വര്‍ഷത്തിനുള്ളില്‍ അമിത് ഷായുടെ സമ്പത്ത് മൂന്നൂറ് ഇരട്ടിയായി വര്‍ദ്ധിക്കുന്നതെങ്ങനെ ? യഥാ രാജാ തഥാ പ്രജാ എന്ന പ്രയോഗം അന്വര്‍ത്ഥമാക്കിക്കൊണ്ട് അടിമുടി അഴിമതിയില്‍ മുങ്ങനില്ക്കുകയാണ് ഭാരതത്തിലെ ജനങ്ങളുടെ പാര്‍ട്ടി എന്നറിയപ്പെടുന്ന ബി ജെ പി.

Wednesday, August 9, 2017

#ദിനസരികള്‍ 119


കെ മുരളിധരന്‍ പറഞ്ഞതുപോലെ അഹമ്മദ് പട്ടേല്‍ കേവലമൊരു അലൂമിനിയം പട്ടേല്‍ അല്ല എന്നു തെളിയിച്ചിരിക്കുന്നു.സംഘപരിവാര്‍ രാഷ്ട്രീയത്തിന്റെ ചാണക്യനെന്നറിയപ്പെടുന്ന അമിത് ഷായുടെ തന്ത്രങ്ങളെയാണ് ഗുജറാത്തില്‍ അഹമ്മദ് പട്ടേല്‍ കടപുഴക്കിയത്. അതുകൊണ്ടുതന്നെ കേവലമൊരു രാജ്യസഭാ സീറ്റിലേക്കുള്ള വിജയം എന്നതിനപ്പുറം എതിരാളികളില്ലാത്ത തന്ത്രങ്ങളുടെ അധിപന്‍ എന്നു പലരും പാടിപ്പുകഴ്ത്തുന്ന അമിത് ഷായുടെ നീക്കങ്ങളെ തടയിടാന്‍ കഴിഞ്ഞു എന്നതു തന്നെയാണ് ആ വിജയത്തിന്റെ മാറ്റു കൂട്ടുന്നത്.അമ്പേ തകര്‍ന്നടിഞ്ഞിരിക്കുന്ന മതേതര കക്ഷികള്‍ക്ക് ആത്മവിശ്വാസവും ഉണര്‍വ്വും പകരുന്നതാണ് ഈ വിജയം എന്നതുകൂടി എടുത്തുപറയേണ്ടിരിക്കുന്നു.
            എതിരാളി അമിത് ഷാ ആണെങ്കില്‍ വിജയിക്കുന്നതിന് വേണ്ടി ഏതറ്റം വരേയും പോകും എന്ന ബോധ്യത്തില്‍ നിന്നാണ് അഹമ്മദ് പട്ടേലും കൂട്ടരും കോണ്‍‌ഗ്രസിന് ഉറപ്പുള്ള നാല്പത്തിനാലു എം എല്‍ എമാരെ ബാംഗ്ലൂരിലെ റിസോര്‍ട്ടിലേക്ക് എത്തിച്ച് കുതിരക്കച്ചവടം ഒഴിവാക്കിയെടുത്തത്.ജെ ഡി യുവിന്റെ ഒന്നും എന്‍ സി പിയുടെ ഒന്നും ബി ജെ പി വിമതന്റെ ഒന്നും വോട്ടുകള്‍ പട്ടേല്‍ നേടി. അതോടൊപ്പം രണ്ടു വിമത കോണ്‍ഗ്രസ് എം എല്‍  എമാരുടെ വോട്ട് തിരഞ്ഞെടുപ്പുകമ്മീഷന്‍ അസാധുവാക്കിയതോടെ വിജയം അഹമ്മദ് പട്ടേലിനെ തേടിയെത്തുകയായിരുന്നു.
            രാഷ്ട്രീയമായി ഏറെ പ്രാധാന്യമുള്ള , ഇന്ത്യയുടെയാകെ ശ്രദ്ധ പിടിച്ചു പറ്റിയ ഒരു തിരഞ്ഞെടുപ്പായിരുന്നു ഗുജറാത്തില്‍ നടന്നത്.കോണ്‍ഗ്രസിന്റെ പ്രധാനപ്പെട്ട നേതാക്കളിലൊരാളായ ജയ്റാം രമേഷ് , പ്രധാനമന്ത്രി നരേന്ദ്രമോദിയും അമിത് ഷായും ചേര്‍ന്നൊരുക്കുന്ന തന്ത്രങ്ങളില്‍ നിന്ന് രക്ഷപ്പെടണമെങ്കില്‍ കോണ്‍ഗ്രസ് ഒറ്റക്കെട്ടായി മുന്നോട്ടു പോകേണ്ടതിന്റെ ആവശ്യകതയെക്കുറിച്ച് സൂചിപ്പിച്ചത് കഴിഞ്ഞ ദിവസങ്ങളിലാണ്. പാര്‍ട്ടിയില്‍ അടിമുടി മാറ്റം വരണമെന്നും നയസമീപനങ്ങളെക്കുറിച്ച് പുനശ്ചിന്തിക്കണമെന്നും അദ്ദേഹം പറഞ്ഞു.കോണ്‍ഗ്രസ് നേരിടുന്നത് വെറും തിരഞ്ഞെടുപ്പ് പ്രതിസന്ധി മാത്രമല്ലെന്നും , കോണ്‍ഗ്രസിന്റെ നിലനില്പുതന്നെ പ്രതിസന്ധിയിലായിരിക്കുക യാണെന്നും അദ്ദേഹം പറഞ്ഞത് വസ്തുതയായിരുന്നു. എന്നാല്‍ ഗുജറാത്തിലെ വിജയം മതേതരമനസ്സുകളില്‍ ആഹ്ലാദമുണ്ടാക്കുന്നുണ്ട്. ദീര്‍ഘവീക്ഷണ ത്തോടെയും കൃത്യമായ പ്ലാനിംഗിലൂടേയും കാര്യങ്ങള്‍ നടപ്പിലാക്കാന്‍ കഴിഞ്ഞാല്‍ ഇനിയും കോണ്‍ഗ്രസിന് തിരിച്ചു വരാന്‍ കഴിയും എന്നാണ് ഗുജറാത്ത് നമ്മെ പഠിപ്പിക്കുന്നത്. അമിത് ഷായേയും നരേന്ദ്ര മോദിയേയും മറികടക്കാന്‍ കഴിയുന്ന തന്ത്രശാലികളുടെ ഏകോപനമാണ് ഉണ്ടാവേണ്ടത്. കഴിവില്ലാത്തവരെ തലപ്പത്തു നിലനിറുത്തുന്ന രീതി ഒഴിവാക്കപ്പെടണം. രാജ്യം നേരിടുന്ന പ്രതിസന്ധിയെക്കുറിച്ച് മനസ്സിലാക്കാനും ഉത്തരവാദിത്തബോധത്തോടെ പ്രതികരിക്കാനും കഴിയുന്നവരെയാണ് ഇന്ന് നമുക്കാവശ്യം. അത്തരക്കാരെ കണ്ടെത്താനും നേതൃത്വത്തിലേക്ക് എത്തിക്കാനും കോണ്‍ഗ്രസ് പാര്‍‌ട്ടിക്ക് കഴിയേണ്ടതുണ്ട്.

Tuesday, August 8, 2017

#ദിനസരികള്‍ 118


            രാഷ്ട്രീയപാര്‍ട്ടികളിലെ ഗ്രൂപ്പിസവും വ്യക്തിതാല്പര്യങ്ങളും അതാതു പാര്‍ട്ടികളില്‍    ഒരുപാടു രക്തസാക്ഷികളെ സൃഷ്ടിച്ചിട്ടുണ്ട്. മൂല്യബോധമില്ലാത്ത വ്യക്തികള്‍ , തങ്ങള്‍ വിശ്വസിക്കുന്ന ആശയങ്ങള്‍ക്ക് അപ്പുറം അധികാരത്തിന് വേണ്ടിയുള്ള അത്യാര്‍ത്തികളും അതു നിലനിറുത്തുന്നതിന് വേണ്ടി നടത്തുന്ന കരുനീക്കങ്ങളും ഏതു വിധേനയും എതിരാളിയെ തകര്‍ക്കുക എന്ന ലക്ഷ്യം വെച്ചാകുമ്പോള്‍ , ആദ്യം ചത്തു വീഴുന്നത് താന്‍ വിശ്വസിക്കുകയും പ്രചരിപ്പിക്കുകയും ചെയ്യുന്ന ആശയംതന്നെയായിരിക്കും , രണ്ടാമതാണ് ഉന്നം വെച്ച വ്യക്തിയുടെ വീഴ്ച സംഭവിക്കുന്നത്. അങ്ങനെ വീണുപോയ ഒരു വ്യക്തിയാണ് എന്‍ സി പിയുടെ കേരളഘടകം പ്രസിഡന്റായിരുന്ന സഖാവ് ഉഴവൂര്‍ വിജയന്‍ എന്ന് കലാകൌമുദിയില്‍ പി എം ബിനുകുമാര്‍ എഴുതിയ , ഉഴവൂര്‍ വിജയന്റെ അന്ത്യം എന്ന ലേഖനത്തില്‍ പറയുന്നു.കേരളത്തിന്റെ രാഷ്ട്രീയ നഭോമണ്ഡലത്തില്‍ വ്യതിരിക്തവും വ്യക്തവുമായ ശബ്ദം കേള്‍പ്പിച്ച വ്യക്തിയായിരുന്നു ശ്രീ ഉഴവൂര്‍ . തനിക്ക് പറയാനുള്ളത് തമാശയുടെ മേമ്പൊടികള്‍ ചേര്‍ത്ത് ആരേയും വേദനിപ്പിക്കാതെ ഉഴവൂര്‍ വിജയന്‍ അവതരിപ്പിക്കുമ്പോള്‍ വിമര്‍ശനത്തിന് ശരവ്യനാകുന്ന എതിരാളിപോലും ചിരിച്ചുപോകും എന്നതൊരു വസ്തുതയാണ്. അങ്ങനെ എതിരാളിയെപ്പോലും ചിരിപ്പിച്ചിരുന്ന വിജയന് , പക്ഷേ സ്വന്തം പാര്‍ട്ടിയില്‍ നിന്ന് നേരിടേണ്ടിവന്നത് അതിരൂക്ഷമായ സമാനതകളില്ലാത്ത മാനസിക പീഢനമായിരുന്നു എന്നാണ് പുറത്തു വന്നുകൊണ്ടിരിക്കുന്ന വാര്‍ത്തകള്‍ സൂചിപ്പിക്കുന്നത്
            മാന്യനും സത്യസന്ധനുമായ ഒരു രാഷ്ട്രീയക്കാരനായിരുന്നു ഉഴവൂരെന്നാണ് കേരള ജനത ചിന്തിക്കുന്നത്. ഒരു പഞ്ചായത്ത് മെമ്പര്‍ പോലുമാകാതെ സമുന്നതനായ നേതാവായി മാറിയ വിജയനെ ഇടതുപക്ഷവും അര്‍ഹിക്കുന്ന തരത്തില്‍ പരിഗണിച്ചിരുന്നു. മതേതരത്വത്തോട് വിട്ടുവീഴ്ചയില്ലാത്ത കൂറു പുലര്‍ത്തിയിരുന്ന വിജയന്റെ ആകസ്മികമായ ആ നിര്യാണത്തിന് പിന്നില്‍ സ്വന്തം പാര്‍ട്ടിയിലെ നേതാക്കന്മാര്‍തന്നെയാണെന്ന വിവരം ആദ്യം പുറത്തുവിട്ടത് എന്‍ സി പിയുടെ തന്നെ സംസ്ഥാന കമ്മറ്റി അംഗമായിരുന്ന സതീഷ് കല്ലക്കുളമാണ്.കായംകുളത്തെ ഒരു വീടിന്റെ പാലുകാച്ചല്‍ ചടങ്ങില്‍ പങ്കെടുത്ത വിജയനെ ആ പ്രദേശത്തെ ഒരു നേതാവ് വിളിച്ചു.സതീഷ് പറയുന്നു :- “വിജയേട്ടന്‍ ഫോണില്‍ സംസാരിക്കുന്നത് ചെവിയില്‍ നിന്നും അകറ്റിപ്പിടിച്ചാണ്.നേതാവ് വിജയേട്ടനെ തുടരെത്തുടരെ തെറി വിളിക്കുകയായിരുന്നു.അയാള്‍‌ക്കെതിരെ തിരഞ്ഞെടുപ്പില്‍ മത്സരിച്ച ബന്ധുവിന്റെ വീട്ടിലാണത്രേ വിജയന്‍ പാലുകാച്ചലിന് പോയത്. നേതാവിന്റെ അനിയനാണ് തന്നെ സ്വീകരിച്ചതെന്ന് പറഞ്ഞപ്പോഴും തെറി വിളി തുടര്‍ന്നു.പെട്ടെന്ന് വിജയേട്ടന്റെ ശരീരം വിയര്‍ത്തു.അദ്ദേഹം പതിവിന് വിപരീതമായി ക്ഷോഭിച്ചു.ഞാന്‍ കാര്‍ ഒതുക്കി നിറുത്തി.എന്റെ ഫോണ്‍ വിജയേട്ടന്റെ ഫോണിനോട് ചേര്‍ത്തു. ഉച്ചത്തിലുള്ള തെറികള്‍ റെക്കോര്‍ഡു ചെയ്തു.പെട്ടെന്ന് വിജയേട്ടന്‍ വിറക്കാന്‍ തുടങ്ങി.ഞാന്‍ ഫോണ്‍ പിടിച്ചുവാങ്ങി ഹലോ പറഞ്ഞപ്പോള്‍ അപ്പുറത്ത് ഡിസ്കണക്ടായി സതീഷിന്റെ വാക്കുകളില്‍ നിന്ന് ഒരു പാര്‍ട്ടിനേതാവിനും ഉണ്ടാകാന്‍ പാടില്ലാത്ത ദുര്യോഗമാണ് ഉഴവൂരിനുണ്ടായതെന്ന് മനസ്സിലാക്കാം. അതേ നേതാവുതന്നെ പിന്നീട് പത്തുലക്ഷം രൂപയുടെ അഴിമതി ആരോപണവും വിജയനെതിരെ ഉന്നയിച്ചു. മാനസികമായി ഉണ്ടായ ഈ പീഢനമാണ് ഉഴവൂരിന്റെ പെട്ടെന്നുള്ള മരണത്തിന് കാരണമായതെന്ന് അദ്ദേഹത്തിന്റെ സഹധര്‍മിണിയായ ചന്ദ്രമണിയും പറയുന്നു.

            യാതൊരു മൂല്യബോധവുമില്ലാത്ത, തങ്ങളുടെ ഇഷ്ടം മാത്രം നടപ്പിലാകണമെന്നു വാശി പിടിക്കുന്ന ചിലരാണ് പൊതുജനങ്ങളുടെ ഇടയില്‍ പ്രവര്‍ത്തിക്കുന്ന നല്ലവരായ രാഷ്ട്രീയ പ്രവര്‍ത്തകരുടെ യശസ്സുകൂടി ഇല്ലാതാക്കുന്നത്.അവര്‍ ഗ്രൂപ്പുകളുണ്ടാക്കുകയും തങ്ങളുടെ ഗ്രൂപ്പില്‍ പെടാത്തവരെ ഇല്ലാതാക്കുവാന്‍ ശ്രമിക്കുകയും ചെയ്യുന്നു. ഉഴവൂരിനുണ്ടായ തിക്താനുഭവം ഈ ശ്രണിയില്‍ അവസാനത്തേതാകട്ടെ എന്ന് ആഗ്രഹിക്കുകയല്ലാതെ മറ്റെന്തു ചെയ്യാന്‍ .

Monday, August 7, 2017

#ദിനസരികള്‍ 117

( സര്‍ക്കാസം അഥവാ നിന്ദാസ്തുതി മനസ്സിലാകാത്തവര്‍ ഈ പോസ്റ്റ് വായിക്കരുത് എന്ന് അപേക്ഷിക്കുന്നു എന്നൊരു മുന്‍കുറിപ്പ് ചേര്‍ക്കേണ്ടി വന്നതാണ് ഈ കുറിപ്പിന്റെ ദുര്യോഗം )
ഉയര്‍ന്ന സാക്ഷരത , ഉന്നതമായ മൂല്യബോധം , ഉദാത്തമായ മനുഷ്യസ്നേഹം ആഹാ മലയാളികളുടെ ഗുണഗണങ്ങള്‍ക്ക് ആകാശത്തോളം ഔന്നത്യമുണ്ട്. ആഴിയോളം ആഴമുണ്ട്. ഹിമാലയത്തോളം അചഞ്ചലത്വമുണ്ട്. എടുത്തു പറയുകയാണെങ്കില്‍ ഇനിയും ഒരുപാടു സവിശേഷതകളുണ്ട് നമ്മുടെ കേരളത്തിന്. അതില്‍ അഭിമാനം കൊള്ളാത്ത മലയാളികളുണ്ടാവില്ല.മറ്റുള്ളവരെ സ്നേഹിക്കാനും സഹായിക്കാനും മലയാളികള്‍ എന്നും മുന്നിലുണ്ടാകും.നാം ലോകത്തിന് തന്നെ മാതൃക എന്നാണ് നമ്മളില്‍ പലരും വിശ്വസിക്കുന്നതും പാടി നടക്കുന്നതും. അവകാശ വാദങ്ങളെല്ലാം തന്നെ സത്യവുമാണ് .മലയാളിപ്പോലെ മലയാളി മാത്രം. ഇനിയും എത്ര വേണം വിശേഷണങ്ങള്‍.കവിതകളിലൂടെ കഥകളിലൂടെ നീതിസാരങ്ങളിലൂടെ നാടന്‍ പാട്ടുകളിലൂടെ പശ്ചമഘട്ടങ്ങള്‍ കേറി മറിഞ്ഞ് അന്യനാടുകളിലേക്കെത്തി നില്ക്കുന്നു മലയാളിയുടെ തിളക്കമേറിയ ജീവിതകഥകള്‍. ഞാനും നിങ്ങളും അതിലഹങ്കരിക്കുന്നു ഊറ്റം കൊള്ളുന്നു. അഭിമാനിക്കുന്നു.
            അതിനിടയിലാണ് ആ മലയാള മനോരമ പത്രം ഒന്നാം പേജില്‍ വൃത്തികെട്ട , നമ്മുടെ നിറം കെടുത്തുന്ന ഒരു  വാര്‍ത്തയുമായി വന്നെത്തുന്നത്. മറ്റൊരു പ്രധാന പത്രത്തിലും പ്രസ്തുത വാര്‍ത്തയില്ല.മറ്റാരും അറിഞ്ഞിട്ടില്ലാത്ത ഈ വാര്‍ത്ത ഈ മനോരമക്കെവിടെ നിന്ന് കിട്ടി? ഒന്നാം പേജില്‍ വെണ്ടക്കാവലുപ്പത്തില്‍ ചുവന്ന അക്ഷരത്തില്‍ സര്‍വ്വരുടേയും ശ്രദ്ധ ഒറ്റ നോട്ടത്തില്‍ കിട്ടുന്ന തരത്തില്‍ കൊടുത്തതും പോര , പത്രാധിപരുടെ വക അതേ വിഷയത്തില്‍ എഡിറ്റോറിയലും ചേര്‍ത്തിരിക്കുന്നു.കഷ്ടമേ കഷ്ടം. ഈ മനോരമ ഇങ്ങനെ അധപതിക്കാമോ ? മലയാളികളെ ഇങ്ങനെ ആക്ഷേപിക്കാമോ ? നമ്മുടെ മനുഷ്യപ്രേമത്തെ അധിക്ഷേപിക്കാമോ ? നാം ഉയര്‍ത്തിപ്പിടിക്കുന്ന ചിരന്തനമായ മൂല്യബോധങ്ങളെ നിരാകരിക്കാമോ?
            മനോരമ ചെയ്ത ചതി നിങ്ങളറിയണം സുഹൃത്തുക്കളേ. ഏതോ ഒരു മുരുകന്‍. അതും അന്യസംസ്ഥാന തൊഴിലാളി. ഉറ്റവരും ഉടയവരും കൂടെ ഇല്ലാത്തവന്‍. കൊല്ലത്തെ ചാത്തന്നൂരിനടുത്ത് ഇത്തിക്കര വളവില്‍ വെച്ച് ബൈക്കുകള്‍ തമ്മില്‍ കൂട്ടിയിടിച്ച് ഈ മുരുകന് ഗുരുതരമായി പരിക്കേറ്റുവത്രേ ! സംഭവം നടക്കുന്നത് രാത്രി പത്തരമണിയോടെയാണ്.തൊട്ടടുത്തുള്ള ആശുപത്രിയില്‍ എത്തിച്ചപ്പോള്‍ പരിക്ക് ഗുരുതരമായതിനാല്‍ ആ ആശുപത്രിയില്‍ വെന്റിലേറ്റര്‍ ഇല്ലാത്തതിനാല്‍ അടുത്ത ആശുപത്രി നോക്കണമെന്ന് പറഞ്ഞു.വെന്റിലേറ്ററുള്ള ആശുപത്രിയില്‍ എത്തിച്ചപ്പോള്‍ കൂടെ നില്ക്കാന്‍ ആളുണ്ടെങ്കിലേ അഡ്മിറ്റു ചെയ്യൂ എന്നാണ് അവര്‍ പറഞ്ഞത്.അത് വിചിത്രമായ ന്യായമാണെന്ന് മനോരമ.പിന്നേ , ആരോരുമില്ലാത്തവരെ നോക്കാനല്ലേ കോടികള്‍ മുടക്കി ആശുപത്രി കെട്ടിയിട്ടേക്കുന്നത് ഒന്ന് പോ എന്റെ മനോരമേ . തുടര്‍ന്ന് തിരുവനന്തപുരം മെഡിക്കല്‍ കോളേജില്‍ . ഒരു മൂന്നുമണിക്കൂര്‍ അവിടെ കാത്തു കിടന്നു. ചുറ്റുവട്ടത്തുള്ള ആശുപത്രിയിലൊക്കെ അന്വേഷിച്ചു.ആരും അഡ്മിറ്റ് ചെയ്യാന്‍ തയ്യാറായില്ല പോലും.കൊല്ലത്ത് വെന്റിലേറ്ററുണ്ടെന്ന് അറിഞ്ഞ് അവിടെയെത്തിച്ചപ്പോള്‍ ന്യൂറോ സര്‍ജ്ജനില്ലത്രേ ! മറ്റാശുപത്രികള്‍ നോക്കുമ്പോഴേക്കും മുരുകന്റെ നില വഷളായിയത്രേ . അവസാനം കൊല്ലം ജില്ലാ ആശുപത്രിക്കുമുന്നില്‍ അപകടം നടന്നിട്ട് ഏഴരമണിക്കൂര്‍ കഴിഞ്ഞ് മുരുകന്‍ അതേ ആംബുലന്‍സില്‍ മരിച്ചത്രേ !

            ഇതാണ് സംഭവം. ആ സംഭവമാണ് മനോരമ ഊതിപ്പെരുപ്പിച്ച് ഒന്നാംപേജിലെ വാര്‍ത്തയും എഡിറ്റോറിയലുമൊക്കെയാക്കിയത്.ആശുപത്രിക്കാര് മനസ്സാക്ഷിയില്ലാത്തവരാണ്. ചികിത്സ നിഷേധിക്കപ്പെട്ടു. പ്രാഥമിക ചികിത്സ കൊടുക്കാന്‍ പോലും തയ്യാറായില്ല. കടുത്ത അനീതി. ഗുരുതരമായ അപകടങ്ങളില്‍പ്പെടുമ്പോള്‍ കൂട്ടിരിക്കാന്‍ ആളുവേണമെന്ന് ശഠിച്ചു.ഇങ്ങനെ എന്തൊക്കെ ആരോപണങ്ങളാണെന്നോ മനോരമ നിരത്തുന്നത്. ഇതൊന്നും മലയാളികള്‍ ചെയ്യുന്ന കാര്യങ്ങളല്ലെന്ന് നമുക്കറിയാമല്ലോ? മലയാളികളെ അപമാനിക്കാന്‍ മനോരമ ഓരോന്നും എഴുതിക്കൂട്ടുകയാണ്. അത്രമാത്രം ഹൃദയത്തെ തൊടുന്നരീതിയിലുള്ള ഈ എഴുത്ത് കണ്ണുനിറയാതെ നിങ്ങള്‍ക്ക് വായിക്കാന്‍ കഴിയില്ല.കാരണം മറ്റൊരാളുടേയും സങ്കടം കണ്ടുനില്ക്കാന്‍ നമുക്ക് കഴിയില്ലല്ലോ. ഉയര്‍ന്ന സാക്ഷരത , ഉന്നതമായ മൂല്യബോധം , ഉദാത്തമായ മനുഷ്യസ്നേഹം നമ്മള്‍ മലയാളികള്‍ !! ഹാ .. എന്റെ മലയാളമേ !!

Sunday, August 6, 2017

#ദിനസരികള്‍ 116


ഭൂട്ടാനുമായി ഇന്ത്യയും ചൈനയും അതിര്‍ത്തി പങ്കിടുന്ന ദോക്‌ലാമില്‍ ചൈന അനധികൃതമായി നിര്‍മാണ പ്രവര്‍ത്തികള്‍ നടത്തുന്നത് സൈനിക സാന്നിധ്യമുപയോഗിച്ച് ഇന്ത്യ തടഞ്ഞത് ഒരു യുദ്ധമുഖം തുറക്കുന്നു എന്ന തോന്നല്‍ ഉളവാക്കുന്നതാണ്.ചൈന സൈനിക നടപടിയിലേക്ക് നീങ്ങുന്നു എന്ന് മാധ്യമങ്ങള്‍ റിപ്പോര്‍ട്ട് ചെയ്യുന്നു. ഭൂട്ടാനും ചൈനയും തമ്മിലുള്ള തര്‍ക്കത്തില്‍ ഇന്ത്യക്കെന്തു കാര്യം എന്ന് ചിന്തിക്കുന്നവരുണ്ടാകാം എന്നാല്‍ 2007 ല്‍ ഇരുരാജ്യങ്ങളും തമ്മിലുണ്ടാക്കിയ കരാറനുസരിച്ച് ഭൂട്ടാന്‍ ആവശ്യപ്പെടുന്ന പക്ഷം സൈനികസഹായം നല്കാന്‍ ഇന്ത്യ ബാധ്യസ്ഥമാണ്. അതിന്റെ അടിസ്ഥാനത്തിലാണ് ഇന്ത്യന്‍ സൈന്യം തര്‍ക്ക സ്ഥലത്ത് എത്തിയിരിക്കുന്നത്. അതിര്‍ത്തിയില്‍ നിലനില്ക്കുന്ന സ്ഥിതി മാറ്റുവാന്‍ ചൈന ശ്രമിക്കുന്നു എന്ന ആക്ഷേപം ഭൂട്ടാന്‍ സര്‍ക്കാര്‍ ഉന്നയിക്കുന്ന കാലത്തോളം ഇന്ത്യക്ക് ദോക്ല വിട്ടുപോകുവാന്‍ കഴിയാത്ത സാഹചര്യമാണ്.എന്നാല്‍ തങ്ങളുടെ പ്രദേശത്താണ് റോഡുപണിയുള്‍‌പ്പെടെയുള്ള നിര്‍മാണ പ്രവര്‍ത്തികള്‍ നടത്തുന്നതെന്നും അതിന് തങ്ങള്‍ക്ക് അവകാശമുണ്ട് എന്നുമാണ് ചൈന വാദിക്കുന്നത്.മാത്രവുമല്ല , ഇന്ത്യ അനധികൃതമായി തങ്ങളുടെ അതിര്‍ത്തിയിലേക്ക് അതിക്രമിച്ചു കയറിയിരിക്കുന്നുവെന്നും ഇന്ത്യന്‍ സൈനികരെ  ഉടന്‍ പിന്‍വലിക്കണം എന്നും അവര്‍ ആവശ്യപ്പെടുന്നു.ചൈനയുടെ ഔദ്യോഗിക മാധ്യമമായ ഗ്ലോബല്‍ ടൈംസ് പലതവണ ശക്തമായ മുന്നറിയിപ്പ് ഉയര്‍ത്തിക്കഴിഞ്ഞു.ഫലത്തില്‍ ഒരു യുദ്ധത്തിലേക്കാണ് നാം കൂപ്പുകുത്തുന്നത് എന്ന ധാരണ വേരുറച്ചിട്ടുണ്ട്.
            ഒന്ന് കാഞ്ചിവലിക്കാനുള്ള ഒരു സെക്കന്റ് സമയം മതി ഒരു മഹായുദ്ധം പൊട്ടിപ്പുറപ്പെടാന്‍. പക്ഷേ വര്‍ഷങ്ങള്‍ പ്രയത്നിച്ചാലും അതുണ്ടാക്കുന്ന കെടുതിയില്‍ നിന്ന് നാം മുക്തരാകില്ല എന്ന ബോധം ഇരുരാജ്യങ്ങള്‍ക്കും ഉണ്ടാകേണ്ട സമയമാണിത്. വിട്ടുവീഴ്ചാമനോഭാവത്തോടുകൂടിയ ഉഭയകക്ഷി ചര്‍ച്ചകളിലൂടെ വിഷയം പരിഹരിക്കപ്പെടണം. സൈനികശക്തിയുടെ കാര്യത്തില്‍ ചൈന അമേരിക്കയുടെ മുകളിലാണെന്നുപോലും വിലയിരുത്തലുകളുണ്ടായിട്ടുണ്ട്. ചൈനയെപ്പോലെതന്നെ ഇന്ത്യയും ആണവശക്തിയാണ്. ഒരു യുദ്ധമുണ്ടായാല്‍ എത്ര കോടി ജനങ്ങള്‍ കൊല്ലപ്പെടുമെന്ന് തിട്ടപ്പെടുത്താന്‍ കഴിയില്ല. ഉണ്ടാക്കുന്ന വിനാശങ്ങള്‍ക്ക് അവസാനമുണ്ടാകില്ല.ആയുധങ്ങളുടെ വലുപ്പമോ പ്രഹരശേഷിയോ അല്ല അതിര്‍ത്തി നിര്‍ണയത്തില്‍ ചര്‍ച്ച നടത്തേണ്ടത്. പരസ്പര ബഹുമാനങ്ങളോടെയുള്ള നയതന്ത്രബന്ധങ്ങളാണ്.അതുകൊണ്ട് അനാവശ്യ പിടിവാശികള്‍ മാറ്റിവെച്ച് വിഷയം ചര്‍ച്ച ചെയ്യുന്നതിനുള്ള ശ്രമങ്ങള്‍ തുടരണം. അതിന് ഇന്ത്യ മുന്‍‌കൈ എടുക്കണം.നമ്മള്‍ യുദ്ധത്തിന് വേണ്ടിയല്ല സമാധാനത്തിന് വേണ്ടി നിലകൊള്ളുന്നവരാണെന്ന് ലോകത്തോട് പ്രഖ്യാപിക്കുവാന്‍ ഈ അവസരം ഉപയോഗപ്പെടുത്തണം.