#ദിനസരികള്‍ 96


മൂന്നാമത്തെ വൈരുധ്യം , പരിഷ്കൃതരെന്ന് കരുതുന്ന അധീശരാഷ്ട്രങ്ങളും ശതകോടികള്‍ വരുന്ന കോളനി രാജ്യങ്ങളിലെ ജനങ്ങളും തമ്മിലുള്ള സംഘര്‍ഷാത്മകവൈരുധ്യമാണ്. ആശ്രിതരാജ്യങ്ങളിലെ ജനതതികളേയും പ്രകൃതിവിഭവങ്ങളേയും പരമാവധി ചൂഷണം ചെയ്യുക എന്ന നയമാണ് എക്കാലത്തും സാമ്രാജ്യത്വം സ്വീകരിച്ചു പോന്നിട്ടുള്ളത്. ആ ചൂഷണത്തിന് സഹായകമായ വിധത്തിലും സൌകര്യത്തിലും ആശ്രിതരാജ്യങ്ങളെ അവര്‍ പുതുക്കിപ്പണിയുന്നു. ചരക്കു നീക്കങ്ങളും അധ്വാനശേഷിയെ എളുപ്പത്തില്‍ വിന്യസിക്കുന്നതിനും വേണ്ടി റെയിലുകളും പാളങ്ങളും മറ്റു വാണിജ്യ കേന്ദ്രങ്ങളും അവര്‍ സൃഷ്ടിക്കുന്നു.എന്നാല്‍ ഒരു ഘട്ടമെത്തുമ്പോള്‍ തൊഴിലാളികളിലുണ്ടാകുന്ന ഉണര്‍വ്വ് , ദേശീയ ബോധത്തിന്റെ ഉദയം , സ്വാതന്ത്ര്യഭിവാഞ്ഛ എന്നിവ സാമ്രാജ്യത്വമുന്നേറ്റത്തിന് നേര്‍ക്കുനേര്‍ എതിരാളിയാകുന്നു.സാമ്രാജ്യത്വം അതിന്റെ നിലനില്പിന് ഉപയോഗിച്ചവയൊക്കെ , അവര്‍‌ക്കെതിരെയുള്ള മുന്നേറ്റത്തിന് സഹായകമാകുന്നു.അങ്ങനെ അനഭിലഷണീയമായ ചൂഷണരീതികള്‍ സാമ്രാജ്യത്വത്തിന്റെ തന്റെ വിനാശത്തിന് കാരണമാകുന്നു.
            സാമ്രാജ്യത്വവും അതിലെ വൈരുധ്യങ്ങളും ഏറ്റവും ഉച്ചസ്ഥായിയില്‍ നിന്നിരുന്നത് സാറിസം നടമാടിയിരുന്ന റഷ്യയിലായിരുന്നു എന്നതിനാല്‍ സ്വാഭാവികമായും അവിടെ വിപ്ലവമുന്നേറ്റത്തിന് വിത്തുപാകി.ലോകരാജ്യങ്ങളില്‍ ബ്രിട്ടനടക്കമുള്ള വര്‍ഗ്ഗവിരുദ്ധശക്തികള്‍ ഉണ്ടായിരുന്നെങ്കിലും എന്തുകൊണ്ട് റഷ്യ എന്ന ചോദ്യത്തിന് “Tsarism  was  the concentration of the worst features of imperialism, raised to a high pitch.” എന്നാണ് ലെനിന്‍ കണ്ടെത്തുന്നത്. സാറിസത്തിനെതിരെ വാളോങ്ങുക എന്നു പറഞ്ഞാല്‍ സാമ്രാജ്യത്വത്തിനെക്കൂടി എതിര്‍ക്കുക എന്നതായിരുന്നതിന്റെ കാരണം , അത്രമാത്രം അവ കൂടിക്കുഴഞ്ഞിരുന്നു എന്നുള്ളതാണ്. 1902 ല്‍ ലെനിന്‍ എഴുതിയ What  Is  To  Be Done? എന്ന ഗ്രന്ഥത്തില്‍ റഷ്യയില്‍ അനിവാര്യമയായും സംഭവിക്കേണ്ട വിപ്ലവത്തെക്കുറിച്ച് പ്രവചനാത്മക സ്വഭാവത്തോടെ ഇങ്ങനെ എഴുതി "History  has  now  confronted  us  (i.e.,  the Russian  Marxists )  with  an immediate  task  which  is  the most revolutionary of  all  the immediate tasks that  confront  the  proletariat  of  any country," and that … "the fulfilment of this task, the destruction of the most powerful bulwark, not only of European, but also (it may  now  be  said)  of  Asiatic  reaction, would  make  the  Russian  proletariat  the vanguard  of  the  international revolutionary  proletariat"  (see  Vol.  IV,  p. 382).റഷ്യയിലെ മുന്നേറ്റവും ആ മുന്നേറ്റത്തിന്റെ വിജയവും കമ്യൂണിസത്തിന് കൂടുതല്‍ ഉത്തരവാദിത്തം നല്കി. ഒറ്റപ്പെട്ട ഒരു കമ്യൂണിസ്റ്റ് തുരുത്തായി സോവിയറ്റുനാട് മാറുന്നതിന് പകരം ലോകമാകെയുള്ള കമ്യൂണിസ്റ്റ് മുന്നേറ്റങ്ങള്‍ക്കും അതുവഴി അവശത അനുഭവിക്കുകയും ചൂഷണം ചെയ്യപ്പെടുകയും ചെയ്യുന്ന തൊഴിലാളിവര്‍ഗ്ഗത്തിനും  മോചനത്തിന് അവസരമുണ്ടാക്കുക എന്ന ഭാരിച്ച ഉത്തരവാദിത്തം കൂടി റഷ്യന്‍ സഖാക്കളിലുണ്ടായി. അത് സ്വാഭാവികവുമായിരുന്നു.ആ സ്വാഭാവികതയുടെ സാക്ഷാത്കാരമായാണ് ലെനിനിസം ഉടലെടുത്തത്.അഥവാ ലെനിനിസത്തിന്റെ ചരിത്രപരമായ ദൌത്യം അതായിരുന്നു എന്നു പറയാം. 

Comments

Popular posts from this blog

#ദിനസരികള്‍ 1192 - കടമ്മനിട്ടയുടെ മകനോട്

#ദിനസരികള്‍ 389 മലയാളത്തിലെ ഖണ്ഡകാവ്യങ്ങള്‍ -1