#ദിനസരികള്‍ 93
1878 ല്‍ ജനിച്ച
ജോസഫ് സ്റ്റാലിന് 1922 മുതല്‍ 1953 ല്‍ മരിക്കുന്നതുവരെ സോവിയറ്റു കമ്യൂണിസ്റ്റ്
പാര്‍ട്ടിയുടെ അനിഷേധ്യമുഖമായിരുന്നു. ഉരുക്കുമനുഷ്യന്‍ എന്ന അപരനാമധേയത്തില്‍
അറിയപ്പെട്ട സ്റ്റാലിന് ,
രണ്ടാംലോകമഹായുദ്ധത്തില്‍ നാസികളുടെ മുന്നേറ്റത്തിന് തടയിടാന്‍
കഴിഞ്ഞതോടെ സോവിയറ്റ് യൂണിയനെ ലോകത്തിലെതന്നെ പ്രധാനശക്തിയാക്കി മാറ്റാന്‍
കഴിഞ്ഞു. ജനകീയമുന്നേറ്റങ്ങള്‍ക്ക് വിഘാതമായി നില്ക്കുന്നവരെ നേരിടുന്നതില്‍
സ്റ്റാലിന് സവിശേഷമായ ഒരു രീതിയുണ്ടായിരുന്നു. സ്റ്റാലിനിസം എന്ന് പിന്നീട്
അറിയപ്പെട്ട ആ രീതി സോവിയറ്റ് യൂണിയനെ അജയ്യ ശക്തിയായി അക്കാലങ്ങളില്‍ നിലനിറുത്താന്‍
സഹായകമായി.സ്റ്റാലിന് ആരംഭിച്ച പഞ്ചവത്സര പദ്ധതികളാണ് സോവിയറ്റ് യൂണിയനെ ഒരു കാര്‍ഷിക
പ്രാധാന്യ സമൂഹത്തില്‍ നിന്ന് വ്യവസായവത്കരണത്തിലൂടെ ലോകശക്തിയാക്കി മാറ്റിയത്.
റഷ്യയുടെ മുഖം മാറ്റിയെടുക്കുന്നതില്‍ സ്റ്റാലിന്റെ പങ്ക് അനിഷേധ്യമായിരുന്നു
എങ്കിലും 1936 കളിലെ ഗ്രേറ്റ് പര്‍ജ്ജ് പോലെയുള്ള നീക്കങ്ങള്‍ മൂലം സ്റ്റാലിന്
കടുത്ത വിമര്‍ശനങ്ങള്‍ കേള്‍‌ക്കേണ്ടിവന്നു. ലെനിന്റെ മരണത്തിനുശേഷം
അദ്ദേഹത്തിന്റെ പിന്‍ഗാമിയായി അവരോധിക്കപ്പെട്ട സ്റ്റാലിന് ,
ലെനിനിസത്തെക്കുറച്ച് തന്റെ അനുയായികളില്‍ അവബോധമുണ്ടാക്കുന്നതിനായി എഴുതിയ
പുസ്തകമാണ് The
Foundations of Leninism. പ്രവര്‍ത്തനരംഗത്ത് ലെനിനിസ്റ്റ്
സംഘടന തത്വങ്ങള്‍ എങ്ങനെ നടപ്പിലാക്കാമെന്നും ആ രീതിയുടെ പ്രാധാന്യമെന്തെന്നും
വിവരിക്കുന്ന പ്രസ്തുത പുസ്തകം , I.The Historical
Roots of Leninism, II.Method,III.Theory, IV.The Dictatorship of the Proletariat,
V.The Peasant Question,VI. The National Question,VII.Strategy and Tactics,VIII.The
Party, IX. Style in Work എന്നിങ്ങനെ
ഒമ്പതുഭാഗങ്ങളായി വിഭജിച്ചാണ് വിഷയങ്ങളെ കൈകാര്യം ചെയ്യുന്നത്.
അവതാരികയില്‍ത്തന്നെ
ലെനിനിസം എന്ന വിശാലമായ ഒരു വിഷയം ഒരു പുസ്തകത്തിലേക്ക് ഒതുക്കുവാന്‍ അസാധ്യമാണ്
എന്നും വിശദമായി പ്രതിപാദിക്കണമെങ്കില്‍ ഒരു പരമ്പര തന്നെ ആവശ്യമായി വരുമെന്നും
സ്റ്റാലിന് പറയുന്നുണ്ട്. എന്നിട്ടും ഈ പുസ്തകത്തിന്റെ പ്രസക്തി , ലെനിനിസമെന്ന
പ്രായോഗികപദ്ധതിയുടെ വിവിധ വശങ്ങളിലേക്കുള്ള ചൂണ്ടുപലകയാകുന്നു എന്നതാണെന്ന്
അദ്ദേഹം സൂചിപ്പിക്കുന്നു.മാര്‍ക്സിസ്റ്റായ ലെനിനെ മാര്‍ക്സില്‍ നിന്നും അടര്‍ത്തിമാറ്റി
നിറുത്തിക്കൊണ്ടുള്ള ഒരു പഠനമല്ല ലെനിന്‍ നടത്തുന്നത് , മറിച്ച് ലെനിനെ മാര്‍ക്സിയന്‍
സങ്കല്പനങ്ങളുടെ വെളിച്ചത്തില്‍ വായിച്ചെടുക്കുകയാണ് അദ്ദേഹം ചെയ്യുന്നത്.
“To expound Leninism means to expound the
distinctive and new in the works of Lenin that Lenin contributed to the general
treasury of Marxism and that is naturally connected with his name” എന്ന് അദ്ദേഹം
പറയുന്നത് ഈ അടിസ്ഥാനത്തിലാണ്. (തുടരും )
Comments