#ദിനസരികള്‍ 57

ത്രീസ്റ്റാറുകള്‍ക്കടക്കം ബാര്‍‌ലൈസന്‍സ് അനുവദിച്ചുകൊണ്ട് സര്‍ക്കാര്‍ പ്രഖ്യാപിച്ച പുതിയ മദ്യനയം സ്വാഗതാര്‍ഹമാണ്. കേരളത്തിന്റെ സമകാലിക സാമൂഹിക അവസ്ഥയെ പരിഗണിച്ചുകൊണ്ടാണ് പുതിയ മദ്യനയം നടപ്പിലാക്കിയിരിക്കുന്നത് . മദ്യത്തിന്റെ ലഭ്യത ഉറപ്പുവരുത്തുകയും അതുവഴി വ്യാജമദ്യദുരന്തം ഉണ്ടാകുന്നത് തടയുകയും ചെയ്യുക എന്ന ഉദ്ദേശമാണ് സര്‍ക്കാരിനുള്ളത്.ജനങ്ങളോട് ഉത്തരവാദിത്തമുള്ള സര്‍ക്കാറിന്റെ  പുതിയ മദ്യനയവും അതുകൊണ്ടുതന്നെ പ്രശംസനീയമാണ്.

            കള്ളുവ്യവസായ മേഖലയില്‍ നിലനില്ക്കുന്ന അരക്ഷിതാവസ്ഥക്ക് പരിഹാരമായി ടൊഡിബോര്‍ഡ് രൂപീകരിക്കാനുള്ള തീരുമാനം ഉചിതമായിട്ടുണ്ട്.അതൊടൊപ്പം ത്രിസ്റ്റാര്‍ മുതലുള്ള ഹോട്ടലുകളില്‍ ശുദ്ധമായ കള്ള് വിതരണം ചെയ്യാനുള്ള സാഹചര്യം ഉണ്ടാകുന്നു എന്നുള്ളത് ഈ മേഖലക്ക് ഗുണപ്രദമാണ്.കള്ളുഷാപ്പുകള്‍ സഹകരണസംഘങ്ങള്‍ക്ക് മാത്രമായി അനുവദിക്കുന്നതിനുള്ള നീക്കം ഉചിതമായിട്ടുണ്ട്. വ്യാജക്കള്ളിന്റെ വ്യാപനം തടയാന്‍ ഇതുവഴി കഴിയുമെന്ന സര്‍ക്കാര്‍ പ്രതീക്ഷ അസ്ഥാനത്താകില്ല എന്നുതന്നെ കരുതാം.

            വര്‍ദ്ധിച്ചുവരുന്ന മദ്യേതരലഹരിവസ്തുക്കളുടെ വ്യാപനം തടയുകയും മദ്യഉപഭോഗം തന്നെ കുറച്ചു കൊണ്ടു വരികയും ചെയ്യുക എന്ന ഉദ്ദേശത്തോടെയുള്ള പ്രവര്‍ത്തനത്തിന് സര്‍ക്കാര്‍ നല്കുന്ന മുന്‍ഗണന പ്രത്യേകം പ്രസ്താവ്യമാണ്. ലഹരി നിര്‍മാര്‍ജ്ജന മിഷനായ വിമുക്തിയുടെ പ്രവര്‍ത്തനം ശക്തിപ്പെടുത്താനുള്ള തീരുമാനം അത്തരമൊരു നിലപാടിന്റെ ഭാഗമാണ്.

            അതൊടൊപ്പംതന്നെ രണ്ടു കാര്യങ്ങളില്‍ക്കൂടി സര്‍ക്കാര്‍ തന്മയത്വത്തോടെ ഇടപെടേണ്ടതുണ്ട് എന്ന് ഞാന്‍ കരുതുന്നു. ഒന്ന് ദേശീയപാതകള്‍ ഡിനോട്ടിഫൈ ചെയ്തുകൊണ്ട് സുപ്രിംകോടതി നിര്‍‌ദ്ദേശിച്ച അഞ്ഞൂറു മീറ്റര്‍ മാനദണ്ഡത്തെ മറികടക്കണം എന്നാണ് എന്റെ പക്ഷം.മുട്ടിന് മുട്ടിന് ആരാധനാലയങ്ങള്‍ ഉള്ള നമ്മുടെ നാട്ടില്‍ ബാറുകളുടെ പുനസ്ഥാപനം വെല്ലുവിളിയാണ്. അതോടൊപ്പം വിദ്യാഭ്യാസസ്ഥാപനങ്ങളുടെ ഒരു കിലോമീറ്റര്‍ പരിധിക്കുള്ളില്‍ മദ്യാലയങ്ങള്‍ പാടില്ല എന്നുകൂടി തീരുമാനിക്കണം. രണ്ടാമത്തേത് , സ്റ്റാറുകളുണ്ടാക്കുന്ന വിവേചനം അവസാനിപ്പിക്കുന്നതിന് ആവശ്യമായ നടപടികള്‍ സ്വീകരിക്കണം. സൌകര്യങ്ങളുടെ പൊതുവായ മാനദണ്ഡം പ്രഖ്യാപിച്ചുകൊണ്ട് ,സ്റ്റാറ്‍ പദവികള്‍ എടുത്തുകളയണം. സൌകര്യങ്ങള്‍ കര്‍ശനമായ വ്യവസ്ഥക്ക് വിധേയമാക്കിക്കൊണ്ട് ബാറുകളുടെ  സ്റ്റാന്റേര്‍ഡ് നിലനിറുത്തണം.

            പതിവുപോലെ പ്രതിപക്ഷം മദ്യനയത്തിനെതിരെ തമാശയും കൊണ്ടു വന്നിട്ടുണ്ട്.സത്യത്തിന്റെ കണിക ലവലേശമേല്ക്കാത്ത ആരോപണങ്ങള്‍. അതു തള്ളിക്കളയാനുള്ള ആര്‍ജ്ജവം കേരളജനത കാണിക്കും എന്ന കാര്യത്തില്‍ സംശയമില്ല.അല്ലെങ്കിലും പ്രതിപക്ഷം പ്രതിപക്ഷത്തിന്റെ വഴിക്കും സത്യം സത്യത്തിന്റെ വഴിക്കുമാണല്ലോ കുറച്ചു കാലമായി സഞ്ചരിക്കുന്നത്.