#ദിനസരികള്‍ 55


            നാടന്‍ ചാരായം ഉണ്ടാക്കുന്നതിന് ഒരു പ്രഷര്‍കുക്കറും മുളപ്പിച്ച കുറച്ചു ധാന്യങ്ങളും മതി.ഇക്കാര്യം ഭരിക്കുന്നവര്‍ക്ക് അറിയില്ലെങ്കിലും ജനങ്ങളില്‍ ഭൂരിപക്ഷം പേര്‍ക്കും അറിയാം.ഭൂരിപക്ഷം പേര്‍ക്കും അറിയാമെങ്കിലും വളരെച്ചെറിയ ഒരു വിഭാഗം മാത്രമേ ഇതിന്റെ പ്രായോഗികതയെക്കുറിച്ച് ചിന്തിക്കാറുള്ളു. അങ്ങനെ പ്രായോഗികതയെക്കുറിച്ച് ചിന്തിക്കുന്നവരില്‍ത്തന്നെ വളരെക്കുറച്ചു പേരേ നടപ്പില്‍ വരുത്തുവാന്‍ ഉദ്യമിക്കാറുള്ളു. ആ ഉദ്യമത്തെയാണ് നമ്മുടെ നിയമം നാടന്‍ വാറ്റ് എന്ന വിഭാഗത്തില്‍‍പ്പെടുത്തി , ശിക്ഷിക്കപ്പെടേണ്ടുന്ന കുറ്റകൃത്യമായി പരിഗണിച്ച് നടപടികള്‍ സ്വീകരിക്കാറുള്ളത്. വില്പനക്ക് വേണ്ടി വന്‍‌തോതിലും വിശേഷാവസരങ്ങളിലേക്കായി വല്ലപ്പോഴും  വ്യക്തിപരമായ ആവശ്യങ്ങള്‍ക്കായി ഇടക്കിടക്കും നാടനുണ്ടാക്കുക എന്നൊരു ശീലം നമ്മുടെ കുഗ്രാമങ്ങളിലെ ജനങ്ങളില്‍ തുടങ്ങിയിട്ടുണ്ടോ എന്ന് പുതിയ പഠനങ്ങളിലൂട കണ്ടെത്തേണ്ടതുണ്ട്.
            ഇത്രയും പറഞ്ഞത് ഒരു സുപ്രഭാതത്തില്‍ എഴുന്നേറ്റുവന്ന് വെളിപാടുണ്ടായ പോലെ നടപ്പിലാക്കേണ്ടുന്ന ഒന്നല്ല മദ്യനിരോധനം എന്ന് സൂചിപ്പിക്കുന്നതിന് വേണ്ടിയാണ്.ആരുടെയെങ്കിലും നാലുപേരുടെ കയ്യടിക്ക് വേണ്ടി ദൂരവ്യാപകമായ പ്രത്യാഘാതങ്ങളുണ്ടാക്കുന്ന മദ്യനിരോധനം പോലെയുള്ള നിരോധനങ്ങള്‍ സമൂഹത്തിന് ഗുണമാണോ ദോഷമാണോ വരുത്തുന്നതെന്ന് ധാര്‍മികതയുടെ പുറംപൂച്ചുകളില്‍ അഭിരമിക്കാത്ത , സ്വന്തമായി ചിന്തിക്കുവാന്‍ കഴിവുള്ളവര്‍  ഒന്ന് ആലോചിച്ചു നോക്കുന്നത് ഉചിതമായിരിക്കും.മദ്യം നിലവിലുണ്ടായിരുന്ന കാലത്തേക്കാള്‍ എത്രയോ ശതമാനം വര്‍ദ്ധനവാണ് ഇതര ലഹരിവസ്തുക്കള്‍ക്ക് ഇപ്പോള്‍ നമ്മുടെ സമൂഹത്തിലുണ്ടായിരിക്കുന്നത് എന്ന തിരിച്ചറിവ് നമ്മെ ഞെട്ടിക്കാതിരിക്കില്ല.സമാന്തരമായ ഒരു ലഹരി സാമ്രാജ്യംതന്നെ പടുത്തുയര്‍ത്തപ്പെട്ടിരിക്കുന്നു എന്നതാണ് വസ്തുത.നമ്മുടെ യുവതലമുറയെ മുക്കിലും മൂലയിലും നിന്ന് ലഹരിയുടെ ഈ ചിലന്തികള്‍ വലയില്‍ കുടുക്കുവാന്‍ ശ്രമിച്ചുകൊണ്ടേയിരിക്കുന്നു. മദ്യംപോലെ ഉപയോഗിച്ചു കഴിഞ്ഞാല്‍ പെട്ടെന്ന് മനസ്സിലാക്കാന്‍ കഴിയാത്തവയാണ് ഈ ലഹരിവസ്തുക്കള്‍ എന്നത് ഉപയോഗിക്കുവാനുള്ള പ്രവണതയെ വര്‍ദ്ധിപ്പിക്കുന്നു. മദ്യം കൊണ്ടുണ്ടാകുന്നതിനെക്കാള്‍ എത്രയോ ഭീകരമാണ് ഇത് എന്ന് നാം മനസ്സിലാക്കണം. ഫലത്തില്‍ മദ്യമെന്ന നീര്‍‌ക്കോലിക്കുപകരം രാജവെമ്പാലകള്‍ നമ്മുടെ സമൂഹത്തില്‍ വിളയാടാന്‍ ഇടവരും എന്നു സാരം
            ജനങ്ങളോട് ഉത്തരവാദിത്തമുള്ള ഒരു സര്‍ക്കാറിനും ഇത്തരം മദ്യനയത്തെ മുറുകെപ്പിടിച്ച് മുന്നോട്ടു പോകാനാവില്ല.നിരോധനത്തിന് പകരം നിയന്ത്രണങ്ങളാണ് വേണ്ടത്.മദ്യം ആവശ്യമില്ല എന്നൊരു തലത്തിലേക്ക് ബോധവത്കരണത്തിലൂടേയും മറ്റു പ്രവര്‍ത്തനങ്ങളിലൂടേയും ജനതയെ എത്തിക്കാനുള്ള ശ്രമമാണ് നടക്കേണ്ടത്.അതല്ലാതെ നിരോധനങ്ങള്‍ അടിച്ചേല്പിക്കാന്‍ ശ്രമിച്ചാല്‍ ദുരന്തങ്ങളാകുമുണ്ടാകും. ആ ദുരന്തങ്ങള്‍ സമൂഹത്തില്‍ അരാജകത്വം സൃഷ്ടിക്കുകയും വരാനിരിക്കുന്ന തലമുറകള്‍ക്ക് സ്വച്ഛമായ ജീവിതം അസാധ്യമായിത്തീരുകയും ചെയ്യും. അതുകൊണ്ട് കപടധാര്‍മികതയുടെ വാദങ്ങള്‍ക്ക് ചെവി കൊടുക്കാതിരിക്കുക എന്നതാണ് സമൂഹത്തിന്റെ നന്‍മ ആഗ്രഹിക്കുന്നവര്‍ ചെയ്യേണ്ടത് , സര്‍ക്കാറും.
            ചങ്ങമ്പുഴ ഈ കാപട്യക്കാരെ പണ്ട് ഇങ്ങനെ ഭര്‍ത്സിച്ചിട്ടുണ്ട്.
                        വെള്ളം ചേര്‍ക്കാതെടുത്തോരമൃതിനു സമമാം നല്ലിളംകള്ളു ചില്ലിന്‍
                        വെള്ളഗ്ലാസില്‍ പകര്‍ന്നങ്ങനെ രുചികരമാം മത്സ്യമാംസാദി കൂട്ടി
                        ചെല്ലും തോതില്‍‌ച്ചെലുത്തി, ചിരി കളികളോടൊത്തു മേളിപ്പതേക്കാള്‍

                        സ്വര്‍‌ല്ലോകത്തും ലഭിക്കില്ലുപരിയൊരു സുഖം പോക വേദാന്തമേ നീ!

Comments

Popular posts from this blog

#ദിനസരികള്‍ 1192 - കടമ്മനിട്ടയുടെ മകനോട്

#ദിനസരികള്‍ 389 മലയാളത്തിലെ ഖണ്ഡകാവ്യങ്ങള്‍ -1