#ദിനസരികള്‍ 115

കേരളത്തിന്റെ പ്രിയപ്പെട്ട മുഖ്യമന്ത്രിക്ക് ,

കോഴിക്കോട് ഗുരുവായൂരപ്പന്‍ കോളേജിലെ രണ്ടാം വര്‍ഷ വിദ്യാര്‍ത്ഥിയായ അതുല്‍ ശ്രീവ എന്ന യുവകലാകാരനെ പോലീസ് അറസ്റ്റു ചെയ്യുകയും പതിമൂന്നു ദിവസം ജയിലടക്കുകയും ചെയ്ത സംഭവം അങ്ങയുടെ ശ്രദ്ധയില്‍ പെടുത്താന്‍ ഈ അവസരം ഉപയോഗിക്കട്ടെ.മിനി സ്ക്രീനിലൂടെ ശ്രദ്ധിക്കപ്പെട്ട അതുല്‍ ശ്രീവ , മറ്റു വിദ്യാര്‍ത്ഥികളെ മര്‍ദ്ദിച്ച് പണം തട്ടാന്‍ ശ്രമിച്ചു എന്നും , ഗുണ്ടാ പ്രവര്‍ത്തനം നടത്തി എന്നുമാണ് പോലീസിന്റെ ആരോപണങ്ങള്‍ . കൊലപാതകശ്രമം അടക്കമുള്ള കേസുകള്‍ ചുമത്തപ്പെട്ടിട്ടുണ്ട്.കോഴിക്കോട് കസബ പോലീസാണ് അതുലിനെ അറസ്റ്റു ചെയ്ത് ജയിലിലടച്ചത്. അതുലിന്റെ അറസ്റ്റിനു ശേഷം  പഠിക്കുന്ന സ്ഥാപനത്തിലെ വിദ്യാര്‍ത്ഥികള്‍ അയാള്‍ നിരപരാധിയാണെന്നും പോലീസ് ബോധപൂര്‍വ്വം അതുലിനെ കുടുക്കുകയായിരുന്നെന്നും ആക്ഷേപമുന്നയിച്ച് രംഗത്തെത്തിയിട്ടുണ്ട്. നാട്ടുകാരും അയാളെ അറിയുന്നവരുമൊക്കെ അതുല്‍ നിരപരാധിയാണെന്ന് വിശ്വസിക്കുകയും അനുതാപം പ്രകടിപ്പിച്ച് രംഗത്തു വരികയും ചെയ്തിട്ടുണ്ട്.

            അതുല്‍ ജയില്‍ വിമോചിതനായ ശേഷം ഫേസ് ബുക്കില്‍ കുറിച്ചതുകൂടി അങ്ങയുടെ ശ്രദ്ധയില്‍ പെടുത്തട്ടെ അതുല്‍ എഴതുന്നു :- പ്രിയപ്പെട്ടവരേ.. 
കുറച്ചു ദിവസങ്ങൾക് മുൻപ് ഒരു 13 ദിവസം കോഴിക്കോട് ജില്ലാ ജയിലിൽ ആയിരുന്നു... അതിനിടയാക്കിയ സംഭവം എല്ലാവരും അറിഞ്ഞു കാണും.. കോളേജിൽ ഞാൻ എന്റെ ജൂനിയർ വിദ്യാർഥിയെ തല്ലി പണം കവർന്നു (100 രൂപയ്ക്ക് വേണ്ടി ) എന്നതായിരുന്നു കേസ്..

പ്രിയ മാധ്യമ സുഹൃത്തുക്കളോട് ഒരു ചോദ്യം... ഈ സംഭവത്തെ കുറിച്ച് നിങ്ങൾ കോളേജിൽ അന്വേഷണം നടത്തിയിരുന്നു എങ്കിൽ എന്റെ സ്ഥിതി ഇത്ര ദയനീയം അവയില്ലായിരുന്നു. നിങ്ങൾ കള്ളനെന്നും പിടിച്ചുപറിക്കാരൻ, ഗുണ്ടാ തലവൻ എന്നൊക്കെ പറയുമ്പോൾ ഇതേകുറിച്ച് കൃത്യമായി അന്വേഷിക്കാമായിരുന്നു. ഇതാണോ നിങ്ങളുടെ മാധ്യമ ധർമം.....
1. ഒരു പോലീസുകാരന്റെ മകൻ ഒരു കുട്ടിയെ മർദിച്ചാൽ കേസ് തിരിയുന്ന 308,341,392 എന്നുള്ള വകുപ്പുകൾ ചേർക്കുന്ന രീതി.... ആ സുഹൃത്തിന് പരിക്കുകൾ ഇല്ല പക്ഷേ പരിക്കുകൾ ഉണ്ടാക്കി എന്നെ ജയിലിൽ അടയ്ക്കാൻ മാത്രം എന്ത് തെറ്റ് ഞാൻ ചെയ്തു എന്നുള്ളത് നിങ്ങൾ പോലീസുകാർ വ്യക്തമാക്കണം... 
 2. സംഭവം നടന്നയിടത് അതായത് (ഗുരുവായൂരപ്പൻ കോളേജിൽ ) തെളിവെടുപ്പിനായി പോലും പോലീസ് എന്നെ കൊണ്ട് പോയില്ല... 
3. ഞാൻ ഡ്രഗ്സ് യൂസ് ചെയ്യുന്ന ഒരാളായി പോലും പോലീസ് ചിത്റരീകരിച്ചു 
മുടി നീട്ടിയാൽ കഞ്ചാവുവലിക്കാരൻ എന്ന് പറഞ്ഞ പോലീസുകാരാ... RCC അഥവാ റീജിണൽ ക്യാൻസർ സെന്ററിൽ കഴിയുന്ന രോഗികൾക്കാണ് മുടി എന്നുള്ളത് നിങ്ങൾ അറിഞ്ഞിരുന്നില്ല ചോദിച്ചതുമില്ല..... സന്തോഷം നിങ്ങൾ എന്നെ സമൂഹത്തിൽ അങ്ങനെ ആക്കിയതിൽ... 
 3. ഈ പ്രശ്നത്തിൽ ഇടതു കൈക്കു പരിക്ക് പറ്റിയതൊന്നും ആരും അറിഞ്ഞതുമില്ല... 
4. കൂടെ നിന്നും എന്റെ പതനം ആസ്വദിച്ചവർ... ക്രിമിനൽ ആക്കി മാറ്റിയ സുഹൃത്തുക്കൾ.....പക്ഷെ തിരിച്ചു വരും ഇതിലും ശക്തിയോടെ...... എന്റെ നിരപരാധിത്തം തെളിയിക്കാൻ... കൂടെ കൈപിടിക്കാൻ എന്റെ പ്രിയപ്പെട്ടവരും ഉണ്ട്.... സഹപാഠികളുംഎന്തായാലും വളരെ നന്ദി എല്ലാവരോടും ഒരു സാധാരണക്കാരന്റെ ജീവിതം ഇങ്ങനെ ആക്കി തന്നതിൽ കൃതജ്ഞത..... (മാധ്യമ സുഹൃത്തുക്കൾ, കസബ പോലീസ്.... )

            കേരള പോലീസിനെക്കാള്‍ ഞാന്‍ അതുലിന്റെ വാക്കുകളില്‍ വിശ്വസിക്കുന്നു. അത് കേവലമായ മുന്‍ധാരണകളുടെ ഫലമായിട്ടല്ല , മറിച്ച് അനുഭവത്തിലെ പോലീസ് അങ്ങനെയായതുകൊണ്ടാണ്. അതുകൊണ്ട് പ്രസ്തുത വിഷയത്തില്‍ സത്യസന്ധമായ ഒരന്വേഷണം നടത്താന്‍ കേരളത്തിന്റെ മുഖ്യമന്ത്രി എന്ന നിലയില്‍ അങ്ങ് തയ്യാറാകണം.ഭരണസംവിധാനങ്ങളുടെ ദുഷ്പ്രവര്‍ത്തി കൊണ്ട് നമ്മുടെ നാട്ടിലെ ഒരു പൌരനും വേദനിക്കുവാനുള്ള സാഹചര്യം ഈ ഇടതുപക്ഷസര്‍ക്കാറിന്റെ കാലത്ത് ഉണ്ടാകരുത്. ആ യുവകലാകാരനോട് നാം നീതികേട് കാണിച്ചിട്ടുണ്ടെങ്കില്‍ അത് കേരളത്തിന് തീരാകളങ്കമായിരിക്കും. പോലീസിനെ നിയമപരമായി സംഘടിച്ച കുറ്റവാളികളുടെ കൂട്ടായ്മയായി മാറുവാന്‍ അനുവദിച്ചു കൂട. ജനങ്ങളെ സേവിക്കുന്നതിനും സഹായിക്കുന്നതിനുമാണ് പോലീസ് എന്ന് അവരെ ബോധ്യപ്പെടുത്താനുള്ള ബാധ്യത ഇടതുപക്ഷം എന്ന നിലയില്‍ നമുക്കുണ്ട്. അതുകൊണ്ട് അതുല്‍ ശ്രീവ നിരപരാധിയാണെങ്കില്‍ ആ കണ്ണുനീര്‍ തുടക്കുവാന്‍ ഒരു ഭരണാധികാരി എന്ന നിലയിലും ഒരു കമ്യണിസ്റ്റുകാരന്‍ എന്ന നിലയിലും അങ്ങ് തയ്യാറാകണമെന്ന് അഭ്യര്‍ത്ഥിച്ചുകൊണ്ട്

അഭിവാദനങ്ങളോടെ