Saturday, July 1, 2017

#ദിനസരികള്‍ 80


രണ്ടുമാസം മുന്നേ ഞാനോടിച്ചുകൊണ്ടിരുന്ന വാഹനം ഒരു അപകടത്തില്‍‌പ്പെട്ടു.മറ്റൊരു വണ്ടിയുമായി കൂട്ടിയിടിച്ചുണ്ടായ ആ അപകടത്തില്‍ കാര്യമായ പരിക്ക് ഇരുകൂട്ടര്‍ക്കും പറ്റിയില്ല.ഇടിയുടെ ഫലമായി രണ്ടുവണ്ടികളും ഓവുചാലിലേക്ക് വീണു. ഡോറു തുറന്ന് വണ്ടിയില്‍ നിന്നും പുറത്തിറങ്ങി തൊട്ടപ്പുറത്ത് വീണുകിടക്കുന്ന മറ്റേവണ്ടിക്കാരുടെ സമീപത്തേക്ക് എത്തുമ്പോഴേക്കും ഫോണിലേക്ക് ഓപ്പണ്‍ ന്യൂസര്‍ എന്ന വാര്‍ത്താധിഷ്ടിത ഓണ്‍‌ലൈന്‍ ഗ്രൂപ്പില്‍ നിന്ന് എന്തു പറ്റിയെടാ എന്ന് ചോദിച്ച് സജയന്റെ വിളിയെത്തി. എന്നെ അക്ഷരാര്‍ത്ഥത്തില്‍ വിസ്മയിപ്പിച്ച ഒരു ഫോണ്‍‌കോളായിരുന്നു അത്. അപകടം നടന്ന് ഏതാനും നിമിഷങ്ങള്‍ മാത്രമേ ആയിട്ടുണ്ടായിരുന്നുള്ളു. ആരേയും വിളിച്ചറിയിക്കാനുള്ള സമയം കിട്ടിയിരുന്നില്ല. എന്തു പറ്റി എന്ന് ഞാന്‍തന്നെ ആലോചിച്ചുകൊണ്ടിരിക്കുകയായിരുന്നു. ആ സമയത്ത് എത്തിയ  സജയന്റെ വിളി എന്നില്‍ അമ്പരപ്പുണ്ടാക്കാതെ തരമില്ലല്ലോ.
            വയനാട് ജില്ല കേന്ദ്രീകരിച്ച് പ്രവര്‍ത്തിക്കുന്ന ഓപ്പണ്‍ ന്യൂസര്‍ എന്ന ഓണ്‍‌ലൈന്‍ കൂട്ടായ്മ ആദ്യമായി രൂപീകരിക്കപ്പെട്ടത് വാട്ട്സാപ്പ് രംഗത്താണ്.പിന്നീട് ഫേസ്ബുക്കിലും വെബ് സൈറ്റിലുമൊക്കെയായി പ്രവര്‍ത്തനം വ്യാപിപ്പിച്ച ഓപ്പണ്‍ ന്യൂസര്‍ , ഇപ്പോള്‍ ആപ്പിലേക്കും എത്തിച്ചേര്‍ന്നിരിക്കുന്നു. വിവിധ ഗ്രൂപ്പുകളിലായി ഏകദേശം അയ്യായിരത്തോളം ആളുകള്‍ ഓപ്പണ്‍ ന്യൂസറിനുണ്ട്. അത് പ്രത്യക്ഷ ഉപയോക്താക്കളുടെ  കണക്കാണ്. പരോക്ഷമായി ന്യൂസറിനെ ആശ്രയിക്കുന്നവരുടെ എണ്ണം പതിനായിരക്കണക്കിനാണ്. ഗ്രൂപ്പിലെ അംഗങ്ങളെത്തന്നെ റിപ്പോര്‍ട്ടര്‍മാരാക്കുകയും അവരിലൂടെ നാടിന്റെ നാനാഭാഗത്തും നടക്കുന്ന സംഭവങ്ങളെ ഗ്രൂപ്പ് അഡ്മിനിലേക്ക് എത്തിക്കുകയും ആ സംഭവങ്ങളില്‍ ജനങ്ങള്‍ അറിയേണ്ടവയെ വാര്‍‌ത്തകളാക്കി വിതരണം നടത്തുകയും ചെയ്യുന്നു എന്നുള്ളതാണ് ഓപ്പണ്‍ന്യൂസറിന്റെ പ്രവര്‍ത്തനരീതി. വാര്‍ത്തകളെ വളച്ചൊടിക്കാതെയും കൃത്യതയോടെയും ജനങ്ങളിലേക്ക് എത്തിക്കാന്‍ കഴിഞ്ഞതിന്റെ ഫലമായി ജനങ്ങളുടെയിടയില്‍ വിശ്വാസ്യത ആര്‍ജ്ജിക്കാന്‍ കുറഞ്ഞ കാലം കൊണ്ട് ഓപ്പണ്‍ ന്യൂസറിനായി എന്നത് ഈ ഗ്രൂപ്പിന്റെ അമരക്കാനായ കെ എസ് സജയന് അഭിമാനിക്കാന്‍ വകയുള്ള കാര്യമാണ്.
            ഓപ്പണ്‍ ന്യൂസര്‍ അനുകരണീയമായ ഒരു മാതൃകയാണ്.  മാധ്യമങ്ങളുടെ കുത്തകവത്കരണമുണ്ടാക്കുന്ന പക്ഷപാതിത്തം വാര്‍ത്താപ്രക്ഷേപണത്തിന്റെ ചേരിചേരാനയത്തെ പ്രതികൂലമായി ബാധിച്ചുകൊണ്ടിരിക്കുന്ന മുതലാളിത്തത്തിന്റെ വര്‍ത്തമാനകാലത്ത് ഓപ്പണ്‍ ന്യൂസര്‍ പോലെയുള്ള ജനകീയ കൂട്ടായ്മകള്‍ ഉയര്‍ത്തുന്ന ബദല്‍ സാധ്യതകള്‍ നിഷ്പക്ഷമായ വാര്‍ത്തകള്‍ക്ക് വേണ്ടി കാത്തിരിക്കുന്നവരെ തൃപ്തിപ്പെടുത്തുകതന്നെ ചെയ്യും.
           
           
           
           




Post a Comment